Bul – “Mektepke jol” aksııasy kezinde tek Qostanaı qalasyndaǵy asyraýshysy joq jáne áleýmettik az qorǵalǵan otbasylar balalaryna kórsetilgen kómek. Aksııaǵa qalalyqtar jyl saıyn belsene qatysady. Bıyl shara sheńberinde kásiporyndar men mekemeler 963 balany sý jańa kıindirip, qajetti oqý quraldaryn alyp berdi. Bıyl aksııaǵa oblys ortalyǵyndaǵy 200-deı ujym qatysty. Olardyń qatarynda iri ónerkásip kásiporyndary men joǵary oqý oryndary, basqarmalar, departamentter, mektepter bar. Onyń syrtynda jeke kásipkerler men qaıyrymdy jandar da saýapty isten syrt qalǵan joq. Shilde aıynyń ortasynan bastalǵan aksııa oblys boıynsha áli de jalǵasýda. Kıim-keshekke, oqý quraldaryna zárý balalar áli de bar.
Názıra JÁRIMBETOVA, Qostanaı.
1 049 000 Jambyl oblysyndaǵy halyq sany 1 shildege osynsha adamdy quraǵan edi. Qazirgi tańda 1 mıllıon 50 myńnyń ústine erkin shyqqany anyq. Statıstıka departamentiniń málimeti boıynsha, bıylǵy jyldyń 1 shildesinde oblys halqynyń sany 1 mıllıon 049 myń adamǵa jetti. Onyń 439,6 myńy – qala, 610 myńy – aýyl halqy. О́tken jylǵy osy kezeńde oblys turǵyndarynyń sany 1 037 myń bolǵan edi. Halyqtyń tabıǵı ósiminiń arta túsýi sııaqty bul oń kórsetkish óńirdiń áleýmettik jáne ekonomıkalyq jaǵdaıynyń jyldan-jylǵa jaqsaryp kele jatqanyn bildiredi. Qazirgi kezde Taraz qalasy turǵyndarynyń sany 355 myń adam shamasynda.
Kósemáli SÁTTIBAIULY, Jambyl oblysy.
997 059 Batys Qazaqstan oblysynda 987,60 myń tonnanyń ornyna 997,59 myń tonna mal azyǵy daıyndaldy nemese jospar 101,0 paıyzǵa oryndalyp otyr. Oblystyq aýyl sharýashylyǵy basqarmasynyń bastyǵy Marat Ońǵarbekovtiń aıtýynsha, bul ótken jylǵydan edáýir artyq. Aıtalyq, 2009 jyly osy kezeńde 792,60 myń tonna shóp (80,3 paıyz) ázirlengen eken. Sonyń saldarynan ótken qysta keıbir jerlerde mal azyǵy taýsylyp, mal baqqan qaýym biraz qysylǵan edi. Bıyl óńirde osyny boldyrmaý sharalary qolǵa alyndy. Sonyń nátıjesinde Tasqala aýdany óz josparyn – 108,1, Qaztalov – 106,6, Jańaqala – 103,4, Jánibek 102,3 paıyzǵa oryndasa, Qaratóbeden basqa aýdandar men Oral qalasy da mejeden kórindi.
Temir QUSAIYN.
200 192 Aqmola oblysyndaǵy 381 telefon stansasynda osynsha nómir bar. Onyń 81331-i aýyl turǵyndarynyń ıgiliginde. Bul sıfrlar oblystyń barlyq aımaǵy telefon baılanysymen qamtylǵanyn aıǵaqtaıdy. Árbir 100 turǵynǵa shaqqanda 31 nómirden keledi. Oblystyń barlyq qalalarynda WLL CDMA – 800 bazalyq radıostansasy ornatylǵan. Aýyldyq jerlerde jelisiz baılanyspen qamtý máselesi birtindep sheshimin taýyp keledi. Búginde ǵalamtor jelisine qosylýshylar sany 37315-ke jetti. Oblystyń 53 aýyly jetildirilgen “Megalaın” qyzmetin paıdalanady. Mektepterdi telefon baılanysymen qamtý tolyqtaı sheshilse, densaýlyq saqtaý mekemeleriniń 92,3 paıyzy osy qyzmetti paıdalanady.
Baqbergen AMALBEK, Aqmola oblysy.
