“Teńizshevroıl” ózgeristeri

Todd Levı ketip, ony Tım Mıller almastyrady Bul kúnderi “Teńizshevroıl” (TShO) JShS kompanııasynyń basshylyq quramynda ózgerister júrýde. Aldaǵy qazan aıynan bastap atalmysh kompanııanyń bas dırektory Todd Levı myrzanyń jaýapkershiligin Tım Mıller myrza jalǵastyratyn bolady. Aldymen osy ýaqytqa deıin TShO-ny basqaryp kelgen Todd Levı myrza elimizdegi eń bıik ma­rapattyń biri “Dostyq” ordenin alǵan saýsaqpen sanarlyq sheteldik maman ekendigin eske sala ketelik. Ol Atyraý óńirinde osy laýazymdy qyzmetti atqara júrip, aımaqtyń áleýmettik turǵydan túleýine hal-qadirinshe eńbek sińirgen adam. Tórt jyldan astam qazaq jerinde jumys istegen Todd Levı endi San-Raman­daǵy (Kalıfornııa) “Shevron” korporasııasynyń tóraǵasy orynbasarynyń qaramaǵyndaǵy barlaý jáne óndirý jónindegi vıse-prezıdenti bolyp taǵaıyndalǵan. “Teńizshevroıl” JShS “QazMunaıGaz” qorjynyndaǵy ne­gizgi qarjynyń basty aktıvi bolyp tabylady. Biz Toddtyń basshylyq jumysyna rızamyz. Tımniń de basshylyq qyzmeti men birlesken áre­ketimizdiń tabysty bolýyn kúte­miz”, deıdi “QazMunaıGaz UK” AQ-tyń basqarma tóraǵasy Qaıyrgeldi Qabyldın. О́zine qut bolǵan qazaq jerimen qoshtasyp bara jatqan Todd Levı qazaqstandyq BAQ ókilderimen soń­ǵy ret kezdesip, jyl barysynda atqarylǵan tirlikterdi dáıektedi. Qorshaǵan ortany qorǵaý, kadrlardy jetildirý men óndiristi udaıy damytý sııaqty óndiristiń barlyq satysyna taldaý jasap, jýrnalısterdiń TShO qyzmetine qatysty saýaldaryna jaýap berdi. Todd myrzanyń málimdeýinshe, bıyl TShO qaýipsizdik tehnıkasy boıynsha jańa rekordtyq kórset­kish­ke qol jetkizip, oqıǵasyz jumys kúnderiniń sany 28 mıllıon adam-saǵatyna jetken. Osy aralyqta ilespe gazdy alaýda jaǵý men óndirilgen bir tonna munaıǵa shaqqandaǵy qaldyqtar kólemi 2006 jylmen salystyrǵanda 50 paıyzǵa qysqarǵan. TShO-da jumys istep jatqan qazaqstandyq orta jáne joǵary býyndaǵy basshylar sany 77 paıyzǵa, jalpy qazaqstandyq ma­­­mandar sany 84 paıyzǵa ulǵaıǵan. Al Atyraý oblysynyń ákimi Bergeı Rysqalıev Todd Levıge oń bolsyn tileı otyryp, otyz jylǵa jýyq “Shevron” korporasııasynda jaýapty qyzmetter atqaryp kelgen Tım Mıllerdiń de turǵyndardy áleýmettik jaǵynan qoldaý jáne jergilikti bılik organdarymen yntymaqty jumystardy jalǵasty­ratynyna senim bildirip otyr. Aınash ESALI. Almaty.