Sammıtke qatysýshylar qaýipsizdigi basty nazarda

16 tamyzda Aqordada bolǵan jınalysta Prezıdent Nursultan Nazarbaevtyń tapsyrmasymen Astana qalasynda aldaǵy 1-2 jeltoqsanda ótetin Eýropadaǵy qaýipsizdik jáne yntymaqtastyq uıymy Sammıtine  daıyndyq úshin túrli baǵyttarda arnaıy jumys toptary qurylǵan bolatyn. Keshe Astanada EQYU-nyń Is basyndaǵy tóraǵasy, QR Mem­le­kettik hatshysy – Syrtqy ister mınıstri  Qanat Saýdabaev alǵash ret 11 jyldyq  úzilisten keıin bo­latyn iri halyqaralyq forým qatysýshylarynyń qaýipsizdigin qamtamasyz etý máseleleri jaıly arnaıy jumys toptarymen jınalys ótkizdi. EQYU sammıtine qatysýshy­lardyń qaýipsizdigin qamtamasyz etý qadamdary jóninde QR Pre­zıdenti Kúzet qyzmetiniń bas­ty­ǵy M.Aıýbaev, UQK tóraǵasy N.Ábi­­qaev, “Syrbar” syrtqy bar­laý qyz­metiniń dırektory A.Jan­qu­lıev, Qorǵanys mı­nıstri Á.Jaq­sy­bekov, Ishki ister mı­nıstri S.Baı­maǵanbetov, Tó­ten­she jaǵ­daılar mınıstri V.Boj­ko jáne Astana qala­sy­nyń ákimi I.Tas­maǵambetov habarlama jasady. Jınalysty qorytyndylaı kele, Q.Saýdabaev: “56 múshe mem­lekettiń basshylaryn, EQYU-ǵa  áriptes 12 mem­le­ket­tiń jáne ne­gizgi halyqaralyq uıymdar basshy­laryn qosqanda 5000-ǵa jýyq adamnyń qatysýy kútilip otyrǵan  osyndaı  joǵa­ry dárejedegi jáne aýqymdy basqosý Qazaqstannyń ǵana emes, postkeńestik elderdiń ta­rıhynda bolǵan emes. Bizdiń Elbasymyz aıtyp ótkendeı, Ota­nymyzǵa degen bul úlken qurmet jáne jaýapkershilik. Astanada qo­naqtardyń qaýipsizdigin, zańdy­lyq­ty jáne tártipti saqtaý joǵa­ry deńgeıdegi tarıhı mańyzdy kezdesýdi jemisti ótkizýdiń birden-bir talaby bolyp tabylady”, – dedi. Otyrystyń nátıjesi boıynsha tıisti memlekettik organdarǵa tapsyrmalar júkteldi, dep habarlady QR SIM-iniń baspasóz qyzmeti.