Jastar saıasaty

Ony kadr saıasatynan bólip qaraýǵa bolmaıdy. О́ıtkeni, erteńin oılaıtyn memleket qashanda jastardyń jolyn ashady Almaty oblysynda jyl saıyn jastar forýmy uıymdastyrylady. Qarasań kóziń qýanady. Tuńǵysh Prezıdentimiz, Kóshbasshy Nursultan Nazarbaevtyń usynǵan saıasatyn qoldaǵan órimdeı jastar Qazaqstannyń rámizderin ustap, ánuran aıtyp, alaýlatyp alańǵa shyqqanda eriksiz súısinesiń. Uıymdastyrý jóninen bir aýdan bir aýdannan asyp túsedi. Ásirese, Raıymbek aýdanynda ótken jastar forýmy ǵalamat boldy. Ony teledıdardan kórdim. Sonyń ózinde jas jetkinshekterimizdiń Elbasyna degen súıispenshiligin, týǵan eli men jerine degen asqaq patrıottyq sezimderin jan dúnıemmen uqqandaı keremet kúı keshtim. Osyndaı jastar forýmy Alakól aýdanynda da ótti. Forýmda Almaty oblysy ishki saıasat departamentiniń bastyǵy G. Súleımenova: “Biz jastar saıasatyn durys jolǵa qoıǵan sııaqtymyz. О́ıtkeni, Jambyl oblysyndaǵy áriptesterimiz biz iske asyryp jatqan “Jastar forýmyn” óz oblystarynda da is júzine asyrǵysy keletindeı nıet tanytty”, – dedi. Bir qaraǵanda, syrtqy kelbeti Keńes ókimeti ustanǵan tıptik formaǵa uqsaǵanymen, Almaty oblysynyń ishki saıasat departamenti júrgizip otyrǵan jastar saıasaty durys kórindi. Ishki mazmuny syrtqy kelbetimen shynaıy úılesetin bolsa odan artyq qandaı saıasat júrgizýimiz kerek?! Alaıda, aýdandarda dúrkirep ótken osy forýmdarǵa jumyspen qamtylmaǵan jas­tarymyz tolyq qamtylmaı ma, dep oılap qa­lamyn keıde. Sebebi, 2008 jyly Balqash aýda­nynda da jastar forýmy ótken bolatyn. Biraq oǵan “Nur Otan” halyqtyq-demokratııalyq par­tııasy aýdandyq fılıaly janynan qurylǵan “jastar qanatynyń” árbir aýyldaǵy jetekshileri qatynaspaı qaldy. Sonda kimder qatynasty demeksizder ǵoı? Negizinen mektep oqýshylary. Jastar statýsy men mektep oqýshylary statýsy eki bólek. Osy jastar forýmy negizinen mektep oqýshylary ar­qa­synda ótetin sııaqty. О́ıtkeni, sol jyly aýdan­dyq máslıhattyń sessııasynda “Nur Otan” partııasy aýdandyq fılıaly tóraǵa­synyń orynbasary, aýdandyq máslıhattaǵy depý­tattyq toptyń jetekshisi Z. Demeýqulova osyndaı oıdy sessııanyń bıik minbesinen aıtty. Mine, osy jaǵy eskerilip, aýyl-aýyldaǵy barlyq jastar tartylatyn bolsa, mundaı forýmnyń jastarǵa bereri qazirgiden de áldeneshe márte artar edi. Jasyryp qaıtemiz, elimizde shynaıy tárbıe mektepterde beriledi. Osy júrek túkpirine uıalaǵan móldir de kirshiksiz sezimdi laılap almasaq bolǵany... Jastar saıasaty degende, eń birinshi, esińe kadr saıasaty túsedi. Memleketimizdiń irgesin bekemdeıtin, táýelsizdigimizdi baıandy etetin de jastar. Ony ultymyzdyń kóregen Kósh­bas­shysy, Prezıdentimiz N.Nazarbaev alqaly jıyndarda aıtýdaı-aq aıtyp júr. О́zi de dana babalarymyz ustanǵan ósıetin el ustanatyn súreni ustanyp, qoldarynan is keledi degen jastarǵa aq batasyn berip, joldaryn ashýda. Eldi alǵa jeteleıtin aqyldy kósemi bar ba­qytty eldiń basshysy jasaıtyn kóregendik bul. Bizdiń oblysymyzda da, joǵaryda aıtyl­ǵandaı, jastar saıasaty qashanda birinshi orynǵa qoıylǵan. О́ıtkeni, oblys ákimi Serik Úmbetov Allanyń nury túsken jandardyń biri desek, qatelespeımiz. Onyń iskerligi, halyqqa ja­qyndyǵy Qyzylaǵashta bolǵan sý apaty kezinde jarqyraı kórindi. Alǵashqy kúnderi qınal­ǵandyǵyn aıtsaıshy... Jalpy, S.