Ol jóninde tilderdi damytý jónindegi basqarmanyń bastyǵy Kemel Ospanov jan-jaqty toqtalyp ótti. Baıandamashynyń sózine qaraǵanda, memlekettik tildegi shyǵys qujattarynyń úlesi—95, kiris qujattary 67 paıyzǵa jetken. Sessııada depýtattardyń biraýyzdy qoldaýymen О́sken aýyly—Úkili Ybyraı, Elıtnoe – Báıterek, Chaglınsk – Shaǵalaly, Chehov aýyldyq okrýgi men osy attas ortalyǵy Aqbulaq bolyp ózgertildi. Jaqsylyq Ysqaqov, Anatolıı Spısyn, Muhamedjan Luqpanov sekildi qoǵamymyz ben memleketimizdiń damýyna zor úles qosqan jerlesterimizge “Soltústik Qazaqstan oblysynyń qurmetti azamaty” ataǵy berildi.
О́mir ESQALI. Soltústik Qazaqstan oblysy.
Úzdik taýarlar baıqaýyna qatysady. Qaraǵandyda osymen besinshi ret “Sapaly taýarlar” oblystyq baıqaýy ótti. Oǵan 58 kásiporyn qatysty. “О́ndiristik baǵyttaǵy” jáne “Turǵyndarǵa arnalǵan úzdik taýarlar” nomınasııalary boıynsha uıymdastyrylǵan kórmede 10 óndiris oshaǵy aldyńǵy saptan kórindi. Bulardyń ishinde “Máshıne jasaý zaýyty”, “Qaraǵandy konfetteri”, “Imstalkom” sııaqtyly burynnan belgili kásiporyndar bar. Oblysta sapasy joǵary dep baǵalanǵan ónimder taıaý arada Astanada ótetin “Qazaqstannyń úzdik taýarlary” baıqaýyna qatysady.
Aıqyn NESIPBAI. Qaraǵandy.
Joba sheteldikter nazarynda. Syr eline gýmanıtarlyq jáne amerıkalyq basylymdardyń tilshileri arnaıy saparmen kelip, “Syrdarııa ózeniniń arnasyn retteý jáne Araldyń soltústik bóligin saqtap qalý” jobasymen egjeı-tegjeıli tanysty. Medıa-týr jetekshisi Igor Ermanchenkovtyń aıtýynsha, jýrnalısterdiń maqsaty “SARATS” jobasymen sheteldikterdi tanystyrý eken. Sheteldik tilshilerge oblys ákimdigi óńirdiń áleýmettik-ekonomıkalyq damýy týraly tolyqqandy málimet berdi. Munan soń sheteldik jýrnalıster tobynyń sapary Aral aýdanynda jalǵasyp, Kókaral bógetine, Aqlaq sý tospasyna, Qosjar eldi mekenine aıaldap, turǵyndardyń tynys-tirshiligimen tanysady.
Erkin ÁBIL. Qyzylorda.
Kúzdik sebý bastaldy. “Qyrkúıektiń ekinshi jartysy – kúzdik sebý úshin qolaıly maýsym”, deıdi jambyldyq dıqandar. Sondyqtan bolar, Turar Rysqulov atyndaǵy aýdannyń dıqandary ótken aptanyń 15 qyrkúıegi kúni dán sebýdi bastap ketti. Sharýa qojalyqtarynyń soqa-saımandary saqadaı saı dese de bolady. Olarǵa jospardaǵy alqapty ıgerý úshin barlyǵy 8172 tonna tuqym kerek. Búginde ol da daıyn jáne ǵylymı ınstıtýttyń tekserýinen ótkizilgen. О́ıtkeni, sharýashylyqty ǵylymmen sabaqtastyra júrgizýdi qolǵa alǵan aýdan dıqandary egis alqaptaryna tek qana joǵary surypty tuqymdardy paıdalanýdy jón sanap otyr. Aýdanda, sondaı-aq, kóktemgi egis jumystary úshin jer jyrtýǵa daıyndyq qatar júrgizilýde.
Kósemáli SÁTTIBAIULY. Jambyl oblysy.
Keleshekke kemel bilimmen. Osyndaı urany bar Sultanmahmut Toraıǵyrov atyndaǵy memlekettik ýnıversıtet ótken aptany 50 jyldyq mereıtoıyna arnady. Rýhanı-mádenı baǵyttaǵy ártúrli sharalar ótkizildi. Elý jylda el jańa. Rektor Erlan Aryn basqaratyn oqý orny bul kúnderi joǵary bilim berýde álemdik deńgeıge jetip, “Eýropa sapa belgisi” syılyǵyn aldy. Al, elimiz boıynsha joǵary oqý oryndary arasynda 5-shi orynda tur. О́ńirlik joǵary oqý oryndarynyń rektorlary, depýtattar, ýnıversıtettiń oqytýshy-ǵalymdary, stýdentteri qatysqan jıynda oblys ákimi Baqytjan Saǵyntaev Úkimet basshysy Kárim Másimovtiń quttyqtaý hatyn oqyp berdi. Osy kúni oqý ornynyń tehnologııalyq parkinde “Damý” kásipkerlik qoldaý qorynyń bólimshesi ashyldy. Mereıtoı sońy stýdenttik fılarmonııanyń konsertine ulasty.
Farıda BYQAI. Pavlodar.
Memlekettik teatr Oralǵa keldi. Oralda M.Lermontov atyndaǵy memlekettik akademııalyq orys drama teatrynyń (kórkemdik jetekshisi – QR halyq ártisi, Memlekettik syılyqtyń laýreaty Rýben Andrıasıan) gastroli ótkizilýde. A.Ostrovskıı atyndaǵy oblystyq orys drama teatrynda ótip jatqan gastrol shymyldyǵy S.Lobozerovtiń “Otbasylyq portret bógde adammen” atty eki bólimdi komedııasymen ashyldy. Sodan keıin oraldyq ónersúıer qaýym K.Maneniń “Áıeldi izdeńder” atty úsh aktili komedııasyn, J.-J.Brıker men M.Lasegtiń “Mýjskoı rod, edınstvennoe chıslo” atty eki bólimdi komedııasyn, R.Ibragımbekovtiń “Ishý partnera dlıa nechastyh vstrech” atty qos bólimdi tragıkomedııasyn tamashalady. Balalar úshin “Alqyzyl gúl” atty bir bólimdi ertegi de kórsetildi.
Temir QUSAIYN. Oral.
Jyl buryn stýdent atandy. Jýyrda aqyndar Mekkesi atanǵan qasıetti Jıdebaıda mektep oqýshylarynyń respýblıkalyq dástúrli Abaı-Shákárim oqýlary ótkizildi. Oǵan elimizdiń túkpir-túkpirinen júzden astam talapker keldi. Munyń burynǵy oqýlardan bir-eki ózgesheligi boldy. Iаǵnı, bıyl oǵan reseılik qandastarymyz da qatysty. Ekinshi ózgeshelik sol, poezııa kúnderiniń “Júırikten júırik ozar jarysqanda” dep atalatyn úshinshi bólimi boıynsha jeńimpaz atanǵan Qaraýyl mektep-gımnazııasynyń 11-synyp oqýshysy J.Jaqsylyqovty Semeı pedagogıka ınstıtýtynyń rektory, professor Meıir Eskendirov bilim grantymen marapattady. Ol, sonymen birge jas talanttardy qoldaý maqsatyndaǵy jasalǵan bul shara dástúrge aınalyp, óz jalǵasyn tabatyndyǵyna sendirdi.
Dáýlet SEISENULY. Shyǵys Qazaqstan oblysy.
