Jambyl oblysynda Temirbek Qojakeevke eskertkish qoıyldy

TARAZ. 2 qyrkúıek. Jambyl oblysy Merki aýdany ortalyǵyndaǵy №39 orta mektep-gımnazııasyna belgili ǵalym, fılologııa ǵylymdarynyń doktory, professor Temirbek Qojakeevtiń esimi berildi. Bul kúni bilim ordasyna ǵalymnyń eskertkishi qoıylyp, mektep ishinen Temirbek Qojakeev atyndaǵy mýzeı de ashyldy. Bul týraly egemen.kz tilshisi habarlady. Qazaq jýrnalıstıkasy men satırasynyń teorııasyn, tarıhyn zerttegen belgili ǵalym, ulaǵatty ustaz Temirbek Qojakeevtiń eline sińirgen eńbegi zor. Ol uzaq jyldar boıy ál-Farabı atyndaǵy Qazaq Ulttyq ýnıversıtetiniń jýrnalıstıka fakýltetin basqaryp, myńdaǵan shákirtter tárbıeledi. Búginde qazaq jýrnalıstıkasynda ustazdyń azamattyǵy men qaıratkerligi, týralyǵy men eńbeksúıgishtigi ańyz bolyp aıtylady. Sodan bolar bul is-sharaǵa Almaty men Astanadan, ózge de aımaqtardan belgili ǵalym-jazýshylar, satırıkter men respýblıkalyq basylymdardyń redaktorlary, ózge de shákirtteri men áriptes-dostary keldi. Olar Temirbek Qojakeevke óziniń týǵan jerinde mundaı qurmet kórsetý ıgilikti is ekenin atap ótti. Ulaǵatty ustaz jaıyndaǵy estelikterimen bólisip, rızashylyqtaryn bildirdi. Eskertkish pen mýzeı ashý isine muryndyq bolǵan Temirbek aǵanyń uly Mádet Qojakeev mýzeı ishin talǵampazdyqpen jasaqtap, ǵalymnyń eńbekteri men sýretterin, orden, medaldary tárizdi jádigerlerdi qoıypty. «Mýzeıge ákemizdiń jeke zattarynan góri, estelik, tanymdyq-taǵylymdyq dúnıelerin qoıýdy jón kórdik. О́ziniń eńbekterin, kitaptaryn, ár kezderdegi alǵan orden, medaldaryn, kandıdat, doktorlyqty qorǵaǵandaǵy, professor ataǵyn alǵandaǵy qujattaryn, ózge de osyndaı dúnıelerdi qoıdyq. Músindi elimizge belgili músinshi – Tileýberdi Bınashev jasady. Ákemizdiń esimin ıelengen bul mektep-gımnazııa elimizdegi aldyńǵy qatarly mektepterdiń biri bolady dep oılaımyn. Buǵan bárimiz de atsalysýymyz kerek», – deıdi Mádet Qojakeev. Oralhan Dáýit. Derek, sýret: egemen.kz.