“Caspionet” – jańa format, jańa sapa mejesi

“Kim de kim aqparatty ıgerse, kúlli álem so­nyń qolynda bolady” degen támsil sońǵy ýa­qyt­tar­da, ásirese, HHI ǵasyrǵa aıaq basqaly óte jıi aı­­ty­­l­yp júr. Shynymen de solaı ekeni anyq. Bú­ginde aqparat rynoktaǵy eń bir ótimdi taýar­lardyń qataryna jatqyzyla bastady. Ár memle­kette aq­parat satýmen kún kóretinderdiń sany da artyp keledi. Aqparat – jýrnalısterdiń kez kelgen shyǵarmashylyq ónim óndirýindegi negizgi shıkizat kózi bolyp tabylǵany qashan. Alaıda búginde aqparat ol tek BAQ-tyń ǵana emes, jer betindegi barlyq sala qyzmetkeriniń, odan qala berdi barlyq adamzattyń negizgi azyǵyna aınaldy. Aqparatsyz ómir súrýdiń máni de, sáni de bolmaıtynyn óz-ózimizge dáleldep te úlgergen tárizdimiz. Uzyn sózdiń qysqasy, budan bylaı aqparatsyz álem alǵa júrmeıdi, damymaıdy. Aqparat óte qýatty qarý ekenin jaqsy bile­miz. Aqparattyq shabýyldar arqyly kúırep, kúl talqany shyǵyp jatqan kásiporyndy da, fırma­ny da, tipti eldi de kórip júrmiz. Sondyqtan da aq­parattyq qaýipsizdik jónindegi qorǵanystar búginde meılinshe kúsheıtilip keledi. Aqparat ar­qy­ly sanany ýlaý, ustanymdy burmalaý, ult pen memleket bolashaǵyna qaýip tóndirý saıasat­tary ashyq ta, astyrtyn da júrgiziletini besene­den belgili. Sol sebepti de teris pıǵyldy áreket­terdiń el múddesine nuqsan keltirmeý kerektigin jaqsy túsinýimiz kerek. Sonymen qatar, otandyq aqparat keńistiginiń qorǵanysyn anaǵurlym kúsheıte túskenimiz abzal. Bul baǵyttaǵy jumys­tyń eń bir salmaqty tusy elimizdegi telearna­lardyń moıyn­daryna júkteletindigi aıtpasa da túsinikti. Otandyq aqparat keńistigindegi telearnalar ishinde ózindik orny bar, shyǵarmashylyq ujy­my­men de erekshe kózge túse bilgen telearnanyń biri – “Caspionet” Qazaqstan Respýblıkasynyń alǵashqy ulttyq ǵaryshtyq arnasy. Osydan 8 jyl buryn, naqtyraq aıtsaq, 2002 jyly 25 qazan kúni resmı túrde óz jumysyn bastaǵan bul arna jaqynda jańa formatqa kóship, shyǵar­ma­shy­lyq qorjynyn birneshe jańa baǵdarlamalar­men, sonyń ishinde ulttylyǵymyzdy kóp dárip­teıtin, eldigimizdi eseleı eskeretin baǵdarmalar­men tolyqtyrdy. Mundaı jańa qadamdarǵa aqparat salasyndaǵy áriptesteri retinde de, buqaralyq kórermen retinde de ájeptáýir marqaıyp qaldyq. Sársenbiniń sátinde atalmysh arna ujymy úzeńgiles áriptesterin shaqyryp, jańa baǵdarla­ma­larymen tanystyrdy. Arnanyń jańa maý­symyna qutty bolsyn aıtýǵa BAQ ókilderinen basqa Aqparat jáne baılanys mınıstri Asqar Jumaǵalıev te, elimizdiń dıplomatııa korpýsy­nyń ókilderi de keldi. Aqparat jáne baılanys mınıstrliginiń tap­syr­masymen jańa baǵyttardy baǵamdaǵan “Caspionet” búginde Eýropa, Ortalyq Azııa, Kav­kaz, Taıaý Shyǵys, Afrıkanyń ortalyq shyǵys já­ne soltústik bóligindegi elderge habar taratady. 