Talantty jas ónerpazdardyń basyn biriktirip, olardyń ónerlerine shabyt berip, shyǵarmashylyqtaryna baǵyt siltep júrgen óner ujymdary, Qudaıǵa shúkir, eldiń bas qalasy – Astanada jeterlik. Ansambl deısiz be, bı toby deısiz be, saz mektepteri deısiz be, áıteýir ónerdiń san qyryn ashatyn óner ortalyqtary shetinen ashylyp jatyr. О́nerdi alǵa qaraı jyljytatyn, jas talanttardyń tanylýyna eleýli yqpal etip júrgen mundaı óner mektepteri men ortalyqtarynyń ashylýy ata-analar men balalardy qýantyp jatsa, ekinshi jaǵynan ulttyq mádenıet pen ónerimizdi nasıhattaýdyń da ózindik sara joly.
Osy oraıda Fransııa, Egıpet, Ispanııa, Birikken Arab Ámirligi, Indonezııa syndy memleketterde ulttylyǵymyzdy dáriptep, rýhanı qazynamyz bolyp sanalatyn tól ónerimizdi tanystyryp júrgen, ózderi shaǵyn bolsa da 23 ret shetelderge shyǵyp, túrli baıqaýlar men festıvaldarǵa qatysyp, el abyroıy men qazaq atyn áıgilep júrgen Astana qalasy №2 balalar saz mektebiniń janynan qurylǵan “Sheksiz áýen” atty jastar ortalyǵynyń qazaq ónerine sińirip júrgen eńbegin aıtpasqa bolmas.
Bir aıta ketetin jaıt, ótken jyly osy óner ujymynyń bir aı boıy Fransııada ótken úsh birdeı halyqaralyq festıvaldarǵa qatysyp, úlken abyroıǵa kenelip qaıtqandaryn jazǵan bolatynbyz. Al endi, minekı, bıylǵy, ıaǵnı 2010 jyly “Sheksiz áýen” jastar ortalyǵy Indonezııanyń astanasy Djakarta qalasynda ótken I halyqaralyq “Arsena” musylmandar festıvaline qatysyp qaıtypty.
“Júzderi jarqyn, tústeri jyly, qonaıqjaı Indonezııa halqyn kórgende ózimizdi, qazaǵymyzdy kórgendeı boldyq. Bizdi jyly qarsy alyp, erekshe iltıpat bildirip jatty. Festıval salaýat aıtýdan bastalyp, sosyn ımam Quran baǵyshtady. Osyndaı júrektiń eń bir abzal, eń bir pák sezimi – Allaǵa degen pendesiniń mahabbaty boıymyzǵa keremet jiger bergendeı boldy. Sol kezde óner ujymyndaǵy dombyrashy, jyrshy, ánshi, termeshi balalarmen qosa, S.Seıfýllın atyndaǵy Qazaq agrotehnıkalyq ýnıversıtetiniń oqytýshysy Gúlmıra Maǵzumova jetekshilik etetin “Raýan” bıshiler toby, Kókshetaý qalalyq fılarmonııasynyń tanymal ánshileri Maıra Esmuqanova men Bısara Makenova, Astana qalalyq fılarmonııasynyń dombyrashylary da boldy. Bárimiz qosylyp, halqymyzdyń ánin aıtyp, bıin bılep berdik. О́zge elderden kelgen ónerpazdardyń bizge degen yqylastary da erekshe boldy. Bir jaǵynan olardyń bizdiń ulttyq ónerimizge degen iltıpattaryn kórip, biz de rıza boldyq. Osy festıval aıasynda qala sherýi uıymdastyryldy. Sherý kezinde ár memleketten kelgen delegattar ózderiniń memlekettik týyn ustap, ánurandaryn shyrqady. Qalanyń ásem jerlerin aralap, bas ımamnyń tek qazaqstandyq delegattarǵa arnalǵan kezdesýine qatysyp, bas ımamnyń ózi basshylyq etetin medresesinde bolyp qaıttyq. Sonymen qatar Djakarta qalasynyń bas ımamy bizdi úıine shaqyryp, túski as berdi. Biz úshin de bul úlken abyroı boldy. Balalar Djakarta qalasynda óner kórsetip qana qoımaı, osy qaladaǵy eń iri haıýanattar baǵynda bolyp, álemdegi sırek kezdesetin janýarlardy óz kózderimen kórip qaıtty. Úndi muhıtynyń sýyna qańtar aıynda sýǵa túsý balalar úshin eshqashan da umytylmaıtyn oqıǵa bolǵany anyq”, – dep Djakarta qalasynda ótken festıvaldyń tynysymen “Sheksiz áýen” jastar ortalyǵynyń dırektory Ospan Súleımenov bizdi tanystyryp ótti.
Jemisti bastalǵan jyl nátıjeli jemispen óz jalǵasyn taýyp keledi. Osy jaqynda ǵana “Sheksiz áýen” ortalyǵynyń ujym músheleri Qytaı Halyq Respýblıkasynda ótken “Shyńjań halyqaralyq balalar festıvaline” qatysyp qaıtty. Qazaqstan, Reseı, Qytaı, Úndistan, Pákistan, Túrkimenstan, Qyrǵyzstan syndy 7 memleket qatysqan halyqaralyq balalar festıvalinde de qazaqtyń halyq áni shyrqalyp, ulttyq bıi kórermenderdiń kózaıymyna aınalyp, tól ónerimiz jınalǵan jurtshylyq qaýymdy súısindirgen kórinedi.
№2 saz mektebiniń janynan qurylǵan bas-aıaǵy 20-dan astam ǵana múshesi bar óner ortalyǵynyń tól ónerimiz ben mádenıetimizdiń ósip-órkendeýine, álem halyqtaryna qazaq atyn tanytý jolynda óz úlesterin qosyp júrgenine biz de sheksiz rızamyz. Qadamdaryna nur jaýyp, órkenderi óssin jas órenderdiń!
Araı ÚIRENIShBEKQYZY.
