«Shahterdiń» medıa-ofıseri on jylǵa sottalýy múmkin

QARAǴANDY. 20 qazan. Qaraǵandylyq prokýrorlar «Shahter» fýtbol klýbynda baspasóz qyzmetiniń jetekshisi bolyp istegen Mansur Qalıevti on jylǵa túrmege qamaýdy talap etip otyr. Bul týraly egemen.kz tilshisi habarlady. Eske salsaq, ótken jyldyń qarasha aıynda arnaıy jedel jasaq jaýyngerleri oblys ortalyǵyndaǵy «Olımp» býkmekerlik keńsesine qaraqshylyq shabýyl jasaǵan bes birdeı kúdiktini qolǵa túsirgen bolatyn. Keıin anyqtalǵandaı, bul qylmystyq istiń basty uıymdastyrýshysy – «Shahter» fýtbol klýbynyń medıa-ofıseri Mansur Qalıev bolyp shyqty. Sondaı-aq, tergeý amaldary barysynda Mansur Qalıevtiń budan bólek qaraqshylyq shabýyl jasaýdyń týra osyndaı taǵy da 8 faktisine qatysy barlyǵy anyqtalǵan. Qazirgi ýaqytta osy iske qatysty sot prosesi júrip jatyr. Memlekettik aıyptaýshy Qalıevke 10 jyl, onyń tórt sybaılasyna 7 jyldan jaza surap otyr. Qaırat Ábildınov. Derek, sýret: egemen.kz.