Qaıta túlegen Qyzylaǵash

el birligi men memleket qamqorlyǵyn aıqyn sezindi “Sý – ómirdiń nári” degen ǵoı. Desek te bıylǵy kóktemniń qara sýy­ǵyn­da tabıǵattyń tosyn minez tanytýynan bógendegi tunyq sý kemerinen asyp, jol-jónekeı alyp temir qubyrlardy aǵyzsa, beıqam tirliktegi aýyl halqyn ábigerge saldy. Qyzylaǵashtyqtar bir túnde kóz kórip, qulaq estimegen alapat sý tasqynynyń astynda qalyp, áke-sheshe balasynan, týǵan-týystarynan aıyrylyp, kóńil muńǵa, kózderi jasqa toldy. Elbasy Nursultan Nazarbaev­tyń sý tasqyny zardaptaryn joıý men tirlikti qalpyna kel­tirýge qatysty jedel tapsyr­ma­synan keıin barsha qazaqstan­dyqtar bir jaǵadan bas, bir jeń­nen qol shyǵaryp, jumyla ki­risti. Úkimet basshysynyń qada­ǵalaýy, oblys ákiminiń jetek­shiligimen qurylǵan komıssııa júr­gizgen barlyq ju­mystardyń tııanaqty aıaqtalǵany­na da aıǵa jýyq ýaqyt boldy. Jer jannaty Jetisýǵa jumys saparymen tamyz aıynyń al­ǵash­qy aptasynda kelgen Memleket basshysy tasqynnan keıingi Qy­zyl­aǵashta atqarylǵan jumystarǵa jo­ǵary baǵasyn berip, turǵyn­dar­dy birlik pen tirlikke, tushymdy eńbekke shaqyrǵanyn eshkim umyt­qan joq. Aıtylǵan sózge uıyǵan olar, ár kúnderin ıgilikti iske arnap keledi. Qazirgi kezde qyzylaǵashtyqtar mamyrajaı ómirlerin jalǵasty­ryp, sándi úılerde ǵumyr keship, qoralarynan tórt túlik mal órip, ózderine jasalǵan turmystyq jaǵdaılardyń qyzyǵyna kenelgen. Qandaı da bir bastalǵan istiń qorytyndysy bolatyny anyq. Kúni keshe Qyzylaǵashtaǵy sal­tanatty mádenıet saraıynda eldi mekenderdegi sý tasqynynyń zardaptaryn joıý men qalpyna kel­tirýge baılanysty jumysshy­lardy úılestirgen jedel shtabtyń qorytyndy jıyny ótip, oblys ákimi Serik Úmbetov halyqtyń basyna túsken qaıǵysyn bólisip, qaınaǵan jumystyń ortasynan tabylyp, qysqa merzimde aýyldy qaıta túletken qurysh qoldy qurylysshylardy, taǵy basqa sala bas­shy­lary men mamandaryn alǵys hat, qurmet gramotalarymen marapattady. Olardyń qatarynda qıyn kezde eldi mekendegi oryn alǵan jaǵdaıdy jalpy halyqqa jetkizip, shynaıy aqparat taratqan BAQ ujymdary bolsa, elimizdiń bas gazetiniń ujymyna da osyndaı qurmet kórsetildi. Osy kúni mádenıet saraıyndaǵy jurt­shylyq aldynda oblys ákimi Serik Úm­betov, birinshi orynbasary, jedel shtab jetekshisi Amandyq Batalov naýryz aıyn­daǵy tabıǵat apaty kezinde kezdesken qıyndyqtardy jáne sodan bergi basqa túsken aýyrtpalyqty seıiltýdegi shydam­dylyq shyńdalǵan sátterdi eske túsirip, “Qaıǵy bóliskende ǵana jeńil­deıtinin” ortaǵa saldy. Aýyldar sý astynda qalǵanda óńirdegi qyz­­­met salalaryndaǵy jaýaptylar tur­ǵyndardy