Atqarylǵan jumys kóp, al atqarylatyn jumys odan da mol

Elbasy Nursultan Nazarbaev Jambyl oblysyndaǵy jumys saparynyń ekinshi kúnin Taraz qalasyndaǵy áleýmettik baǵdar­la­ma­larmen tanysýdan bastap, Mem­lekettik zeınetaqy tóleý orta­ly­ǵynyń Jambyl oblystyq fılıaly men Taraz qalalyq ákimdiginiń ju­myspen qamtý jáne áleýmettik baǵ­darlamalar bólimi memlekettik me­kemesi ornalasqan jańa ǵımarat­tyń ashylý salta­natyna qatysty. Paıdalanýǵa endi ǵana berilip otyrǵan bul zamanaýı ǵımarat turǵyndardyń talap-tilegin eskere otyryp salynǵan. Jalpy alańy 482,6 sharshy metr bolatyn ǵıma­ratta zeınetkerlik ister men jár­demaqy qujattaryn saqtaýǵa bola­dy, sondaı-aq, munda “bir tereze” tártibi boıynsha bir mezgilde 28 adamǵa qyzmet kórsetiledi. Múm­kin­dikteri shekteýli azamattarǵa qolaı­ly jaǵdaı týǵyzý jaǵy da oılas­tyrylǵan. Aty ańyzǵa aınalǵan batyr Baýyrjan Momyshulyna tıesili, biraq KSRO áskerı bıýrokratııa­synyń kesirinen 50 jylǵa jýyq ýaqyt arman bolǵan Keńes Odaǵynyń Batyry ataǵyn Kreml basshylarynan qazaq halqynyń eńsesin kóterip, eldigin asqaqtatý úshin alyp bergen Elbasy Nursul­tan Nazarbaev ekeni belgili. En­deshe, halyq júregindegi sol qahar­man perzenttiń 100 jyldyǵy atalyp ótken óńir ortalyǵynyń tórinde turǵan batyr eskertkishine Elbasy taǵzymy zańdy dep bile­miz. Abaı jáne Tóle bı kósheleri­niń qıylysyndaǵy oblystyq drama teatrynyń aldynda erlik pen órliktiń uranyndaı bolyp, qasqaıyp turǵan eńseli eskertkish­ke kelgen Elbasy batyr rýhyna taǵ­zym etip, osynda ózin kútip tur­ǵan qala turǵyndarymen, ardager­ler­men emen-jarqyn áńgimelesti. Prezıdenttiń budan keıin atbasyn burǵan nysany “Jasyl el” baǵdarlamasy sheńberinde qolǵa alynǵan kóp páterli úıdiń aýlasy boldy. Memleket basshysy úıdiń aýlasyn kórip, ondaǵy jaıaý­lar úshin jasalǵan jol men onyń kómkermeleriniń, asfalttyń jańadan istelgenine, sondaı-aq, átkenshekterge, gúlzarlarǵa, oıyn keshenderine nazar aýdardy. Kúni búginge deıin oblysta 42 aýlalyq aýmaqtyń jumysy aıaqta­lyp, 14 sporttyq, 67 balalar, 62 sharýashylyq jáne 17 tennıs ala­ńy salynǵan. Olarǵa qajetti 15 733 metr kómkerme aýystyry­lyp, 77596 sharshy metr asfalt tóselip, 420 oryndyq qoıylǵan. Ústimizdegi jyldyń sońyna deıin Taraz qalasynda 65 aýla tártipke keltiriledi. Sóıtip, aldaǵy 3 jyl­da oblys ortalyǵyndaǵy barlyq aýlalardy zaman kóshine laıyq jańalaý josparlanyp otyr. Elbasy Nursultan Nazarbaevqa oblys ákimi Qanat Bozymbaev osy aýladaǵy balalarǵa arnalǵan ja­san­dy jasyl tósenishi Gollan­dııa­da jasalǵan fýtbol alańyn kór­set­ti. Zaman talabyna saı jasal­ǵan