ASTANA. 24 mamyr. Elimizdiń aıbyndy áskeri qataryn osy jyly syr óńirinen attanatyn 700 asa azamat tolyqtyrmaq. Solardyń bir legin aımaq basshysy Qyrymbek Kósherbaev shyǵaryp salyp, sát-sapar tiledi. Bul týraly Qyzylorda oblysy ákimdiginiń baspasóz qyzmeti habarlady.
Elimizde áskerge alynatyn azamattarǵa qoıylar talap kúsheıip keledi. Eń aldymen jastardyń densaýlyǵy quryshtaı berik, bilimdi bolýy shart. Sonda ǵana Qazaqstannyń sarbazdary joǵarǵy áskerı daıyndyqtan ótken, elin súıetin, otanyn qorǵaıtyn myqty azamat bolyp shyǵady.
Jas sarbazdardy áskerge shyǵaryp salý saltanatynda Qyrymbek Kósherbaev: «Sizder er jetip, búgin ásker qataryna attanǵaly otyrsyzdar. El tynyshtyǵyn kúzetý – azamattyq borysh. Qazir zaman tynysh. Alaıda, bul Otan kúzetindegi jaýyngerdiń jaýapkershiligin jeńildetpeıdi. Alashtyń anasy – Syr eliniń búgingi jastary alǵan tálim-tárbıesi, bilimi men ómirlik tájirıbesiniń arqasynda merzimdi áskerı qyzmetin joǵary jaýyngerlik deńgeıde atqaratynyna senimimiz mol. Osyǵan oraı men sizderge úlken senim artyp «Amanat» joldap otyrmyn», – dedi.
Aıta keteıik, áskerı boryshyn óteýshilerdiń barlyǵyna oblys ákiminiń atynan Qadyr Myrza Áliniń «Almas jerde qalmas» kitaby tabys etildi. Al oblystyq ardagerler keńesiniń tóraǵasy aq batasyn berip, sát-sapar tiledi.
Talǵat Raıymbek.
Derek, sýret: Qyzylorda oblysy ákimdiginiń baspasóz qyzmeti.
