Tarıf saıasatynda tabandylyq qajet

Keshe Parlament Májilisi Tóraǵasynyń orynbasary Jánibek Káribjanovtyń jetekshilik etýimen Úkimet saǵaty ótip, onda “Tarıftik saıasattaǵy energııany únemdeý” degen taqyryp tóńireginde oı qozǵaldy, dep habarlady Májilistiń baspasóz qyzmeti. Úkimet saǵatynda atalǵan taqy­ryp boıynsha Tabıǵı monopolııa­lar­dy retteý agenttiginiń tóraǵasy Nurlan Aldabergenov baıandama ja­sady. Sonymen qatar, baıandamashy osy másele tóńireginde depýtattar­dyń suraqtaryna jaýap berdi. Tarıftik saıasattaǵy energııany únemdeý, retteletin sektorlardyń ınvestısııalyq tartymdylyǵyn kóterý, elektr energııasyn jáne sýdy únemdeý máselelerin sheshý jumysy, sondaı-aq osylarǵa qatysty basym mindetter týraly aqparat jarııa etildi. Qazirgi kezde agenttik 1632, onyń ishinde sý kárizi júıeleriniń sa­lasynda – 867, elektr energe­tı­ka­sy salasynda – 469, munaı men gazdy tasymaldaý salasynda – 52, kó­lik salasynda 244 retteletin qyz­metterdi kórsetetin 1080 tabıǵı monopolııa sýbektisiniń qyzmet­terin retteýdi júzege asyrady eken. Budan basqa, 400 domınant-sýbekt jáne 15 memlekettik monopolııa sýbektisi boıynsha baǵa belgileý fýnksııalaryn júzege asyrady. N.Aldabergenov agenttik qyz­me­tine qatysty ózge de atqarylǵan jumystar men alda turǵan min­det­ter týraly jan-jaqty aıtyp ótti. Úkimet saǵatyn Parlament Má­jilisi Tóraǵasynyń orynbasary Jánibek Káribjanov qorytyn­dy­lady. Ol qorytyndy sózinde: “Eko­nomıkanyń monopolııalyq sektoryn memlekettik retteý, ener­gııany únemdeý, energııa resýrsta­ryn, elektr energııasyn jáne sýdy únemdeý máselelerin sheshý – agent­tik jumysynyń basty stra­tegııalyq baǵyty. Al osy baǵytta­ǵy jasalyp jatqan is-sharalardyń basty maqsaty – turǵyndardyń-tutynýshylardyń múddelerin qamtamasyz etetin tıimdi tarıfti qalyptastyrý saıasatyn iske asyrý. Taǵy da bir aıta ketetin másele – osy saladaǵy kórsetilgen zań normalarynyń jáne tutynýshy­lar­dyń quqyqtarynyń buzylýyn boldyrmaýdy baqylaý jáne jaýap­kershilikti qajet etse, taǵy da kúsheıtý”, dedi. Úkimet saǵatynyń nátıjeleri boıynsha daıyndalǵan usynymdar­ǵa tolyqtyrýlar engizilip, Úkimetke joldanatyn boldy.