Reseıde eń qaýipti kıller ustaldy

ASTANA. 5 sáýir. Reseıde asa qaýipti qylmyskerlerdiń biri, kıller, «Kishi Drıýnıa» laqap atymen belgili Andreı Drıýnındi Irkýtsk qalasynyń polıseıleri men Zabaıkale ólkesindegi federaldy qaýipsizdik qyzmeti basqarmasynyń ókilderi qolǵa túsirdi. Bul týraly sibinfo.su habarlady. Habarlamada kórsetilgendeı, polıseıler Chıta qalasynyń týmasy, 41 jastaǵy A.Drıýnın Irkýtsk oblysy Oktıabr aýdanynda jasyrynyp júrgenin estigen eken. Ol osynda talaıdy zar qaqsatqan qylmystyq toptyń múshesi bolypty. Zabaıkale ishki ister mınıstrliginiń habarlaýynsha, atalmysh kıller eldegi eń qaýipti 10 qylmyskerdiń biri kórinedi. Oǵan 10 adamdy tapsyryspen óltirdi degen aıyp taǵylyp otyr. Reseı ishki ister mınıstrligi Zabaıkale ólkelik qylmystyq izdestirý basqarmasynyń basshysy Andreı Moskvıtınniń sózine qaraǵanda, kúdiktige óte qatigez ári tez sheshim qabyldaı biletin qylmysker degen minezdeme berilgen. Polıseılerdiń aıtýynsha, A.Drıýnın ózine quqyq qorǵaý oryndary izdeý jarııalaǵanyn bile tura «kásibin» toqtatpaǵan. Qazirgi tańda kúdikti Chıta qalasyna jetkizilip, ýaqytsha oqshaýlaǵyshyna otyrǵyzylǵan. Joldybaı Bazar. Derek, sýret: sibinfo.su.