Qaraǵandyda inisin óltirgen qyz sottan ózin aqtaýdy talap etedi

QARAǴANDY. 5 sáýir. Qaraǵandy oblysy Jańaarqa aýdanynyń turǵyny Qalamqas Amanbek oblystyq sotqa ózine taǵylǵan 11 jastaǵy jıen inisi Leon Serikbaevty óltirdi jáne qara kúzen tondy urlady degen aıyptardan aqtap shyǵýdy talap etken apellıasııalyq shaǵym jazdy. Bul týraly Tengrinews.kz tilshisi habarlady. Mundaı apellıasııalyq shaǵymdy ólgen balanyń ata-anasy da jazdy. Olar úkimdi zańdy kúshinde qaldyrýdy nemese burynǵydan da kúsheıtýdi ótinedi. Leonnyń ápkesi Janet Serikbaeva naǵashysy Qalamqastyń joǵary ınstansııaǵa shaǵymdanyp jatqanyn rastady. «Ol kýálardyń kórsetýleri men tekserý ádil júrmedi, eshqaısysy da eshteńe kórmesten, bárin dolbarlap aıtty» dep otyr. Ol sondaı-aq úıge kelgenimen, ishke kirmegenin aıtady. Biz óz shaǵymymyzda úkimdi kúshinde qaldyrýdy nemese burynǵydan da kúsheıtýdi ótindik», - dedi Janet. Shaǵymdy oblystyq sottyń keńsesi qabyldap alǵan. Atalmysh máseleni qaraıtyn otyrystyń ótetin ýaqyty ázirge belgisiz. Eske sala keteıik, Qaraǵandy oblystyq qylmystyq ister jónindegi mamandandyrylǵan aýdanaralyq soty Qaraǵandy ekonomıkalyq ýnıversıtetiniń stýdenti Qalamqas Amanbekti qara kúzen tonyn urlap áketý úshin jıeni Leon Serikbaevty óltirgen dep taýyp, ony 17 jylǵa bas bostandyǵynan aıyrdy. Atap óteıik, sottalýshynyń jańa týǵan qyzynyń joq bolyp ketýine baılanysty da qylmystyq is qozǵaldy. Sotta Leon Serikbaevtyń ákesi aıtqandaı, Qalamqas 2014 jyldyń aqpan aıynda qyz týyp alady. Biraq artynan náreste joq bolyp ketedi. Leon Serikbaev 2014 jylǵy 25 qyrkúıekte óltirildi. Bala boıjetkenniń úıden anasynyń tonyn urlap bara jatqanyn kórip qalǵan. Tergeýdiń boljamy boıynsha, qyz aldymen 11 jasar balany urady, sońynan pyshaq salyp alady. Sosyn marqumnyń kıimderi men zattaryn jaǵyp jiberip, máıitin esiktiń aldyndaǵy ájethananyń  shuńqyryna tastaıdy. Sotta munyń bári beınematerıal arqyly kórsetildi. Rolıkterdiń birinde aıyptalýshynyń lombardqa baryp, urlanǵan tondy ótkizip jatqany kórinip tur. Sýdıa sol kezde qyzdan kadrdaǵy kim ekenin suraǵanda, ol óziniń nashar kóretinin aıtqan. Ony lombard qyzmetkeri de tanyǵan. Sondaı-aq kórshi áıel de Leondy jetelep alyp bara jatqan qyzdyń osy ekenin aıtyp bergen. Aıqyn Nesipbaı. Derek, sýret: Tengrinews.kz.