Qyrǵyzstanda qyrkúıektiń 10-ynda, parlament saılaýyna týra bir aı qalǵanda saılaý naýqany bastaldy. Parlamenttegi 120 oryn úshin 29 partııa kúreske shyqty. Olar barlyq qujattaryn tapsyryp, tirkelgender. Al 100-den asa partııa tirkele almaı qaldy. Tirkelgen partııalarǵa ózderin nasıhattaý úshin jınalystar ótkizýge, mıtıngiler, sherýler uıymdastyrýǵa ruqsat etilgen. Teledıdar, gazet-jýrnaldar arqyly júrgiziletin nasıhat óz aldyna. Onsyz da belsendiligimen erekshe kózge túsip júrgen qyrǵyz aǵaıyndar saılaý naýqanynda shekten shyǵyp ketpese eken deısiń.
Iranda ýran bar
Bolǵanda, úsh atom bombasyn jasaýǵa jetedi eken. Bir bomba da jarylmasyn deımiz ǵoı. Jarylsa, onyń qasireti qandaı bolatyny belgili. Álemde mundaı bombalar kóp. Áńgime mundaı qarýdyń Iran sııaqty eldiń qolyna túsýinde bolyp otyr. MAGATE-niń jasyryn baıandamasynda bul elde tómen baıytylǵan 2,8 tonna ýran bar ekeni aıtylǵan. Endi sony 90 paıyzǵa deıin baıytatyn bolsa, odan úsh bomba jasaýǵa bolady. Muny MAGATE-niń prezıdenti Iýkıo Amanonyń ózi aıtyp otyr. Qaýip qylǵannan aıtady, árıne.
ETA raıynan qaıtty
Ispanııadaǵy basktardyń táýelsizdigin uzaq ýaqyt talap etip kele jatqan ETA ekstremıstik toby ózderiniń qarýly kúresin toqtatatynyn málimdedi. Muny álem jurtshylyǵy oń qadam retinde qabyldady. Ásirese, muny ekonomıkalyq daǵdarystan aıtarlyqtaı kúızelip otyrǵan Ispanııa úkimeti oń qabyldady deýge bolady.
Belgııa bóline me?
Eýropadaǵy osynaý shaǵyn ǵana, biraq joǵary damyǵan eldiń bólinýi, tipti bireýlershe aıtqanda, joıylýy múmkin emesteı. Biraq eldiń tildik quramyna qaraı bóliný qaýpi kúshti. Munda halyq eki toptan turady: flamandtar (60 paıyz) jáne vallondar (40 paıyz). Aralarynda únemi tartys bar. Kúshtirek damyǵan Flandrııa aımaǵy árkez jeke memleket qurýdy talap etedi. Parlamentte osylaısha shaıqasyp jatady. Sarapshylardyń paıymdaýynsha, olar bólinbeı tynbaıtyndaı.
Tóńkeris nege kerek?
ITAR-TASS-tyń habaryna qaraǵanda, Ortalyq Afrıka Respýblıkasynda Slovakııanyń 12 azamaty osynda memlekettik tóńkeris jasaý áreketi úshin aıyppen qamaýǵa alynypty. Olar el astanasy Bangıden 600 shaqyrym jerde qarý-jaraqtyń úlken qoryn alyp jatqan kezde ustalǵan kórinedi. Árıne, ustaǵandardyń óz dáleli bar shyǵar, biraq Eýropanyń ortasyndaǵy shaǵyn eldiń azamattaryna Afrıkadaǵy elde tóńkeris jasaý nege kerek degen suraq týyndaıdy.
Premerdi óltirgen kim?
Lıvannyń premer-mınıstri Saad Harırı óziniń ákesi, eldiń burynǵy premer-mınıstri Rafık Harırıdiń qazasyna Sırııanyń qatysy joq eken, bulaı tujyrym jasaý qatelik eken degen málimdeme jasady jáne aldaǵy ýaqytta Damaskimen qarym-qatynasty jaqsartý nıetin bildirdi. Rafık Harırı osydan bes jyl buryn Beırýttiń ortalyǵyndaǵy kúshti jarylystan qaza tapqan. Ony uıymdastyrǵan Sırııa úkimeti delinip kelgen. Al endi shyn máninde bul lańkestik aktini uıymdastyrǵan kim degende, endi biraz adam osy eldegi “Hesbollah” uıymyna kúdik bildiredi.
Syǵandarǵa arasha
Fransııa úkimetiniń eldiń tynyshyn alyp otyrǵan syǵandardy elden qýyp, týǵan otandary sanalatyn Bolgarııa men Rýmynııaǵa qaıtarý jóninde qatqyl sharalar belgileýine qarsylar da barshylyq. Eýroparlament depýtattary Fransııa úkimetinen syǵandardy qýýdy toqtatýdy talap etti. Buǵan baılanysty sheshimdi 337 depýtat qoldap, 245 depýtat qarsy boldy. Búginge deıin Fransııa úkimeti elden 600 syǵandy qýyp úlgergen bolatyn.
Maqtanýdyń shegi joq
Birikken Arab Ámirlikteri úkimetiniń basshysy, Dýbaıdyń bıleýshisi Muhammed ben Rashıd ál-Mahtým álemdegi eń uzyn jeke menshik kemeniń ıesi bolýdy maqsat etip otyr. Soǵan oraı óziniń “Dýbaı” dep atalatyn ıahtasyna qosymsha radar ornatý arqyly búginge deıin eń uzyn sanalyp kelgen orys olıgarhy Roman Abramovıchtiń 162,5 metrlik ıahtasynan asyp túspek. Osyǵan qarap, bul básekeniń, maqtanýdyń shegi joq shyǵar dep oılaısyń.
Ázirlegen Mamadııar JAQYP.