shaǵyn alań aımaqtaǵy fýt­bol­dy damytý sheńberinde qolǵa alynǵan onynshy nysan bolyp ta­bylady. Ústimizdegi jyly ob­lys­ta balalar úshin osyndaı 20 alań jasalatyn bolady. Sondaı-aq, aımaqta 20 boks zalynyń qu­rylysy qolǵa alynǵan. Memleket basshysy Jambyl oblysynda halyqty sporttyń bu­qaralyq túrlerine tartý jónindegi tapsyrmasyna saı naqty jumys­tar júrgizilip jatqanyna rıza­shylyǵyn bildirdi. Elbasy Nursultan Nazarbaev­tyń endigi baǵyty “Investısııa. Innovasııa. Damý.” dep atalatyn bıznes-forým bolatyn. Oblys or­talyǵyndaǵy M.H.Dýlatı atynda­ǵy memlekettik ýnıversıtetiniń Jastar saraıynda ótken bıznes-forým aldynda oblys basshylary Elbasyn el damýyn jedeldete túsetin údemeli ındýstrııalyq-ın­novasııalyq jobalarmen tanys­tyrdy. Shetel ınvestorlary, damý ıns­tıtýttary jáne Jambyl obly­synyń jeke kásipkerleri arasyn­da iskerlik áriptestik, ekonomıka­lyq alys-beris jónindegi túsi­nis­tik jyldan-jylǵa ulǵaıyp keledi. Mysaly, Jambyl oblysynyń ekonomıkasyn damytýdy jedel­de­tý maqsatynda jáne aımaqqa ın­vestısııalar tartý úshin yntymaq­tas­tyq týraly 5 kelisimge, ynty­maqtastyq týraly 2 memoran­dýmǵa, 1 eksporttyq kelisimge jáne 1 qaryz kelisimine qol qoı­yl­ǵan. Qol qoıylyp, resimdelgen mundaı qujattar Italııadan, Fran­sııadan, Ispanııadan, Reseı­den jáne Irannan kelgen árip­testermen baılanysty nyǵaıtýǵa jaǵdaı týǵyzdy. Atap aıtqanda, Jambyl oblysy ákimdigi men Reseıdiń “Rýsgıdro” AAQ arasyn­da gıdroenergetıkany, jel ener­gııa­syn jáne jańǵyrmaly ener­gııanyń basqa da túrlerin damytý salasyndaǵy yntymaqtastyq naqty isterge ulasyp otyr. Sondaı-aq, oblystyq ákimdik pen ırandyq “Dıba San” kom­pa­nııasy basshylyǵy qoı sharýashy­lyǵyn damytý jáne agroónerkásip sektorynda birlesken jobalardy júzege asyrmaqshy. Mal bordaqy­laý alańy men jem-shóp bazasyn jasaý jóninde Malaızııanyń ult­tyq iri qara sharýashylyǵy korpo­rasııasymen de jumystar júrgizi­lip otyr. “Taraz” ÁО́K pen ıspandyq “Kontrakta Tehnıkal Resorses” kompanııasy arasyndaǵy ynty­maq­tastyq biregeı mamandan­dy­rylǵan sheteldik tehnıkalar men qondyrǵylardy ákelýge uıytqy bolýda. Dılerlik ortalyq ashý jáne keıin ony mamandandy­rylǵan kommýnaldyq tehnıkalar­dy qurastyrý jónindegi kásip­oryn­ǵa aınaldyrý týraly “Taraz” ÁО́K pen Reseıdiń “Avtomo­bılder jáne “Ýral” motorlary” JAQ arasynda kelisimge de qol jetipti. Italııanyń “Sefıta” kom­panııasynyń ókilderi “Fabrı­ka POSh-Taraz” JShS basshyly­ǵymen jip ıirý óndirisin damyt­paqshy. Irannyń “Dıba San” kompanııasy men “Kazah bıf kom­panı” JShS arasynda et jóneltý jóninde kelisim de jumys