Siz ne deısiz?

Toqshylyq saqtalady Bıylǵy jaz biraz jerdi qýańshylyqqa býǵany málim. Qurǵaqshylyq Qaraǵandy aı­maǵyn da aınalyp ótpedi. Kúıip ketken egistik alqap­tar, jaıy­lym­dar men shabyn­dyq­tar bar. Búginde bireýler sonyń saldary azyq-túlik máselesin qıyndata­dy deıdi. Shynynda solaı ma? “Egemen Qazaqstannyń” Qaraǵandy oblysyndaǵy tilshisi Aıqyn NESIPBAI oblystyq aýyl sharýashylyǵy basqarmasynyń bastyǵy Nıqanbaı Omarhanovqa: – Siz buǵan ne deısiz? – Muny jaǵdaıǵa tolyq qa­nyq emester aıtatyn shyǵar. Ras, astyq, jem-shóp byltyrǵy kó­lem­nen tómen. Alaıda son­shalyqty úreılenetindeı eshte­ńe joq der edim. Qazir aldyn ala eseptep, ekshep, boljap otyr­ǵanymyzdaı, azyq-túlik túrlerinen taryq­paýy­myzǵa se­nim tolyq. Sózim dáleldi bolý úshin derekter keltirsem, ótken kóktemde óńir boıynsha 752 myń gektar egin egildi. Odan or­ta­sha túsim 5,8-6 sentnerden aı­nal­dy. Árıne, buǵan deıingi kór­setkishten az. Áıtse de so­nyń ózin­de 645 myń tonna as­tyq jı­na­lady dep kútilýde. Osy oraıda byltyrǵy qordan 138 myń tonna dán qambada saq­taýly turǵanyn eskersek, nan, un ónimderi jurtqa qalpynsha molynan jetetindigine kúmán joq. Jalpy alǵanda, tutynýǵa 120 myń tonna astyq, tuqymǵa 80 myń tonnasy qajet. Joǵa­ryda atalǵandaı, qor budan edá­ýir kólemge óspek. Demek, toq­shylyq saqtalatyndyǵy anyq. Syrtqa 260 myń tonna astyq ótkizil­mektigi dıqan qaýymyna qosymsha tabys ákeledi. Ekinshi nan sanalatyn kar­top ta tutynýǵa jetkilikti bo­lýǵa tıis. Búginde 6264 gektardan osy azyq túri jınalý ústinde. Kólemi – byl­tyrǵydan 1060 gektarǵa ulǵaı­tyl­ǵan edi. Sonyń arqasynda kar­topty 13 myń tonnaǵa artyq jı­naımyz ǵoı dep úmittenemiz. Sóı­tip, onyń qory kúzde 121 myń tonnaǵa jetpek. Qysta keı jerlerde jem-shópke zárýlik bolýy múmkin. Onyń aldyn alý sharalary bel­gilendi. Mal azyǵyn belgili se­bepterge baılanysty az ázir­le­gen aýdandardy qolaısyz jaǵ­daıda qaldyrmaý qarastyryldy. Aıta ketý kerek, qýańshylyq sal­darynan 72 myń gektar egis­tikke eshteńe ónbedi. Olar esep­ten shyǵarylyp, shyǵyn óte­ledi. Aımaqtyń azyq-túlikpen ózin jetkilikti qamtamasyz etýi – alǵa qoıylǵan basty maqsat. Soǵan sáıkes syıymdy qoı­malar salý kerektigi kún tárti­binde tur. Ázirge kartop, kók­ónis saqtaıtyn 10 myń ton­na­lyq 4 qoıma paıdalanylyp júr. Birden 92 myń tonnasy saq­taýǵa qoıylatyn qoımalar qajet. Bul máseleni sheshý oılastyrylyp jatyr. Qaraǵandy.