Qýlyǵy iske aspaı, jumysynan qýyldy

Qaraǵandylyq polısııa qyz­metkerleriniń basshylyqqa jaqsyatty bolý úshin qandaı qıturqy áreketke barǵany ásh­kere boldy. Olar zeınetker áıeldiń syrtynan joldy ruqsat etilmegen jerden kesip ótti dep aıyppul salyp jibergen. Sonyń saldarynan tártip saq­shylarynyń qýlyǵy iske aspaı, ózderi jumystarynan aıy­ryl­ǵany azdaı-aq túrmege túse jaz­dady. Oqıǵa bylaı bolǵan eken. Polısııa qyzmetkeri óziniń serigimen birge kezekshilikte júrgeninde jerde jatqan bir dápterdi taýyp alady. Onda qalanyń ońtústik-shy­ǵy­syn­daǵy turǵyndardyń tizimi bar bolyp shyqqan. Polıseıler kóp oılanyp jatpastan tizimniń ishinen bir famılııany tańdaǵan da, syrtynan 9600 teńge aıyp­puldy qujattap jibergen. Aıyppuldyń túbirtegi úıine kelgende Marııa Sharapovna (aty-jóni ózgertilgen) shalqa­synan túse jazdapty. О́ıtkeni, ol zańdy qurmetteıtin, júris-turysy túzý adam eken. Sodan Marııa Sharapovna eki ókpesin qolyna alyp, polısııa basshylaryna barady. Jaǵdaıdy táptishtep túsindiredi. Mine, osydan keıin baryp, polısııa qyzmetkerleriniń jumys tıimdiligin arttyrý úshin osyndaı aıar qadamǵa barǵany belgili bolǵan. Zeınetker moraldyq jáne materıaldyq ótemaqydan bas tartty. Al sot bolsa, burynǵy pol­ısııa qyzmetkerlerine iri kólemde aıyppul saldy. Birin­shisi memleket qazynasyna 2 mln. 222 myń teńge tólese, ekin­shisi 1 mln. 822 myń teńgeni sanap beretin boldy. Qaırat ÁBILDINOV, «Egemen Qazaqstan». QARAǴANDY.