isteýge daıyn. Aqparattyq tehnologııa sala­syn­da aqparattyq tehnologııa kol­ledjin uıymdastyrý jáne ınves­tısııalyq jobalardy birlesip júzege asyrý jóninde “Zerde” Ulttyq ınfokommýnıkasııalyq holdıngi men “Áýlıeata” atyndaǵy Jambyl gýmanıtarlyq-tehnolo­gııalyq ýnıversıteti belsene jumys istep otyr. Fransýzdardyń “Vicat” kompa­nııasy men Jambyl óndiristik sement kompanııasy arasyndaǵy ózara kelisimniń nátıjesin kóretin de ýaqyt alys emes sııaqty. Jalpy, oblysta údemeli ın­dýstrııalyq-ınnovasııalyq damý baǵdarlamasy aıasynda qolǵa aly­nyp, resimdelgen qujattardyń jal­py quny 15 mlrd. teńgeden as­tam qarjyny quraıdy. Teń árip­testik negizinde oılastyrylǵan kelisimder aımaqtyń básekelestik áleýetin ósirip qana qoımaıdy, sonymen birge, óńir óndirisin álemdik rynokqa shyǵarýǵa jol ashady. Forýmǵa jınalǵan kompanııa basshylary, isker azamattar men azamatshalar Elbasyn óz joba­larymen tanystyrdy. Odan keıin Elbasy Jastar saraıy foıesinde turyp Jańatas qalasyndaǵy temir qorytý óndirisi kompanııasy jumysshylarymen “telekópir” arqyly baılanysqa shyqty. – Asa qurmetti Prezıdent myrza! Údemeli ındýstrııalyq-ınnovasııalyq damý baǵdarlamasy aıasynda oblysymyzda bıyl iske asyrylatyn 9 jobanyń ishinde – Sarysý aýdanynyń ortalyǵy Jańatas qalasyndaǵy metallýrgııa kombınaty da bar. Jobanyń jalpy quny – 450 mıllıon teńge. Kombınat qara metall synyqtaryn óńdep, armatýra shyǵaratyn bolady jáne jańadan 60 jumys orny ashylady. О́ndiris orny tolyq qýatynda jumys istegende jylyna 12 myń tonna armatýra ónimderin berip, respýblıka kólemindegi qurylys jumystaryna paıdalany­la­tyn bolady. Mundaı jobalar­dyń júzege asýy shalǵaıdaǵy aýdan­dar men shaǵyn qalalardyń áleýmettik-eko­nomıkalyq jaǵ­daıyn jaqsar­tý­da­ǵy mańyzy zor, – degen Sarysý aýdanynyń ákimi Bekbolat Oryn­bekov Elbasynan “Qurmetti Nur­sultan Ábishuly, óndiristi iske qosýǵa ruqsat etińiz” dep suraǵan. Elbasy ruqsat bergen sátte ek­ran­nan zaýyt sehyndaǵy jumys­shy­lar men balqyǵan temir, odan armatýra bolyp shyǵyp jatqan ónimder kórindi. Jańatas metallýrgııalyq zaýy­ty qara metaldyń synyqtaryn qaıta óńdeý arqyly metall pro­ka­tyn shyǵarýǵa baǵyttalǵan. Bul jobany júzege asyrý arqyly ishki rynokty metall prokatymen qam­ta­masyz etý máselesi sheshiledi. Onyń óndiristik qýaty jylyna 36 mln. tonna bolmaq. Jobanyń quny – 450 mıllıon teńge. Dıametri 10,12,14 jáne 16 sm. bolatyn arma­týralar men basqa da ónimder sura­nysqa kóptep ıe bolýǵa tıis dep kú­tilýde. Zaýyttyń qurylys-mon­taj jumystary belgilengen mer­zim­de aıaqtalyp, tehnologııalyq qon­dy­rǵylar der kezinde ornatyldy.         