qutqarýǵa jumyldyryldy. Osy oraıda oblystyq ishki ister, tótenshe jaǵ­daı­lar jónindegi basqarma, Taldyqorǵan áskerı bólimderiniń sarbazdary asqan janqııarlyq tanytqanyn aıtqan jón. Al qurylys kompanııalary qujattary ázir­len­genshe bir jarym aı boıy óz qarjy­lary­men jumys istep, osy merzimde 45 úı­di paıdalanýǵa berdi. Osylaısha qalpy­na keltirý jumystary 4 aıda tolyq aıaq­talyp, Qyzylaǵashta 465 úı jańadan sa­lyn­sa, 30 úı men 9 áleýmettik nysan ǵı­marat­tary jóndeýden ótti. Bir aýyl qaıta túlep, ásem kelbetke ıe boldy. Aýyldaǵy ushan-teńiz jumystardyń tııanaǵyn kel­tirip, kún-tún demeı onyń basy-qasy­nan tabylǵan Amandyq Ǵabbas­ulynyń ólsheý­siz eńbegin oblys ákimi osy kúni erekshe aıtty. Búkil el Qyzylaǵashqa qaıyrym­dy­lyq kómekterin jóneltse, ardagerler zeınetaqysyn aýdardy. Turǵyndardyń qaıǵysyn bólisip, qolushyn berýden esh adam shet qalmady. Búgin sizderdiń jáne ózimniń atymnan barshaǵa alǵys aıtamyn. Máselen, apattan zardap shekken tur­ǵyn­darǵa 3 aı boıy 15 myń teńgeden ma­te­rıal­dyq kómek kórsetýge respýblıkalyq bıýdjetten 145,3 mln. teńge bólinip, 3310 turǵynnyń derbes esepterine qarjy aý­da­ryldy. Memlekettiń materıaldyq re­zer­vi men qaıyrymdylyq uıymdarynan 245,3 mln.teńgeniń azyq-túligi men zat­tary kelip tústi. Osyndaǵy joǵary oqý oryndary men kolledjderde oqıtyn 70 balaǵa oblys ákiminiń granty berilse, basqa da áleýmettik-turmystyq jaǵdaı­lardy júzege asyrǵandarǵa alǵys aıtqan jón. Búgingi jedel shtabtyń sońǵy oty­rysyn Qyzylaǵashta aıaqtap, sý tasqyny­nan keıin onyń zardaptaryn joıýǵa jumyla kiriskenderdi marapattaýdy jón kórdik, dedi Serik Ábikenuly. Qorytyndy jıynda oblys ákiminiń birinshi orynbasary Amandyq Batalov, Aqsý aýdanynyń ákimi Áskerbek Dúısem­baev qıyndyǵy batpandaı bolǵan 4 aıdaǵy kóńilde júrgen oı tujyrym­daryn ortaǵa salsa, aýyl ákiminiń mindetin atqarýshy Sáýle Amıtova, jas ustaz Qu­ra­laı Baıgeldıeva, taǵy basqalary jer­lesteri atynan qıyn kezde qolushyn ber­genderge alǵystaryn jetkizip, tebirendi. Sý tasqyny zardaptaryn joıý men qalpyna keltirýdegi eseli eńbekteri úshin osy kúni túrli sala qyzmetkerleri, tártip saqshylary men jaýyngerler, qatardaǵy jumysshy, qurylysshy, aýyl belsendileri oblys ákiminiń, aýdan ákiminiń qurmet gra­motalarymen marapattalyp, eńbek­teriniń óteýin kórdi. Jınalǵandarǵa án men kúıden shashý shashylsa, apat kezinde baqılyq bolǵan árýaqtarǵa quran baǵyshtalyp, as berildi. Ájeler shashýyn shashyp, máre-sáre bolyp, Qyzylaǵashta endi toı-mereke bolsyn degen aq tilekpen tarasty. Kúmisjan BAIJAN. Almaty oblysy.