О́rtten zardap shekkenderge kómek

Munyń aldyndaǵy habarymyzda 8  qyrkúıek kúni  qatty soqqan jelden Sharbaqty jáne Lebıaji aýdandaryna qarasty orman sharýashylyqtary qy­zyl órtke oranyp, 6  adam qaza bol­ǵanyn,  Jabaǵyly, Beıimbet, Kókjal aýyldarynyń  turǵyndary kórshiles Begen, Tósaǵash aýyldaryna ýaqytsha kó­shirilgenin jazǵan edik. Qazir órt­ten qorqyp qashqan turǵyndar aýyl­daryna oraldy. Jaǵdaı tynyshtaldy. Ormannyń irgesinde otyrǵan aýyl­dar­da bolsyn, orman sharýashy­lyq­tarynda bolsyn órtke qarsy durys tehnıka, qural-jabdyqtardyń bol­maýy apattan qorǵana almaýdyń taǵy bir sebebi, jyl saıyn orman úshin qanshama qarajat bólinedi, olar qaı­da ketedi degen osy jerde taǵy da zańdy suraq týyndaıdy. Árıne, órtten keıingi úr­pıi­sip, úrkip qalǵan aýyl­­dyń jaǵdaıy  belgili. Kúnde kórip aralasyp júrgen kórshileri, aýyldastary  qaza boldy. Osydan bir aı buryn shalǵaıda jatqan osy Ja­baǵyly, Shoqtal, Merǵalym aýyl­daryna oblys ákimi Baqytjan Sa­ǵyn­taev kelip, eldiń jaǵdaıymen tany­syp qaıtqan bolatyn. Aýylda oryn alǵan áleýmettik jaǵdaılarǵa kóńili tolmaı, “alystaǵy  bolashaǵy joq dep biz dalaǵa qaldyra almaı­myz, on úı bolsa da bizden qamqor­lyq kútedi, on úı otyrsa da eldiń bir buryshyn saqtap otyr” dep jergilikti ákim-qaralardy syn tezine alǵan edi. Ile, eldiń jaǵdaıyna nazar aýdara qoımaǵan  ákim-qaralardy oblys­tyq ákimdiktiń úlken zalyna jınap, aýyl — qazaqtyń altyn besigi, sol qazyqty myqtap ustaý, saqtaý — sen­der­diń qoldaryńda dep taǵy da tap­syr­malar berildi. Amal qansha, onsyz da “bola­shaǵy joq” dep aıdar taǵy­lyp kózden tasa, kóńilden shet qalyp júrgende aýyldarǵa orman órti qaıta aı­na­lyp soqty. Oqystan kelgen órt  maldy da, jandy da  aıaǵan joq, adam shy­ǵynymen qatar, aýyldyń 10 iri qara maly, bir jylqysy janyp ketken. Orman órti oryn alǵan aýmaqqa Tótenshe jaǵdaılar mınıstri Vla­dı­mır Bojko jáne oblys ákimi Baqyt­jan Saǵyntaev  sol kúni-aq kelip jetip, qıyndyqta qaıda bararlaryn bilmeı abdyrap qalǵan aýyl halqy­men birge boldy. Sol jerde jedel túrde órtti aýyzdyqtaý jáne turǵyn­dar­dyń qaýipsizdigin qamtamasyz etý jónindegi  shtab quryldy. Barlyq teh­nıkalar jumylyp, ushaqtar kelip, órtti sóndirýge áskerıler, quqyq qorǵaý oryndary, tótenshe jaǵdaı, órt sóndirý qyzmetteriniń jáne jer­gi­likti ákimdikter tarapynan búkil kúsh-qýattar jumyldyryldy. Astana­dan osy salaǵa qatysy bar mınıstr­lik ókilderi de kelip jetti. Lebıaji aýdandyq aýrýhanasynda oblystyq densaýlyq saqtaý basqarmasy tarapynan barǵan jedel sanıtarlyq brıgadalar órtke kúıip jaralanǵan  ormanshylarǵa, aýyl adamdaryna kúni-túni kómek jasady. Qapyda qaza tapqan adamdardyń otbasylaryna oblys ákimi Baqytjan Saǵyntaevtyń tapsyrmasy boıynsha oblystyq ákimdik 6 mıllıon teńge qarajat bóldi. Ár otbasyna 1 mıl­lıon teńgeden. Marqumdardy sońǵy saparǵa shyǵaryp, jerleý rásim­deri­niń shyǵyndaryn da jergilikti at­qa­rýshy bılik oryndary jáne “Ertis ormany” rezervaty ákimshiligi  óz moı­yndaryna aldy. Lebıaji aýdany­nyń ákimi Serik Ápsalyqovtyń aı­týyn­sha, qazir órtten japa shekken aýyldarǵa jan-jaqtan kómek ke­lý­de. Qys bolsa jaqyndap qaldy. Aýyldardyń maıa-maıa úıgen shópteri janyp ketipti. Ár úıde 30-40 mal bar, qazir  mal qoralary jem-shópsiz qal­ǵan  úılerge shóp jetkizilýde. Oblys aýdandary Jabaǵyly men Beıimbet aýyldaryna jan-jaqtan kómek qolda­ryn sozýda. Al ormandy órtten qorǵap qalamyz dep arpalysqa túsken or­manshylar elimizdiń joǵary marapat­taýlaryna usynylatyn bolady. Farıda BYQAI, Pavlodar oblysy.