99 mıllıondaı kórermeni bar bul arna táýlik boıy qazaq, orys jáne aǵylshyn tilderinde ha­bardy efırge shyǵarady. Bir eskere ketetin nár­se, “Caspionet” arnasy habar taratýdyń 50 pa­ıy­zyn jańalyqtarǵa bólgen. Oǵan bıznes-jańa­lyq­tar, aýa raıy jáne sport toptamasy jatqy­zylady. Osyǵan deıin málim bolǵandaı, atalmysh arna sheteldikterge, ózge memleketterde turyp jatqan qandastarymyzǵa elimizde bolyp jatqan eń sońǵy jańalyqtar men ulttyq qundylyqtardy dáripteıtin tolyqqandy aqparat berý syndy maqsattaryn óz deńgeıinde oryndap keledi. Sonymen, “Caspionet”-ke qandaı jańa baǵ­dar­la­malar engizilip otyr? “ATAMEKEN” dep atala­tyn baǵdarlama ulttyq ádet-ǵuryptan, halqymyz­dyń kóne mádenıetinen, sondaı-aq sheteldegi qazaq qandastarymyzdyń turmys-tirshilikterinen habardar etedi. “STEPPR TALES” – sheteldiktiń Qazaq­stanǵa kózqarasy turǵysynda daıyndalatyn baǵdarlama. Iаǵnı, elimizdiń barlyq óńirlerine saıahat jasaý arqyly halqymyzdyń salt-dástúri­nen, rýhanı ómirinen, tarıhynan syr shertetin baǵdarlama. Bul 5 jyldan beri Caspionette jumys istep kelgen Djonatan Nıýelldiń avtorlyq baǵ­darlamasy bolyp tabylady. Tusaýy kesilgen kelesi jańa baǵdarlama “PERSONA GRATA” dep atalady. Munda sheteldik dıplomattarmen júr­gizilgen beıresmı suhbattar, olardyń otbasy, saıasattan tys ómiri jaıly baıandalady. Al “THE REAL ECONOMY” baǵdarlamasy asa mańyzdy eko­no­mı­ka­lyq jańalyqtardy taldaý, ındýstrııa­lyq-ınnovasııalyq jobalardy iske asyrý barysy, iri sheteldik ınvestorlarmen suhbat syndy baǵytta kórermendermen júzdesip turady. “LIMITLESS SCIENCE” qazaqstandyq ǵalymdardyń aldyńǵy qatarly jańalyqtaryn, olardy naqty júzege asyrý jaıyn baıandaıdy. Qazaqtyń ulttyq qolóneri, ata-baba dástúrin jalǵastyryp júrgen sheberler men ulttyq mýzyka aspaptaryn jasaý óneri, olardyń sıqyrly sazyn dáripteıtin baǵdarlamalar “MASTERS OF CREATIVITY”, “SOUNDS OG NOMAD” dep atalady. “Caspionet” ulttyq jer serigindik arnasynyń dırektory Aıgúl Jumabaevanyń: “Aqparat­tyqtan birtindep aqparattyq-tanymdyq format­qa kóship otyrmyz. Efırde Qazaqstan halqy, ádet-ǵurpy, má­denıeti jóninde, jalpy elimizge qatysty ta­nym­dyq, qyzyqty baǵdarlamalar kó­beıe tústi. Bar­lyq baǵdarlamalar Qazaqstandy ár qyrynan tanytady. Bir jaǵynan Qazaqstanǵa týrısterdiń kóptep kelýine de septigin tıgizedi. Jańalyqtarda da ózgerister bar, aqparattar jıi jańartylyp tu­ra­tyn boldy. Munymen qosa, “Habar”, “El ar­na”, “Qazaqstan” telearnalary­nyń úzdik habar­laryn efırden kórsetip tura­myz”, – dep aıtqa­nyna qaraǵanda, tyń ıdeıalar jańa ózgeristermen qatar, jańa sapany da alyp keletinine esh kúmán joqtaı. Áriptesterimizdiń jańa bastamalaryna shyǵarmashylyq tabys tileı otyryp, kórermen­deri kóbeıe tússin degen aq nıetimizdi bildirgimiz keledi. Araı ÚIRENIShBEKQYZY.