Qońyr ún. Kúmis qońyraý

Keshe keń baıtaq Otanymyzdyń barlyq mektepterinde alǵashqy qońyraý soǵylyp, qońyr ún úlken-kishiniń júrek qylyn terbedi. Bul árbir ul men qyzdyń esinde máńgi qalatyn qýanyshy bólek, shattyǵy shalqar sát. Al olardyń ata-analarynyń da urpaǵynyń tarydaı bolyp kirip, taýdaı bolyp shyǵatyn altyn uıa mektebine degen iltıpattary men izetin  alǵashqy qońyraý soǵylǵan sáttegi tebirenisterinen aıqyn ańǵarýǵa bolady. Bıyl elimizdegi 7525 bilim uıasynyń tabaldyryǵyn 2 488 978 oqýshy attasa, onyń 239 458-i birinshi synypqa barypty. Osyndaı aıtýly kúndegi ataýly kórinisterden jazylǵan toptama maqalalar men sýretterdi oqyrmandar nazaryna usynyp otyrmyz. Kachardyń qazaq mektebi Bıylǵy kúz Kachar kentiniń jurtyna úlken qýanysh syılady. Osyndaǵy qazaq orta mektebiniń oqýshylary jańa oqý jylyn záýlim ǵımaratta bastady. Jyl boıy jóndeý jumystarynan ótken mektep úıi ınteraktıvti taqta, kompıýter synyptary sııaqty zamanaýı oqý quraldarymen jabdyqtalǵan. Ár mekteptiń de adam sııaqty ómirderegi, tarıhy bolady. El táýelsizdigine deıin Kachar kentinde qazaq mektebi túgil, qarakóz aǵaıyn­dar­dyń ózin kósheden ilýde bir kóretinsiz. Dúnıeniń tórt buryshyna tarydaı shashylyp ketken qandastarymyz kóshti ata mekenge bur­ǵan kezde osy Kachar kentin qutty qonys dep bil­di. Mundaǵy qazaq mektebiniń ashylýy da alys­taǵy aǵaıyndardyń osynda oralýyna tikeleı baılanysty edi. 2006 jyly tuńǵysh qa­zaq mektebi ashylǵanda partada 59 bala otyr­ǵan edi. Mine, endi bıyl Kachardaǵy qazaq orta mek­tebi oqýshylarynyń sany 350-ge jetip otyr. 90-shy jyldary naryqqa baılanysty Kachar ken basqarmasynyń kemesi qaıyr­la­ǵan­da kenshilerdiń kóbi kentti tastap ketti. Soǵan oraı balalar sany da azaıyp, orys mektebiniń ǵımaraty bosap qalǵan bolatyn. Al orys jáne qazaq mektepteri syǵylysyp, bir ǵımaratqa jaı­ǵasýǵa májbúr boldy. Al terezeleri úńi­reıip, qabyrǵalary yrsıyp on jyl bos turǵan orys mektebiniń burynǵy ǵımaratyn qurylys­shy­lar ótken jyly jazda qaıta qolǵa aldy. Qa­zir ol adam tanymastaı ózgerip, memlekettik til­de bilim alatyn jas urpaqtyń ıgiligine aınaldy. – Mektebimizde 5 ınteraktıvti taqta, bir­neshe kompıýter synyptary bar. Bı zalynyń qabyrǵalaryna túgel aına japsyrylǵan. Sport zalynyń ózi nege turady! Búldirshinder úshin shaǵyn ortalyq ta mekteptiń bir jaǵyna ornalasqan. Ondaǵy daıyndyq tobyna 20 bala barady, – deıdi mektep dırektory Ermek Imanqulov. Kachar qazaq orta mektebi balanyń sany jóninen oblystaǵy bilim oshaqtarynyń arasynda beldi oryn alady. Endi negizinen oralmandar balalary oqıtyn mekteptiń ózindik dástúri de qalyptasa bastary sózsiz. Názıra JÁRIMBETOVA, Qostanaı oblysy, Kachar kenti. Jańatalapta jańa oqý ordasy Bıyl Baızaq