Elbasy qabyldady

Memleket basshysy Nursultan Nazarbaev Premer-Mınıstr Kárim Másimovti, Ulttyq Bank tóraǵasy Grıgorıı Marchenkony jáne “Samuryq-Qazyna” ulttyq ál-aýqat qory” AQ basqarma tóraǵasy Qaırat Kelimbetovti qabyldady, dep habarlady Qazaqstan Respýblıkasy Prezıdentiniń baspasóz qyzmeti. Kezdesý barysynda Prezıdent aǵymdaǵy jyldyń 31 tamyzynda Qarjy naryǵy men qarjy uıym­daryn retteý jáne qadaǵalaý jó­nin­degi agenttik basqarmasynda “BTA Bank” AQ-ty qaıta qury­lymdaý jospary bekitilgeni týraly habardar boldy. Prezıdent bárine atqarylǵan jumystar úshin alǵys aıtty jáne mem­leket durys strategııanyń nátı­jesinde elimizdiń bank júıesin turaq­tandyrǵanyn atap ótti, ol  búginde qalypty rejimde jumys isteýde. Jýrnalısterge arnalǵan brı­fıng­te Ulttyq Bank tóraǵasy Grı­gorıı Marchenko budan buryn, aǵymdaǵy jyldyń 1 sáýirindegi jaǵ­daı boıynsha – “Alıans-banktiń”, al aǵymdaǵy jyldyń 1 shildesindegi jaǵdaı boıynsha “Temirbanktiń” qaryzdaryn qaıta qurylymdaý aıaqtalǵanyn atap ótti. Osylaısha, barlyq úsh bank ótken jyly kóktemde bastaǵan qaıta qurylymdaý úderisin tabysty aıaqtady. Jalpy jıyntyǵynda 11 mıllıard dollarǵa jýyq qaryz esepten shyǵaryldy. Qaryzdyń qalǵan bóligi qaıta qurylymdaldy – ishinara oblıgasııaǵa, ishinara osy bankter aksııasyna konver­sııalandy. Atalǵan úsh banktiń syrtqy kredıtorlaryna syndarly ustanymdary úshin alǵys aıtýymyz kerek. Eń bastysy, tutastaı alǵanda syrtqy qaryz máselesi retteldi, – dedi G.Marchenko.