• 05 Sáýir, 2015

Reseı bendıden álem chempıony ataǵyn saqtap qaldy (foto)

270 ret

kórsetildi

2 mın

oqý úshin

Egemen Qazaqstan

ASTANA. 5 sáýir. Dopty hokkeıden Reseı quramasy keshe Habarovskide márege jetken álem chempıonatynda óziniń chempıondyq ataǵyn saqtap qaldy. Ol fınaldyq matchta Shvesııa quramasyn 5:3 etip jeńdi. Bul týraly «Vostok-Medıa» saıty habarlady. «Reseı quramasy dopty hokkeıden álem chempıony atandy. Osy mınýttarda «Erofeı» arenasynda eń kúshti qarsylastar arasyndaǵy match aıaqtaldy. Ulttyq komanda kezdesýdiń sońǵy mınýttarynda oıynnyń taǵdyryn óz paıdasyna sheshe bilip, Shvesııadan jeńisti tartyp áketti. Esep – 5:3», - delingen habarlamada.

Kezdesýdiń basy skandınavtardyń basymdyǵymen ótti. Qaqpashy Roman Chernyh 3-mınýtta óz qaqpasyna birinshi dopty jiberip aldy. Ony Krıstoffer Edlýndtyń pasynan Danıel Andersson saldy. Shvedter bar bolǵany bes mınýt ótkende basymdylyǵyn eseleı tústi. Bul joly baǵannyń astyna dopty Per Helmıýrs jóneltti.

Taımnyń ekvatoryna qaraı reseılik Pıotr Zaharov eki qaýipti shabýyl uıymdastyrdy. Biraq shved golkıperi Andreas Bergval qaqpanyń «alýyna» jol bermedi. Esepti qysqartý áreketin 40-mınýtta buryshtamadan berilgen dopty tıimdi paıdalanǵan Sergeı Lomanov jasady – 1:2. Komandalary úziliske osy eseppen ketti.

Tablodaǵy esep 72-mınýtqa deıin saqtalyp turdy. Osynyń aldynda Pavel Rıazansev jaǵdaıdy teńgerýge eki ret talaptanyp edi. Biraq ekeýi de bosqa ketti. Shvedter óz qaqpalaryna qaraı soqqy jasaýǵa múmkindik bermedi. Budan keıin skandınavtar shabýylǵa shyqty.

Aqyrynda olar reseılikter qaqpasyna úshinshi goldy da túsirip úlgerdi. Ony Patrık Nılsson óz esebine jazdy – 3:1. Mynadan keıin orystardyń qarsylastaryna jete qoıýy qıyn sııaqtanyp kóringen. Áıtkenmen, «Erofeı» arenasyna Reseı premer-mınıstri Dmıtrıı Medvedev kelgen sátten bastap quramanyń aıy ońynan týyp júre berdi. Arada mınýt ótpeı jatyp, Aleksandr Tıýkavın taǵy bir goldyń qarymtasyn qaıtaryp ketti – 2:3. Onyń artynsha Sergeı Lomanov taǵy kózge tústi – 3:3. Mundaı sáttilikti kútpegen orystardyń ózi osydan soń arqalanyp, alǵa shapty. Bul shapqyndar bos ketken joq, Pavel Rıazansev pen Maksım Ishkeldınniń doptary negizinde esepti 5:3-ke jetkizdirdi. Eske sala keteıik, osynyń aldynda qola medal úshin talasta Qazaqstan quramasy Fınlıandııany 8:6 etip utqan bolatyn. Damır Qojamqul. Mánbe, sýret: Vostok-Medıa.