Onyń qurylys jumystaryna 11 mıllıon teńge jumsaldy. Jastardyń keshki demalys ornynyń ashylýyna aýdan ákimi Aǵzam Tastemirov qatysyp, mýzykalyq ortalyq tartý etti. Oblystyq mádenıet basqarmasynyń bastyǵy Dıdar Malaev on dombyra syılady. Búginde shalǵaıdaǵy eldi mekende bilim úıi, baılanys bólimshesi, medısınalyq pýnkt kópshilikke qyzmet kórsetedi. Taza aýyz sýmen qamtamasyz etilgen. Endi, mine aýyl jastarynyń kópten bergi tilegi oryndalyp, bos ýaqyttaryn kóńildi de mazmundy ótkizetin boldy.
О́mir ESQALI. Soltústik Qazaqstan oblysy.
ABAIDY BÁRI OQIDY, BILEDI. О́tken aptada Bilim kúni merekesimen qatar, memlekettik tildi nasıhattaý sharalary jalǵasyp jatty. Oblys ortalyǵynda ózge ult ókilderi arasynda Abaı shyǵarmalaryn oqý baıqaýy ótti. Oǵan oblys aýdandary men qalalarynan 12 talapker qatysty. Olar Abaı óleńderi men qarasózderin jáne M.Áýezovtiń “Abaı joly” romanynan úzindiler oqydy. Onda júldeli oryndy alǵandardyń barlyǵy da tildik orta jutań óńirden kelgender edi. Mysaly, qazaǵy sanaýly Denısov aýdanynan kelgen Marına Tkacheva birinshi júldeni jeńip aldy. Al Qostanaı men Rýdnyı qalalarynan qatysqan Olga Dedenko men Vıktorııa Sobotaj ekinshi, úshinshi oryndy bólisti.
Názıra JÁRIMBETOVA. QOSTANAI.
ÚZDIK TAÝARLAR BÁSEKESI. Osymen birneshe jyl qatarynan oblys kásiporyndary ózderi jasap shyǵarǵan ónimderiniń kórmesin ótkizip keledi. О́tken aptada oblys ortalyǵynda sol dástúrge saı úzdik taýarlar baıqaýy uıymdastyryldy. Al, jalpy, kórmeni jyl saıyn baqylap júrgen sarapshylar tutynýshy kóńilinen shyǵatyndaı sapaly ónimderdiń kóbeıip kele jatqanyn kórdi. Bıyl “Sút”, “Rosa”, “Azor”,“Agromır”, “Krendel” sııaqty oblystyń 34-ke jýyq kásiporny kórmege qatysty. Et, sút ónimderin óndiretin Ýspen aýdanynan kelgen “REGtaım” sharýa qojalyǵy da bar. Báriniń de shyǵarǵan ónimderi shetten kelgen taýarlardan bir kem emes, sapaly ári baǵasy arzan. Kórmege qatysýshylar dıplomdarmen marapattaldy. Jeńimpaz atanǵan úzdik taýarlar endi Astanada baq synaıtyn bolady.
Farıda BYQAI. PAVLODAR.
QORǴALJYŃDAǴY “QYMYZMURYNDYQ”. Aýdan ortalyǵynda ótken aýyl sharýashylyǵy ónimderiniń dástúrli jármeńkesinde jurtshylyq alǵash ret “Qymyzmuryndyq” baıqaýynyń kýási boldy. Salt-dástúrimizdi jańǵyrtqan merekege barlyq aýyldyq okrýgterdiń ókilderi qatysty. Jınalǵan qaýym sórelerge qoıylǵan saýmal, qunan, besti, túnemel, dónen, sary, jýas, taǵy basqa qymyzdardan aýyz tıip, óz baǵalaryn berdi. Qymyz baptaýshylar sýsynnyń emdik qasıeti men quramy, onyń halqymyz úshin alar orny men mańyzy jaıly áńgimeledi. Arnaıy komıssııanyń sheshimimen Shalqar, Keńbıdaıyq, Ekpindi aýyldyq okrýgteri júldegerler sanatynan kórinse, shalqarlyq Qaırat Baımuqanov 5 lıtr qymyzdy simirip, kópshilik qoshemetine bólendi.
Baqbergen AMALBEK. Aqmola oblysy.
JAPON MÁDENIETINIŃ KÚNI О́TKIZILDI. Semeı – aıshylyq alys jerdegi Hırosıma jáne Nagasakı qalalarymen muńy da, syry da bir baýyrlas qala. Sondyqtan da bolar, ondaǵylar polıgon taqyrybyna arnalǵan Semeıdegi sharalardan tys qalǵan emes. Jýyrda osyndaǵy medısına ýnıversıtetinde “Ekologııa. Radıologııa. Densaýlyq” degen atpen ótkizilgen halyqaralyq konferensııaǵa Japonııadan da ókilder keldi. Osy konferensııa jumysy aralyǵynda № 8 balalar úıinde japon mádenıetiniń kúni ótkizildi. Balalar úıiniń jetkinshekteri japon halqynyń salt-dástúri men ádet-ǵurpyna arnalǵan vıktorına oıynyna zor belsendilikpen qatysty. Vıktorına jeńimpazdary arnaıy syılyqtarmen marapattaldy.
Dáýlet SEISENULY. SEMEI.
SAIаHATShYLARDY TARTÝ ÚShIN. Búginde el-eldi tanýda, tarıhı eskertkishterimen kózbe-kóz tanysýda, turǵylyqty halyq ádet-ǵuryptaryn qyzyqtaýda ekotýrızmniń múmkindigi zor. Osy sebepti ony qalaýshylar ulǵaıyp kele jatqandyǵy málim. Bul saıahat túrin unatýshylar, ásirese, jeri keń, ulttyq erekshelikteri saqtalǵan, ósimdikter, janýarlar dúnıesi baı Qazaqstan sııaqty elderdi kórýge qushtar. Qaraǵandyda ótken “Qazaqstanda ekotýrızmdi damytý” taqyrybyndaǵy halyqaralyq konferensııada osy másele jóninde sóz qozǵaldy. Oǵan qatysýshylar osy baǵytta memlekettik jáne qoǵamdyq uıymdar arasyndaǵy sharalardy birlestirip, iske asyrýdyń joldaryn talqylady.
Aıqyn NESIPBAI. QARAǴANDY.
QALA MEREKESINE ARNALǴAN ShARA. О́skemenniń 290 jyldyǵy qarsańynda teńiz deńgeıinen 522 metr bıiktikte jelbiregen jalaýǵa jyldam jetken 11 men 72 jas aralyǵyndaǵy azamattar bul tabystaryn týǵan qalalarynyń qurmetine arnady. Qala ákimi Islam Ábishev buqaralyq sporttyń damýyna úles qosyp júrgen jany jaısań jandarǵa baǵaly syılyqtar men gramotalar tabys etti. “Qazaqstan” degen jazýy bar alyp týdyń janynda eskertkish sýretke tústi. Islam Álmahanuly bolashaqta Abylaı ketken taýynyń shyńyndaǵy jalaý men bókterde, “Qazaqstan” degen jazýy bar jerde túnde jaryq bolatynyn, taýǵa shyǵamyn deýshilerge avtokólik joly salynatynyn, jaıaýlar úshin baspaldaqtar ornatylatynyn aıtty.
Ońdasyn ELÝBAI О́SKEMEN.