Jańatastyqtarmen “telekópir” arqyly tildesken Elbasy, olarǵa tabys tilep, aımaqta temir qorytý zaýytynan basqa da shaǵyn óndiris oryndaryn kóbeıtip, halyqty ju­mysqa kóptep tartý kerektigine nazar aýdardy. О́ıtkeni, ońtústik óńirde halyq sanynyń kóptiginen jumyssyzdar máselesi bolaty­nyn, al ony tek qana shaǵyn bıznes ar­qyly jeńý múmkin ekenin aıtty. Oblys ákimi Qanat Bozymbaev bıznes-forýmda Elbasyna 2011-2015 jyldary Jambyl óńirin damytýǵa arnalǵan baǵdarlama jobalaryn aıtyp berdi. Jambyl oblysynda eń basty basymdyqtar hımııa ónerkásibine, agro azyq-túlik sektoryna jáne jeńil óner­kásipke beriledi. Mysalǵa, agro azyq-túlik sektoryn alatyn bol­saq, munda negizgi strategııalyq yn­ta servıstik daıyndaý ortalyqta­ryn qurý men damytýǵa, tuqym sha­rýashylyqtaryn, kókónis saqtaý oryn­daryn qurýǵa, sanıtarlyq-veterınarlyq qyzmetti jaqsartýǵa, bordaqylaý alańdary júıesin kóbeıtýge, daıyndaý jónindegi ınf­raqurylymdarǵa, mal ónimderin alǵashqy óńdeý men saqtaýǵa, qaıta óńdeý qýattaryn modernızasııa­laý­ǵa, sondaı-aq, sýlandyrý júıesin paıdalaný sapasyn arttyrý men rekonstrýksııalaýǵa, tamshylatyp sýarýdyń ozyq ádisterin endirýge aýdarylady. Bul sharalardy júzege asyrý búgingi dástúrli aýyl sha­rýa­shylyǵyn jáne aýyl sharýashy­lyǵy ónimderin alǵashqy qaıta óńdeýden 2015 jylǵa deıin qazirgi zamanǵy ınnovasııalyq aýyl sha­rýa­shylyǵyna jáne aýyl sharýa­shy­lyq ónimderin tereńdetip qaıta óńdeýge jol ashady. Hımııa ónerkásibiniń áleýeti de orasan mol. Elbasy bul jóninde osydan bes jyl buryn oblysqa kelgen saparynda óńir baılyǵyn “Jambyl – fosfordyń otany” dep baǵalaǵan bolatyn. Sondyqtan alda­ǵy ýaqytta jylyna 650 tonna ónim shyǵaratyn kúkirt qyshqyly sehy­nyń qurylysyn júzege asyrý (joba quny – 12 mlrd. teńge) jáne jylyna 2 mln. tonna ónim shy­ǵaratyn baıytý fabrıkasy (joba quny – 25,5 mlrd. teńge) jos­par­lanýda. Budan basqa “EvroHım­Ýdo­bre­nııa” reseılik kompanııasy Qarataý qalasynda (joba quny – 394,5 mlrd. teńge) azottyq, fosforlyq jáne keshendi mıneraldy tynaıt­qyshtar shyǵarý jobasyn júzege asyrýdy josparlaýda. Bul joba aımaq úshin júıe quraýshy bolyp tabylady, shyǵarylatyn ónimniń kólemi jylyna 150 mlrd. teńgeden asyp, bıýdjetke jylyna salyq pen basqa da tólemderdi qosqanda 15 mlrd. teńgedeı túsiredi. Jambyl oblysyndaǵy jeńil ónerkásip kóteretin júk te kóp. Bul sektor aımaq ekonomıkasyna aıtarlyqtaı úles qosa almaǵany­men, ónim shyǵarýdyń 0,14%, eks­porttyń 1,1% jáne jumysqa tar­tylǵandardyń 0,5% quraıdy da, olar, negizinen jún jáne teri ónerkásibine