Usynylǵan 220 jumys ornynyń 161-i ıesin tapty. Bólimniń esebi boıynsha, tamyz aıyna deıin 3489 jumyssyz tirkelse, endi onyń 2347-si jumysqa ornalasqan. Buǵan qosa 455 adamǵa qoǵamdyq aqyly jumys usynylyp, 85-i kásibı oqýǵa joldama alǵan. Elbasynyń tikeleı baqylaýyndaǵy “Jol kartasy” baǵdarlamasy boıynsha 700-den astam jas taǵylymdamadan ótkizýge jiberilipti. Sóıtip, aýdanda osyndaı naqty jumystar jasalyp jatyr.
Baqtııar TAIJAN, Ońtústik Qazaqstan oblysy.
On altynshy bank otaý tikti. Oblysta ekinshi deńgeıli bank bólimsheleriniń sany kóbeıip, 16-ǵa jetti. Onyń ashylý saltanatyna aımaq basshysy Serik Bilálov qatysyp, jańa ujymǵa tabys tiledi. Ol óz sózinde 7 aıda oblys ekonomıkasyna 25 mıllıard teńge ınvestısııa quıylǵanyn, munyń ótken jylǵa qaraǵanda 14 paıyzǵa kóp ekenin atap ótti. Kommersııalyq bankter tarapynan berilgen nesıeler mólsheri 28 mıllıard teńgege jetken. Sonyń nátıjesinde bıyl josparlanǵan ınvestısııalyq jobalardyń 6-ýy júzege asqan. “Delta Bank” AQ basqarma tóraǵasynyń orynbasary Inessa Kım bank aktıviniń 42 mıllıard teńgeni quraıtynyn, elimizde 11 fılıal jumys isteıtinin jetkizdi. Ulttyq Bank oblystyq bólimshesiniń dırektory Jomart Qajyrahymov kádesyı jasady.
О́mir ESQALI, Soltústik Qazaqstan oblysy.
Jarqyn... kóz jasyna senbeıdi. Jambyl oblysyna qarasty Sarysý aýdanynyń Aqtoǵaı aýylynda dúnıege kelip, keıin Almatydaǵy Abaı atyndaǵy pedagogıkalyq ınstıtýtty bitirgen Jarqyn О́teshova sońǵy 20 jyldan beri Máskeý qalasynda turady. О́tken aptada ol týǵan jerine kelip qaıtty. Biraq qurqol emes, jyldar boıy júregin túrtkilegen sezimderin jyrǵa aınaldyryp, “Máskeý: ómir ózen” degen kitapqa syıǵyzyp ákelgen. – Áýeli ózimizdiń Aqtaý qalasynda muǵalim boldym, al Máskeýge aýysqannan keıin sondaǵy “Qazaq tili” qoǵamdyq qorynda qyzmet ettim. Qazir qor tóraǵasynyń orynbasarymyn, bos ýaqytta jyr jazamyn, – dedi ol “Nur Otan” HDP oblystyq fılıalynda jáne Taraz memlekettik ýnıversıtetindegi jyr-suhbatqa arqaý bolǵan ǵıbratty kezdesýlerinde. Halqymyzda “qyz bala eń bolmaǵanda bir at dorba jemge jaraıdy” degen sóz bar. Al J.О́teshova bolsa, irgeli eki memlekettiń arasyna dáneker bolyp, eldik máni bar úlken isterge muryndyq bolyp júr.
Kósemáli SÁTTIBAIULY, Jambyl oblysy.
Salamatty ómir salty úshin. О́tken aptada oblys ortalyǵynda oblystyq ákimdiktiń qoldaýymen “Durys tamaqtan. Sportpen shuǵyldan” atty uranmen densaýlyq festıvali uıymdastyryldy. Festıvalǵa oqýshylar, stýdentter, sportqumar qala turǵyndary qatysty. Sport mektepteriniń oqýshylary, bıshiler jáne kórkemónerpazdar ujymdary óner kórsetti. Jaıaý júgiris marafony ótti. Jasóspirimderdi, jastardy sporttyq seksııalarǵa shaqyrý maqsatynda kórmeler, densaýlyq shyńdaýǵa arnalǵan sporttyq taýarlar jármeńkesi boldy. Dárigerler keńester berdi.Salamatty ómir saltyn qalyptastyrý jaıynda tanymdyq kitapshalar tegin taratyldy. Senbi kúni aýdandar ortalyqtarynda, aýyldarda sport túrlerinen jarystar uıymdastyryldy. Pavlodardaǵy ortalyq alańda, stadıondar men parkterde demalys ýaqyty otbasylyq densaýlyq festıvali retinde atalyp ótti.
Farıda BYQAI, PAVLODAR.
Baıypty baıqaý jarııalandy. “Nur Otan” halyqtyq-demokratııalyq partııasy oblystyq fılıalynyń memlekettik tilge degen kózqarasyn “bárekeldi” dep qabyldaýǵa bolady. Árdaıym ıgilikti isterge uıytqy bolyp júretin fılıal “Tilge – qurmet, elge – qurmet” taqyrybynda baıqaý jarııalap, onyń erejesin bekitkenin jurtshylyq jyly qabyldady. Baıqaýda bes nomınasııa boıynsha buqaralyq aqparat quraldary ókilderiniń úzdik shyǵarmalary men ınternet-resýrstar arqyly memlekettik tildiń qoldanys aıasyn keńeıtýge, tanymdyq fılm, oqýlyqtar, kitap, mádenı-kópshilik jáne basqa jobalarǵa qomaqty júldeler taǵaıyndaldy. Usynylatyn materıaldardyń mańyzdylyǵyna, aqparattardyń bezendirilýine talap joǵary ekendigi jarııa etildi.
Kúmisjan Baıjan, Almaty oblysy.
Saqshylardyń janashyrlyǵy. Qaladaǵy Zaton polısııa bólimi memlekettik tildi damytýǵa kópten beri kóńil bólip keledi. Munda is qaǵazdaryn júrgizý memlekettik tilge kóshirile bastaǵanyna da biraz ýaqyt bolyp qaldy. Osyndaı ońdy talpynys nátıjesinde osyndaǵy basqa ult ókilderi de qazaq tilinde sóıleı bastady. Biraq, bir qýanarlyq jáıt sol, bólim barǵa qanaǵat jasap otyrǵan joq. Sonyń aıǵaǵyndaı jýyrda munda memlekettik til jaǵdaıyna arnalǵan dóńgelek ústel ótkizilip, naqty sharalar qabyldandy. Tártip saqshylarynyń bul ıgi qadamyn tek quptaǵan jón.
Dáýlet SEISENULY, SEMEI.
Munaıshylar qaıyrymdylyǵy. Oblystyq balalardyń quqyǵyn qorǵaý departamentiniń tapsyrmasymen “Torǵaı Petroleým” aksıonerlik qoǵamy turmysy tómen otbasylarynyń 36 balasyna kıimder úlestirip, aq dastarqan jaıdy. “Torǵaı Petroleým” AQ-tyń atqarýshy dırektory Saǵıt Altynbekov jas órkenderdi jańa oqý jylymen shyn júrekten quttyqtap, syı-sııapat usyndy. Al oqýshylar munaıshylarǵa án men bıden shashý shashyp, sábılik sezimderin jetkizdi. Sondaı-aq “Otanymyz – Qazaqstan” taqyrybynda sýretter salyp, munaıshylarǵa tartý etti. Balalardyń týyndylary kompanııanyń muraǵatynda saqtalatyn bolmaq.
Erkin ÁBIL, Qyzylorda.
