Italııanyń Joǵarǵy soty Berlýskonıdi aqtap shyqty

ASTANA. 13 naýryz. Italııanyń Joǵarǵy soty eldiń burynǵy premer-mınıstri Selvıo Berlýskonıdiń aty-shýly «Rýbı isi» boıynsha aqtalǵanyn rastady. Bul týraly RIA Novostı habarlady. Atalǵan is boıynsha úkimdi Mılannyń apellıasııalyq soty ótken jyldyń shildesinde shyǵarǵan bolatyn. Endi mine, eldiń Joǵarǵy soty da sol úkimdi rastap otyr. Degenmen, Italııa sottary mundaı sheshim shyǵarý úshin uzaq keńesti. Tipti 10 naýryzdaǵy sońǵy otyrystary 10 saǵatqa sozylyp, sheshim jergilikti ýaqyt boıynsha túngi 23:40-ta belgili boldy. Italııada Joǵarǵy sottyń sheshimi eń sońǵy sóz bolyp sanalady. Sondyqtan qaıta shaǵymdaný boıynsha ister qaralmaıdy. Osylaısha, Italııa soty álemniń nazaryn aýdarǵan daýly iske núkte qoıdy. Eldiń Bas prokýrory aqtaý úkiminiń kúshin joıyp, isti qaıta qaraýdy suraǵanymen, esh nátıje shyqpady. Esterińizge sala keteıik, «Rýbı isi» 2011 jyldyń sáýirinde bastaldy. Istiń «Rýbı» dep atalýy marokkolyq Karıma el-Marýg esimdi qyzdyń laqap atymen baılanysty. Berlýskonıge taǵylǵan aıyp qyzdyń 18 jasqa tolmaǵanyna qaramaı, onyń qyzmetine júgingen. Iаǵnı, kámelettik jasqa tolmaǵandardyń jezókshelikpen aınalysýyna qatysy bar jáne óz qyzmet babyn asyra paıdalandy degen aıyp boıynsha isi sotqa jiberilgen edi. Osyǵan baılanysty, 2013 jyldyń maýsymynda Mılan soty burynǵy premer-mınıstrdi 7 jylǵa bas bostandyǵynan aıyrý týraly úkim shyǵardy. Alaıda, 2014 jyldyń shilde aıynda Mılannyń apellıasııalyq soty aıǵaqtardyń jetispeýine baılanysty Berlýskonıdi aqtap shyqty. Elaman Qońyr. Derek: RIA Novostı. Sýret: qelsi.it.