qamtylady. Sonymen qatar, oblysta bııazy júndi qoı ósirýge qolaıly jaǵ­daı­dyń týýy, salaǵa memleket tarapy­nan qoldaý kórsetý, halyq taby­sy­nyń ósý shamasynyń órleı túsýi jáne óndiristik qýattardyń ósýi (mysaly, “Fabrıka POSh – Taraz” jáne “Tarazkojobýv”) obly­symyzda tops, ıaǵnı shúıke ón­dirýdi, aıaq kıim jáne teriden tigil­gen aksessýarlar óndirýge jaǵdaı jasaı bastady. “Fabrıka POSh – Taraz” JShS-niń buıymdary jún ónimderinen jasalady. Bul salany damytýdaǵy strategııalyq ynta bo­lyp tabylatyn – jún buıymdaryn óndirýdi damytý, bııazy júndi qoı basyn arttyrý, iri sharýashy­lyqtardy damytý, tutynýshylar aıaq kıimin, teriden jasalatyn aksessýarlar óndirisin básekege qabiletti etip qurý, ónim satýdyń oryndary men tehnologııasyn da­mytý, óndiristik qýattardy jańar­týǵa nazar aýdarý bolyp tabylmaq. Budan basqa, aldaǵy jyldardyń strategııalyq baǵyttary retinde barlyq eldi mekendermen kóliktik qatynas ornatýdy qamtamasyz etý, júk tasymaldaýshylar parkin ja­ńartý, jol jamylǵylaryn jaqsar­tý, avtoservıster qurý jáne da­my­tý, kólik-logıstıkalyq ortalyqta­ryn, qoıma ǵımarattaryn salýdy atap aıtýǵa bolady. Oblysta balamaly elektr qýa­tyn damytý isi de qolǵa alynbaq. О́ıtkeni, oblys jeldik jáne gıdro­elektrostansalardy damytý boı­ynsha úlken áleýetke ıe. Budan basqa turǵyn úı-kommýnaldyq sharýashylyqta, ónerkásipte, aýyl sharýashylyǵynda, halyq arasynda qýat saqtaǵysh tehnologııalardy engizý jumystary júzege asy­rylady dep kútilýde. Ústimizdegi jyly oblysta “Enerdjı-Taraz” JShS qýat saq­taýǵa yńǵaıly shamdar shyǵarýdy bastady, olar burynǵylarǵa qara­ǵanda 60% únemdi dep eseptelýde. Oblys ákimi Elbasy nazaryn óńir ekonomıkasynyń ózekti prob­lemalarynyń biri – turǵyn úı-kom­mýnaldyq sharýashylyǵy, sýmen, gazben jabdyqtaý bolyp tabylatynyna da aýdardy. Turǵyn úı qorynyń negizgi bóligi qanaǵat­tanǵysyz jaǵdaıda jáne jóndeýdi qajet etedi. Sondyqtan oblystyń tur­ǵyn úı-kommýnaldyq sektoryn­da búgingi apatty jaǵdaıdan 2020 jylǵa shyǵynsyz, energotıimdi jáne 2015 jylǵa qoljetimdi, úmitti aqtaıtyn, qaýipsiz kezeńge ótetin negizgi sharalar júıesi belgilengen. Oqýdy damytýdyń negizgi ba­ǵyty jeke ynta esebinen mektepke deıingi oqýdy jetkilikti qamtama­syz etý, básekelestikke tózimdi jo­ǵary bilimge, sapaly mekteptik daı­yndyqqa, ıkemdi jáne tıimdi eńbek rynogyn jasaý negizinde kadrlardy tárbıeleý júıesine baǵyttalǵan. Densaýlyq saqtaý salasynyń negizgi mindetteri bolyp perıne­tal­­dy jáne balalar medısı­na­synyń qoljetimdiligi, emdeý uıym­darynyń kadrlyq, materıaldyq-tehnıkalyq jaǵynan qamtamasyz etilýi, sala­matty ómir saltyn kúsheıtý bolyp tabylady. 