Djekı Chan Beıjińdi qoldap án shyrqaıdy

ASTANA. 13 naýryz. Qytaıdyń ataqty kınoakteri Djekı Chan Beıjińniń 2022 jylǵy qysqy Olımpıada oıyndaryna úmitkerligin qoldap, án shyrqamaq. Bul týraly egemen.kz habarlady. Halyqaralyq Olımpıada komıteti (HOK) ótken jyldyń shildesinde negizgi úmitker retinde úsh qalany bekitti. Beıjińnen bólek, bizdiń Almaty men Norvegııa astanasy Oslo da aq Olımpıadadan úmitti edi. Alaıda, 2014 jyldyń qazanynda Norvegııa óz erkimen bas tartyp, negizgi talas Almaty men Beıjiń arasynda ótetin boldy. Qazir HOK-tyń baǵalaý komıssııasy eki qalanyń múmkindikterin saralaýda. 14-18 aqpan kúnderi Almatyǵa kelgen ókilder bizdiń múmkindigimizdi joǵary baǵalady. Endi 24-28 naýryz aralyǵynda sol komıssııa Qytaı astanasyna at basyn tireıdi. Búginde Shyǵystaǵy kórshimiz osy synaqqa qyzý daıyndalýda. Tipti belgili kınoakter Djekı Chan da Olımpıadanyń óz elinde ótýi úshin aıanyp qalatyn emes. Ol HOK ókilderi aldynda Beıjińniń úmitker qala retinde usynylǵan «Oıan, qys» atty resmı ánin oryndamaq. Atalǵan Olımpıada oıyndarynyń astanasy osy jyldyń 31 shildesinde HOK-tyń kezekti sessııasynda belgili bolady. Bul jıyn Malaızııanyń Kýala-Lýmpýr qalasynda ótedi. Eger Beıjiń jeńiske jeter bolsa, jazǵy jáne qysqy Olımpıada oıyndaryn ótkizgen alǵashqy qala retinde hatqa túspek. Djekı Channyń akterlik qyrynan basqa, ánshilik qabileti de óte joǵary. Tipti búginge deıin 11 án jınaǵyn shyǵarǵan ol óz elinde kásibı ánshe retinde de tanymal. Sondaı-aq, onyń 2008 jyly Beıjińde ótken jazǵy Olımpıada oıyndarynyń ashylý saltanatynda án shyrqaǵanyn aıta keteıik. Elaman Qońyr. Derek: egemen.kz. Sýret: superchanblog.blogspot.com.