QOSTANAI. 24 mamyr. Qostanaıda óner men ǵylymdaǵy daryndarǵa, mádenıet, bilim salasy qyzmetkerlerine «Mesenattar klýbynyń» syılyǵy tapsyryldy. Qostanaıdyń Atymtaı-jomart kásipkerler mádenıet pen óner salasy, shyǵarmashylyq ókilderin bıyl on besinshi jyl qoldap keledi. Bul týraly egemen.kz tilshisi habarlady.
«Mesenattar klýby» syılyǵynyń shyǵarmashylyq ókilderine on besinshi ret tapsyrylý saltanatyna qatysqan oblys ákimi Nuraly Sádýaqasov mereıli merkemen kásipkerlerdi de, óner men mádenıettegi daryndardy da quttyqtady. Nuraly Sádýaqasaov: «Osy kezge deıin Mesenattar klýby» 369 syılyq berdi, ony 372 laýreat aldy. 35 óner ujymy syılyqpen marapattaldy. «Mesenattar klýby» el eńsesin kótere qoımaǵan 2000-shy jyly qurylǵan bolatyn. Ol kezde shyǵarmashylyq adamdary qarjyǵa, kómekke zárý boldy. Al búgin «Mesenattar klýby» syılyǵynyń maqsaty basqa, ol laýreattardyń ónerge, mádenıetke, bilimge, ǵylymǵa, sportqa, áleýmettik basqa salalarǵa sińirgen eńbegin baǵalaıdy. Qazir de ýaqyt jeńil emes, biraq mesenattar qaı ýaqytta da mesenat bolyp qala beredi. Bizdegi shyǵarmashylyq ókilderi mesenat kásipkerlerge rahmet aıtýy tıis. Olardyń kópshiligi aýyl sharýashylyǵynda isteıdi. Syrtqy jaǵdaılardyń áserinen ekonomıka da aýyr jaǵdaıdy bastan keship otyr, sonymen qatar tollassyz jańbyr dıqandardyń qolyn jipsiz baılap otyr. Munyń barlyǵyn da kásipkerler jeńedi jáne halqymyz rýhanııatyna qyzmet etetin óner men mádenıet, ǵylym ókilderine qol ushyn soza beredi» dedi.
Munan keıin «Mesenattar klýbynyń» «Qazyna» jáne «Shabyt» syılyqtary «ádebıet», «mádenı mura», «Ǵylym», «Bilim», «Horeografııa», «Teatr», «Vokal», «jýrnalıstıka», «Aýyl ónerpazy», «О́ner ujymynyń jetekshisi», «Mýzyka óneri» degen birneshe atalymdar boıynsha tapsyryldy. Olardyń arasynda qolónershi jáne etnograf Shóptibaı Baıdildın, Saqtaǵan Dosmuhambetov, akter Qonysbek Begaıdarov, fılologııa ǵylymdarynyń doktory Almas Ábsadyqov, bilikti ustaz Nıkolaı Kochın, mýzykant Svıatoslav Stakanov, kompozıor Gennadıı Sedov, Murat Hamıtov, óner stýdııasynyń jetekshisi Ásııa Berkenova, ánshi Gúlmıra Úmbetova, jýrnalıster Tatıana Bashkatova, Gúljibek Bekmuhambetova taǵy basqalar bar.
Eske sala ketsek, 2000-shy jyl elimizde mádenıet jyly dep belgilengen bolatyn. Elbasy N.Nazarbaev kásipkerlerge shyǵarmashylyq ókilderin qoldaýdy usynǵan edi. Sol jyly Qostanaı oblysynyń ákimi bolyp turǵan О́mirzaq Shókeevtyń bastamasymen oblysta «oblys ákimi syılyǵy» taǵaıyndalyp, keıinirek ol «Mesenattar klýby» bolyp quryldy. Ony belgili sharýashylyq uıymdastyrýshy, kásipker, «Ivolga» jaýapkershiligi shekteýli seriktestiginiń dırektory Vasılıı Rozınov basqardy. Mine, sodan beri Atymtaı jomarttar óner men men mádenıet, bilim men ǵylym, sport salalary ókilderine 100 mıllıon teńgeniń syrtynda kómek berdi.
Názıra Járimbetova.
Derek, sýret: egemen.kz