Úmbetov talapshyl basshy. Alǵash aýdan ákimi bolǵanda aýdandyq mal dárihanasynyń bastyǵy oǵan bar dárilerdiń tizimin jazyp alyp kelip kórsetti. Mashın­ka­lyq betpen eki paraq eken. Endi oǵan eshnárse demeıtin shyǵar dep oılaǵan bolatynmyn. Aralary jaqyn jazylǵan eki paraq dáriler tizimin qarap shyqty da: “Ishinde antıbıotıkter joq qoı. Taýǵa shyqqan saýlyq massıtpen aýyrýy múmkin. Tuıaqtary maıysady. Jaılaýǵa shyqqansha taýyp ákeletin bol”, ­­– degen talap qoıdy. Bul – bir ǵana mysal. Degenmen de Serik Ábikenuly uzaq jyldar úlkendi-kishili ákim bolyp qyzmet atqaryp, keıin zeınetke shyqqanda T. Estenovti Esik pedagogıkalyq kolledjine dırektor etip taǵaıyndaǵanyn, nege ekenin bilmeımin, qoshtamadym. Oblysymyzda bilimdi de isker jastar barshylyq. Sondaı alǵyr, patrıot, jalyndaǵan jastarymyz bola tura, solardyń joldaryn baılaǵandaı áser etti bul áreket. Jalpy, zeınetkerlikke shyqqan adam jastarǵa oryndaryn bosatý kerek. Muny árbir sanaly, kókiregi oıaý, kózi ashyq adam Eńbek kodeksiniń jazylmaǵan tarmaǵy dep qabyldasa da artyq bolmas edi. Qazirgi Ile aýdanynyń Aqshı aýylynda Abylaı degen qarııa boldy. Kúnniń sýyǵynda da jalbaǵaı júretin. Qashan kórseń de, qaı jerde bolsyn jastarǵa aq batasyn berip jatýshy edi jaryqtyq. Osyndaı jas jetkinshekterge degen aq kógershin ispetti aq nıetterine zeınet jasyna jetken aǵalar men apalar eshqashan kir túsirip almasa eken. Zeınetaqyǵa qosyp jáne bir jalaqy alǵan jaqsy ǵoı. Solaı bola tursa da abyroıdyń jóni bir bólek... Máselen, qazirgi jaǵdaıda aýdandyq gazet aýdan ákiminiń, oblystyq gazet oblys ákiminiń saıasatyn qoldap, nasıhattaıdy. Bul da jazylmaǵan zańdylyq. О́ıtkeni, atalǵan ga­zet­ter jergilikti bıýdjetten qarjylan­dyrylady. Bas redaktor etip kimdi taǵaıyndasa da ol solaı jasaıdy. Sondyqtan bas redaktorlar da zeınetke shyqqanan keıin jastarǵa jol bergeni durys bolar edi dep oılaımyn. Zeınet ja­syndaǵy qalamgerdiń basqa mamandyq ıe­le­rinen bir artyqshylyǵy –ushqyr da salıqaly oı­laryn qarapaıym mamannyń biri bolyp-aq ushqyr qalamymen kópshilikke op-ońaı utymdy jetkize alady. Osyndaı biren-saran kóńil­jyq­pas­tyq, ókinishke qaraı, basqa salalarda da kezdesedi. Árıne, bul jerde meniki alýan pikir baryn uǵyndyrý ǵana. Úsh júzge tóbe bı atanǵan ataqty Tólebı: “Hannyń saıasaty qaraǵa tú­si­nik­ti bolsa , ol – saıasat emes”, – dep kesip aıt­qan eken. Meniń oıym tek el bolashaǵyn oı­laǵan Kóshbasshymyz, Tuńǵysh Prezıdentimiz Nur­sultan Nazarbaev sııaqty atqarýshy bı­liktiń barlyq býyny únemi jastardyń jolyn ashyp otyrsa degendi aıtý ǵana. Áıteýir jastar saıasaty sóz bolǵanda kóńilimizdiń túkpirinde kadr saıasaty turý kerek. Osy ekeýin bir-birinen múlde ajyratýǵa bolmaıdy. Marat QAShQYNBAEV, Balqash aýdandyq máslıhaty apparatynyń jetekshisi. Almaty oblysy.