Oıy da, boıy da sergek

Soltústikqazaqstandyq bankırler jyldyń tórt mezgilinde sport spartakıadalaryn ótkizýdi dástúrge aınaldyrǵan. Qyzyljar óńiri bank qyzmet­kerleriniń salamatty ómir súrý sal­tyn sportpen tyǵyz baılanys­tyrǵanyna 15 jyldan asty. Osy bir jaqsy dástúr Ulttyq banki Soltústik Qazaqstan jergilikti fı­lıalynyń dırektory Jomart Qajyrahymovtyń oblystyq mını-fýtbol federasııasyna tóraǵa bolyp saılanýynan bastaldy. Ol birde osy sport túrinen bankırler arasynda jarys ótkizýge bekindi. Al­­ǵashqy týrnırdi ózi jetekshilik etetin ujymda uıymdastyrdy. Kóp­­­­­shiliktiń qyzyǵýshylyǵy kút­­ken­degiden de asyp tústi. Sóıtip ıgi­­­­likti shara basqa bank bólim­sheleri arasynda keńinen qanat jaıdy. Bankır qyzdar da dop te­býdi úırenip, jarys kórigin qyz­dy­ratyn boldy. Barlyq jastaǵy bankırlerdiń sportpen shuǵyldaný­yn kózdegen Jomart endi áripte­s­­­terimen birlese otyryp sporttyń basqa túrlerin de jandandyrýǵa bel sheshe kiristi. Buqaralyq-sporttyq qozǵalysty damytýdyń is-shara­la­ryn jasap, mını-fýtboldan basqa shańǵy, voleıbol, jeńil atletıka túrleri engizildi. Sodan beri jyl­dyń tórt mezgiline yńǵaılasty­ryl­ǵan sporttyq spartakıadalar on jyldan beri úzbeı jalǵasyp keledi. Budan tysqary shahmat, doıby, ústel tennısi, basketboldan da týrnırler ótkizilip turady. Bıyl sporttyq spartakıadalar­dyń qaı-qaısysyna bolsyn ekinshi dárejeli bankterdiń 17 fılıaly­nan 400-den astam adam qatysyp, shyn mánindegi buqaralyq is-sha­raǵa aınaldy. Sóz arasynda mı­nı­fýtboldyń asa tartysty ótkenin aı­ta ketken jón. Jomart jetek­shi­lik etetin ujym óz tarıhynda tuńǵysh ret chempıon atanyp, únemi báıge tórin bermeıtin “Halyqtyq bank, Qazkommersbank” syndy bank fılıaldaryn jer qaptyrdy. Dmıtrıı Sygankov qarsylastar qaqpasyna 24 gol soǵyp, “Eń úzdik shabýylshy” ataǵyn jeńip aldy. – Elbasy deni saý ult – jal­py­ulttyq mindet ekenin atap kór­setken bolatyn. Ol talaptardy jú­zege asyrý ár otbasydan, ár uj­­ym­nan bastaý alary anyq. Salamatty ómir súrýge daǵdylanǵan adamdar boı­laryn árkez sergek ustaıdy, jaman ádetterden aýlaq bolady. Ja­syratyny joq, adamnyń den­saý­lyǵy óz qolynda ekenin kóp jaǵ­daıda eskere bermeımiz. “Sa­lamatty Qazaqstan” memlekettik baǵdarlamasynyń qabyldanýy ana men balanyń densaýlyǵyn jaq­sartý, jalpy ólim men asa qaýipti aýrýlardy boldyrmaý, aldyn alý, adamnyń ómir jasyn uzartý, de­mo­grafııalyq ahýaldy jaqsartý s­e­kildi óte mańyzdy maqsattardan tý­ǵan. Biz de osynaý memlekettik má­selege óz úlesimizdi qosýdy pa­ryz sa­naımyz, – deıdi sportty óm­ir­lik serik etken oblystyń bas bankıri. Bul jolǵy spartakıada “sport padıshasy” – jeńil atletıkaǵa ar­naldy. Ol “Qus joly” respýblı­kalyq qaıyrymdylyq qorynyń demeýshiligimen, “Qazkommers­banktiń” jergilikti bólimshesiniń /dırektor Erlan Qojabergenov/ uıymdastyrýymen joǵary deńgeıde ótti. Bankırler estafetaǵa, túrli qashyqtyqtarǵa júgirip, uzyndyqqa sekirip, gir kóterip kúsh synasty. Inna Kýrılo (“Sentrkredıt”) 60, 400 metr qashyqtyqqa júgirýde, uzyndyqqa sekirýde aldyna jan salmady. Erler arasynda Evgenıı Sızıkov / (“Kaspıı bank”), Dmıt­rıı Sygankov (“Ulttyq bank”) jarqyrap kózge tústi. Jalpykomandalyq esepte “Sentrkredıbanktiń” Petropavl­daǵy bólimshesi (dırektor Rınat Qojahmetov) birinshi oryndy jeńip aldy. Ol óz júldesin (noýtbýk) respýblıkalyq “Egemen Qazaqstan” ga­zetiniń oblystaǵy tilshiler qo­synyna syılady. Biz bul qurmetti “Otanymyzdyń bas gazetine” kór­setilgen iltıpat jáne de gazeti­mizdiń turaqty oqyrmany ári ja­nashyry J. Qajyrahymovtyń be­deli dep dep uqtyq. Sońǵy jyl­da­ry gazetimizdi bankırlerdiń jaz­dyr­­typ alý qara­­synyń molaıa túskeni baıqalady. Jomart Oral­ulynyń ózi birneshe jyldan beri kóp balaly otbasy­lar­dy, eńbek ardagerlerin “Egemenge” tegin jazdyrtyp keledi. – Elbasy óz Joldaýynda 30 paıyzǵa deıingi qazaqstandyqtardy buqaralyq sportqa tartý mindetin qoıdy. Bankırler arasynda ekiniń biri sporttyq sharalardan tys qalmaıdy. Búgingi jarys – sonyń jarqyn kýási, – deıdi jarystyń basty uıymdastyrýshysy, oraza ustap, ımandylyqqa bet burǵan Erlan О́serbaıuly. Soltústikqazaqstandyq bankır­ler­­di El Táýelsizdigi merekesi qarsańynda ótetin taǵy bir spar­ta­kıada tosyp tur. Ony uıymdastyrý “Sesnabanktiń” jergilikti bólim­she­sine (dırektory Qulbek Shopa­­nov) júkteldi. О́mir ESQALI, Soltústik Qazaqstan oblysy.