2015 jylǵa arnalǵan strategııa­ny júzege asyrý nátıjesinde my­nadaı jaǵdaılarǵa qol jetken: 2009 jylǵa qaraǵanda halyqtyń jan basyna shaqqandaǵy ósimi 2 esege jýyq, ekonomıka salasynda eńbek etetinder 630 myń adamǵa jetken nemese 16%, ómirdiń uzaqtyǵy – 70 jas, jeke ınvestısııalar kólemi – 350-380 mlrd. teńge, sheteldik ın­ves­tısııalar jan basyna shaqqanda 5,5-5,7 myń teńgeni, eksport 1,4 mlrd. AQSh dollaryn quraıdy. Qanat Bozymbaev sóziniń qory­tyndysynda osyndaı kúsh jumsaý­dyń nátıjesinde halyqtyń turmys deńgeıi ósetinin, sóıtip bıznestiń halyqaralyq básekelestik reıtı­ngin­de joǵary oryndardan kórinip, elimizdiń ońtústik aımaǵynyń da­mý­ynda kóshbasshy bolýǵa múmkindik bar ekendigin atap kórsetti. Bıznes-forým tizginin qolyna alǵan Elbasy oblysta iske asyryl­ǵan jobalarmen birge túrli keder­gilerge tap bolyp, eki jyldan beri júzege aspaı kele jatqan joba­lar­ǵa da erekshe toqtaldy. Sonyń biri – reseılik “EvroHımÝdobrenııa” kompanııasyna baılanysty másele. Shynynda á degende taý qoparar­daı bolyp kelgen “EvroHımÝdo­bre­nıeniń” ekpini ártúrli deńgeı­degi, ártúrli memlekettik dálizder­degi kedergilerden keıin báseńsip qalǵan bolatyn. Biraq ekonomıka­lyq áleýeti zor, júıesi dúnıe júzin shyrmap alǵan alyp kompanııa kedergi jasalyp jatyr eken dep “kóshke bergen taılaǵyn” suraǵan joq. Tıisti mınıstrliktermen, jer­gilikti bılikpen til tabysa otyryp, jumys júrgizýdi jalǵastyra berdi. Mine, Elbasy elge kerek osyndaı ınvestorlardy keýdesinen ıtergen­deı bolyp otyrǵan joǵary laýa­zymdy sheneýnikterge qarata ondaı basshylarmen jumys istese al­maıtynyn ashyq aıtty. Sóıtip, “EvroHımÝdobrenııa” máselesin bir aı ishinde sheship, onyń el eko­no­mıkasyn kóterý úshin jasamaq bolǵan jobasyna kedergi jasa­maý­dy qatań talap etti. Bıznes-forýmdy qorytyndyla­ǵan Elbasy, Jambyl oblysyndaǵy jaǵdaıǵa toqtala kelip, negizinen, oblystaǵy atqarylyp jatqan ju­mystarǵa jaqsy baǵa berdi. Taraz qa­lasynyń tazalyǵyna, kósheler men aýlalardyń jańara bastaǵa­nyna rızashylyǵyn aıta kelip: – Istelip jatqan jumys kóp, al isteıtin jumys odan da kóp. Jam­byl oblysynda qant qyzylshasy alqabynyń kólemi bir kezderde 16 myń gektarǵa deıin jetken. Búginde ol 2 myń gektar ǵana. Al bul óńirde qant qyzylshasy men júgeri ósi­rý­diń eń tájirıbeli mamandary bol­ǵan. Biz osyny qaıta qalpyna keltirýimiz kerek. Qazir biz qantty da, qant óndiretin shıkizatty da syrt­tan satyp alyp otyrmyz. Biz sútti satyp almaıyq dep elde sıyrlardy kóbeıtip jatyrmyz, etti satyp almaıyq dep mal