aýdanyndaǵy Qa­ra­sý aýylynda – 120, Jýaly aýda­nyndaǵy Jańatalap aýylynda – 180, Turar Rysqulov atyndaǵy aýdanda 300 oqýshyǵa arnalǵan jańa mektep ǵımarattary shákirt­terge esikterin aıqara ashty. Sonyń biri Jýaly aýdanyn­da­ǵy Jańatalap aýylyndaǵy jańa mektep. Bul mekteptiń qurylysy ót­ken jyly bastalyp, bıyl paı­dalanýǵa berilip otyr. “SAT Con­truc­tion” JShS mektep quryly­syna 379 mıllıon 275 myń teńge jumsapty. Qurylys jumysyna barlyǵy 120 adam tartylsa, onyń jartysyna jýyǵy jergilikti qurylysshylar eken. Jýaly aýdandyq bilim bólimi basshylarynyń aıtýyna qara­ǵan­da, alystaǵy aýyldan boı kóter­gen eńseli mektepke kórshi Kúr­ki­re­ýsý stansasy men Marııanskaıa aýylynan kelip oqýǵa kóptegen shá­kirt­ter tilek bildirip otyr eken. Sondyqtan eki-úsh shaqyrym jer­den qatynap oqıtyn oqýshylar úshin arnaıy avtobýs ta qaras­ty­rylyp qoıypty. Sondaı-aq, keshe oblys ákimi Qanat Bozymbaev Baızaq aýdanyn­daǵy Qarasý  aýylynan 120 oqý­shyǵa arnalyp salynǵan orta mek­teptiń ashylý saltanatyna qaty­syp, ustazdar men shákirtterge jańa oqý jylynda jańa tabys­tarǵa jetýge tilek bildirdi. Kósemáli SÁTTIBAIULY, Jambyl oblysy. Bilimge ystyq yntamen Araıly kúzdiń alǵashqy tańy alaýlaı atyp, arqan boıy kóteril­gen kúnniń kózi shilińgir shilde­de­gi­deı mol qyzýyn Jer-anaǵa jo­marttana tógip tur. Egemen elimiz­diń barys beıneli  bolashaǵynyń ıelerin tárbıelep jatqan bilim oshaqtary tegis qyzý qarbalas qu­sha­ǵyna bólengen. Búgin – Bilim kúni. Táýelsiz Qazaqstannyń aı­shyqty damýynyń asqaq aıby­ny­na aınalǵan Astana qalasynyń mek­tepterinde bıyl 120 myńnan astam bala dáris almaq. Elba­sy­nyń tikeleı bastamasymen ómirge kelgen 2020 jylǵa deıin bilim sa­lasyn damytýdyń jańa memle­kettik baǵdarlamasy aıasynda bilim bulaǵynan sýsyndaýǵa yntyqqan búldirshinderdiń jarqyn júzderi el erteńi úshin búgingi kúnniń ereksheligin pash etkendeı. Bilim kúni qushaqtary alqyzyl gúl shoqtaryna tolyp mektepke asyqqan jas órkenniń qýanyshyna ortaqtasyp, elordadaǵy 40 jyldan astam tarıhy bar irgeli bilim osha­ǵy – №28 orta mektepke atbasyn bur­dyq. Bıyl bul mektep qabyr­ǵa­synda 1120 oqýshy oqıtyn bola­dy. Onyń ishinde 132 búldirshin tuńǵysh ret mektep partasyna otyrmaq. Memlekettik tildiń már­te­besin kóterý jolynda atqa­ry­lyp jatqan ıgi sharalardyń arqa­synda uzaq jyldar boıy taza orys mektebi bolyp  kelgen bul irgeli bilim oshaǵynda da ýaqyt ta­la­byna saı betburys bastaldy. Bıyl №28 orta mektepte alǵash ret qazaq synyby ashylyp, otyzǵa tarta búldirshin birinshi qazaq sy­nybynyń tabaldyryǵyn attady. Jańa oqý jylynyń ashylýyna oraı ótken saltanatty jınalysta sóz alǵan mektep dırektory Tatıana Brýsevıchtiń aıtýynsha, bilim oshaǵynyń qalyptasqan berik dástúri