Baıqońyrdyń balalary qazaqstandyq standartpen oqıdy

Jasyratyn eshteńesi joq, osyǵan deıin Baıqońyr qalasyndaǵy 6 mektepte reseılik standarttar boıynsha bilim berip kelgen. Bir kezderi qabyldanǵan sheshimniń kesirinen qazaqtyń qarakóz balalary ana tilinde bilim ala almady. Tarıhyn tanymaı, qazaqstandyq bilimmen sýsyndaýǵa múmkindikteri bolmady. Basqa eldiń tarıhyn oqyp kelgen perzentterdiń bıyldan bas­tap qazaqstandyq standarttarǵa kóshetinin buǵan deıin habarlaǵan edik. Jańa oqý jyly bastalar tusta sózdiń naqty iske ulasqanyn kórdik. Bilim kúni №277 mekteptiń tabal­dyryǵyn 642 baıqońyrlyq búldirshin alǵash ret attady. K.Toqmuhamedov atyndaǵy mektepte ótken «Alǵashqy qońyraý» saltanatty sharasyna oblys ákimi Qyrymbek Kósherbaev qatysty. – Bıylǵy oqý jyly barshamyzǵa úlken qýanyshpen bastalyp otyr. О́ıtkeni, Reseıdiń oqý standartyna ótip ketken qazaq mektepterin ózimizge qaıtaryp aldyq. Búginnen bastap osyndaǵy 6 qazaq mektebi otandyq bilim berý júıesimen jumys isteıdi. Bul Táýelsiz elimiz úshin jáne osyndaǵy qarakóz balalarymyzdyń bolashaǵy úshin mańyzdy,–  dedi aımaq basshysy. Ata-analardyń qýanyshynda shek joq. Túıtkildi máseleni sheship bergen Elbasyna alǵystaryn aıtty. Al, aımaq basshysy birinshi synyp oqýshylaryna Elbasynyń «Meniń Otanym – Qazaqstan» kitabyn tabys etti. 2015 jylǵa atalǵan bilim berý nysa­ndarynyń shyǵyndaryna respýblıkalyq bıýdjetten 982,1 mıllıon teńge qarjy bólindi. Osy qyrkúıek aıynyń ózinde atalmysh bilim mekemeleriniń materıaldyq-tehnıkalyq kerek-jaraǵyn tolyq qamtýǵa qosymsha 200 mıllıon teńge bólindi. Sondaı-aq, mundaǵy mektepterge qajetti 90442 dana oqýlyq tolyǵymen jetkizilgen. Erjan BAITILES, «Egemen Qazaqstan». BAIQOŃYR.