bor­daqylaıtyn keshender júıesin sa­lyp jatyrmyz, al buryn kókónis­tiń 30 paıyzyn shyǵaratyn bolsaq, qazir sońǵy 3 jyldyń ishinde 70 paıyzyn shyǵaratyn boldyq. De­mek, halyqqa qajetti nárseniń bá­rin óz elimizde qolǵa alýǵa bolady. Sondyqtan, osynyń barlyǵyn oblystaǵy 9 údemeli ındýstrııa­lyq-ınnovasııalyq joba sheńberin­de qarastyrý kerek. Eger osynyń barlyǵy iske asatyn bolsa, ıaǵnı Jambyl oblysynyń ónimi 2 esege artatyn bolsa, óńir turǵyn­dary­nyń áleýmettik jaǵdaıy da jaqsy jaqqa qaraı bet buratyn bolady. Endigi jyly el táýelsizdiginiń 20 jyldyǵyn toılaımyz. Bul – qazaqtyń tarıhynda eshýaqytta bolyp kórmegen toı. Ata-babala­ry­myz ańsaǵan táýelsizdiktiń 20 jyldyǵy barlyǵymyz úshin óte zor, eń úlken qýanysh bolýy kerek. Biraq oǵan qur qýanyp qana qoı­maı, “qandaı tartýlarmen kelýimiz kerek?” dep oılanyp, iske kirisý qajet. Meniń oıymsha, barlyq oblys ortalyqtaryn, qalalardy, aýdandardy, aýyldardy retke kel­tirý kerek. Jastardy solaı qaraı tartyp, baýlý kerek. Ár aýyl ózin­she jańarý jaǵdaıyn oılasyn. Bu­ǵan aýyz sý, mektep, aýrýhana, kó­she, úı tazalyǵy men sol úı tóńi­re­gine jasyl jelek ósirýge deıin kiredi. Áıtpese, nemis pen orys­tardyń aýyldary jap-jasyl, tap-taza bolyp turady da, qazaqtardyń aýyldary toqal tammen otyrady. Qashanǵy jıyrmasynshy ǵasyrda júremiz? Keıbireýler aıtady deıdi, “ana aǵashty shaýyp tastańdar, shy­byn úımeleıdi” dep. Sondyqtan, bárimiz jumys isteýimiz kerek, 20 jyldyqty jaqsylap qarsy alýy­myz kerek. El táýelsizdiginiń 20 jyldy­ǵy­na baılanysty Elbasy tapsyrmasy Jambyl óńirinde aıtylǵanmen, ony jalpy qazaqstandyqtarǵa ar­naldy dep túsiný kerek. Jalpy, Jambyl oblysyn el táýelsizdiginiń 20 jyldyǵyna zor tartýlarmen kelýge múmkindigi mol deýge bolady. Bıylǵy jyldyń alǵashqy jarty­synda qurylys materıaldary men granıt buıymdaryn shyǵarý ón­dirisi men óndiristik negizde gúl ósirý sııaqty eki iri joba júzege asty. Endi ústimizdegi jylǵa jospar­lan­ǵan segiz joba bar. Onyń tórteýi Elbasy nazaryna usynyl­dy. Olar: “Myńaral Tas Kompa­nııasy” JShS-nyń sement zaýyty, “Taraz metallýrgııalyq zaýyty” JShS-nyń temir qorytý óndirisi, “Zapchast” AQ elektr-metallýr­gııa­lyq shaǵyn-zaýyt qurylysy jáne “Amangeldi GPZ” JShS-nyń shıki munaıdy qaıta óńdeý zaýytynyń qurylysy. Jalpy, Jambyl oblysynda aldaǵy ýaqytta 19 ınvestısııalyq joba júzege asyrylatyn bolsa, onyń ishinde elimizdi ındýstrııa­landyrý kartasyna oblys ákimdigi 3 jobany usynyp otyr. Qala men aýyldy kóriktendirý, kógaldandyrý jumystary da osyndaı úlken isterden bastaý alsa kerek. Kósemáli SÁTTIBAIULY, Jambyl oblysy.