bar. Mekteptiń vokaldy bı úıirmesiniń túlekteri qalamyzdaǵy talaı jarystarda júldeger atanǵan. Oqý ornynyń túlekteri memlekettik tildi tereń meńgerý baǵdarlamasy boıynsha qala mektepteriniń ishinde úzdikter qatarynan sanalady. Bilim kúni merekesine arnalǵan saltanatta birinshi synyp muǵa­lim­deri M.Myrzalıeva men A.Dýbovaıa mektep tabaldyryǵyn alǵash atta­ǵan búldirshinderge sát sapar ti­le­di. Sodan keıin bıyl mektep bi­tire­tin túlekter men bilim orda­sy­na endi ǵana qadam basqan búl­dir­shinder óner jarystyryp, shaǵyn qoıylym ótkizdi. Táýelsiz Qa­zaqstannyń Ánurany oryndalyp, alǵashqy qońyraý soǵyldy. Myńnan astam balaǵa bilim nárin quıatyn irgeli bilim osha­ǵyn­da jańa oqý jylynyń alǵashqy ashyq sabaǵy bastaldy. Jylqybaı JAǴYPARULY, Astana. Oqýshylarǵa barlyq jaǵdaı jasalǵan Bilim kúni qarsańynda Ordabasy aýdany Shubarsý aýylynda 1200 oryndyq jańa mektep ǵımaraty paıdalanýǵa berildi. Jıyrma myńǵa jýyq halqy bar aýylda negizinen shetelderden tarıhı Otanyna oralǵan qandas baýyrlarymyz turyp jatyr. Elbasynyń “100 mektep, 100 aýrýhana” baǵdarlamasy negizinde boı kótergen ǵımaratqa bıýdjetten 1 mlrd. 379 mln. teńge qarjy qaralyp, mektep qurylysyn “Ońtústikqurylys kompanııasy” JShS júrgizdi. Mektepte 8 – lıngafondy kabınet, 4 – kompıýter synyby, 2 – ınteraktıvti taqta, 720 orynǵa arnalǵan májilis zaly jáne salamatty ómir saltyn qalyptastyrýǵa baǵyttalǵan úlken sport zaly, voleıbol, basketbol, tennıs, fýtbol alańdary bar. Oqýshylardy eńbekke baýlýǵa arnalǵan metall óńdeý, aǵash óńdeý jáne tigin sheberhanalary, aspazdyqqa úıretetin arnaıy oqý bólmelerimen jabdyqtalǵan. Úlken kitaphanasy, oqý zaly da qarastyrylǵan mektepte 170-ke jýyq ustaz jetkinshekterdi bilim nárimen sýsyndatpaq. Gúlııa TAITELIEVA. Ońtústik Qazaqstan oblysy. Sábılerge syı Ata Zańymyzdyń aıtýly merekesi jáne Bilim kúni qar­sa­ńynda Aqjaıyq aýdanynyń Qa­raýyltóbe aýylyndaǵy jaǵymdy jańalyqqa kýá boldyq. Burynǵy mekteptiń ǵımaraty jasandy­rylyp, “Nurbaqyt” atty bala­baqshaǵa aınalǵanyna jurttyń rııasyz kóńilden shattanǵany memleketimizdiń óz halqyna qamqorlyǵynyń bir aıǵaǵy bolsa kerek. Bul jylǵa tolmaıtyn merzim ishinde aýdanda paıdalanýǵa be­rilip otyrǵan tórtinshi bala­baq­sha. Iаǵnı, “Balapan” baǵdarla­ma­sy boıynsha Aqjaıyqta alymdy adym jasalyp otyr. “Jol kar­tasyna” saı, “Nurbaqyt” bala­baq­shasyna oblys qazynasynan 50 mln. teńge qarastyrylǵan eken. Mine, ǵımarattyń ishi-syrty kózdiń jaýyn alady. Bul úshin turǵyndardyń “AJAS­st­roı” JShS-niń (dırektory A.Tó­legenov) azamattaryna alǵysy zor. Sábılerdiń oınaıtyn, ty­ny­ǵatyn bólmeleri, onda qoıyl­ǵan jıhaz, quraldar, oıynshyq­tar – bári-bári sándi, talǵamdy. Temir QUSAIYN, Batys Qazaqstan oblysy, Aqjaıyq aýdany.