Mine, búgin Astana Sammıti óziniń shymyldyǵyn ashady. Al buǵan deıin álemniń 56 memleketiniń basyn biriktirgen alyp Uıym forýmyn ótkizý úshin qarbalasty jumystar qarqyn alyp, kóptegen istiń tııanaǵy keltirildi. Bul rette Sammıtke qatysty árbir sharalar men daıyndyqtardyń, tipten Sammıt qonaqtaryna arnalatyn usaqtúıek zattardyń alatyn orny da erekshe boldy. Máselen, dúnıeniń ár qıyrynan kelip jetken joǵary mártebeli qonaqtar óz eline Qazaqstan jáne qazaq jurty týraly jaqsy ásermen oralýlary úshin olarǵa arnaıy ázirlenetin kádesyılardyń da óz órnegimen, óz ásemdigimen “menmundalap” turǵany jónaq qoı...
Osy oraıda, elimizdiń qoldanbaly óneriniń has sheberleri dástúrli kádesyılarǵa sońǵy órnekterin engizip, al dızaınerler ımıdjdik ónimder keskininiń kóz tartarlyq sıpatta bolýy úshin barlyq múmkindikterin paıdalandy. Iаǵnı, eń bastysy, shyǵarmashylyq qabiletti jan-jaqty kórsetýge barlaryn saldy.
Árıne, kádesyılardyń neǵurlym ulttyq boıaý men ulttyq naqyshqa saı jasalýy óz isiniń qyrsyryn tereń meńgergen qolóner mamandarynyń sheberligine baılanysty bolary sózsiz. Ulttyq úlgide tigilgen ádemi qýyrshaqtar men aǵashtan oıyp jasalǵan ydys-aıaq, oıý-órnekpen kómkerilgen alasha, qasqyr men túlki terisinen jasalǵan bórik syndy buıymdardyń kez kelgeni Qazaqstanǵa kelgen árbir qonaqtyń nazarynan tys qalmasy anyq. Shyn sheberlerdiń qolynan shyqqan kádesyılardyń qadirli qonaqtar kóńilinen shyǵatynyna osy salada júrgen mamandardyń ózderi de senimdi.
Aınagúl QÝANǴALIEVA, dızaıner:
– Bizdiń qýyrshaq-fıgýralarymyzdyń ereksheligi – olar qonaqtardy elimizdiń, Astana qalasynyń tórine shaqyrady. Máselen, bizde kishkentaı kıiz úıdiń tóri bar. Mundaı kádesyılar, eń aldymen, bizdiń qonaqjaılyǵymyzdyń belgisi ispetti. Olardy “Biz sizderdi shaqyramyz! Bizdiń tór sizder úshin árdaıym ashyq” degen sózdermen Qazaqstanǵa kelgen sheteldikterge usynýǵa bolady.
Roza ÁBENOVA, kórkemdik salonynyń art-dırektory:
– Sheber qoldan shyqqan qýyrshaq pishindes kádesyılardyń búkil álemge taraıtynyn, sol arqyly jat el jurtshylyǵynyń qazaq qyz-kelinshekteri men jigitteriniń ózderine tán erekshelikteri men syr-symbaty týraly da biletinin ishteı sezinýdiń ózi kóńilge jylylyq uıalatady eken. Sondyqtan, mundaı kádesyılardyń qaı-qaısysy bolsyn bedeldi Uıymnyń Astanada bastalyp otyrǵan Sammıtine kelgen joǵary laýazym ıelerine, meımandarǵa jaqsy áser qaldyryp, olar bizdiń ónimderimizdi jyly qabyldaıdy dep senemin.
“Astana qalasynyń kásipkerlik jáne ónerkásip basqarmasy” MM bastyǵynyń orynbasary Rysgúl Qaýǵabaevanyń aıtýynsha, Sammıt qarsańyndaǵy is-sharalardyń árqaısysy joǵary deńgeıde uıymdastyrylǵan kórinedi. “Máselen, “Astana qalasynyń kásipkerlik jáne ónerkásip basqarmasy” memlekettik mekemesi syrtynda OSCE Kazakhstan 2010 degen jazýy bar kishkentaı qorapshalardy qonaqtarǵa syıǵa tartpaq nıette eken. Bul qorapshalardyń árqaısysynda Qazaqstannyń týy beınelengen 4 konfet bolady. Olardyń barlyǵy da otandyq konfet óndirýshi fırmalardyń ónimderi. Iаǵnı, qonaqtar jaıǵasqan qonaqúılerdiń barlyǵynda da osyndaı kádesyılardy kezdestirýge bolady. Mundaı kádesyı qorapshalarynyń jalpy sany 6 myńdy quraıdy. Konfet pishindes kádesyılar qonaqúılerdiń árbir bólmesinde bolady. Sondaı-aq, elordadaǵy meıramhanalarda da qonaqtarǵa “shyǵys táttileri”, meıramhanalardyń ózderiniń bokal, krýjka sekildi ımıdjdik ónimderi, ulttyq naqyshta jasalǵan kádesyılary usynylmaq”, – deıdi Rysgúl Boranbaıqyzy.
Elordadaǵy “Astana óndirisi” JShS de bul sharadan syrt qalmapty. Máselen, syrtynda EQYU men onyń Sammıtiniń logotıpi beınelegen aıran, irimshik sekildi sút ónimderiniń qutylary da elimizdegi mekemelerdiń bul sharaǵa beı-jaı qaramaǵandyqtarynyń belgisindeı kórinedi.
Estelik kádesyılar – resmı emes syılyqtar. Sol sebepti dızaınerlik stýdııalarda Sammıttiń logotıpin ǵana emes, sondaı-aq, Qazaqstanda ótetin aýqymdy is-sharany aıshyqtaıtyn zattardyń, máselen, syılyq túrindegi portfelderdiń, papkalar men bılbordtarǵa arnalǵan qalamsaptardyń nusqalary ázirlenbek. Demek, Sammıtke kelgen árbir qatysýshy kóptegen mazmundy málimetteri bar EQYU-nyń arnaıy sımvolıkasy beınelengen papkalardy ǵana emes, sondaı-aq, Qazaqstan elordasy – Astana “jaýharlary”, onyń ishinde elordanyń eń tańdaýly, betke ustar degen qonaqúıleri jóninde qysqasha aqparattar jazylǵan anyqtamalyqtarmen de tanysa alady.
Dúnıe júzindegi eń bedeldi uıymdardyń birine tóraǵalyq etý arqyly ózin dúıim álemge tanytýǵa umtylǵan Qazaqstan jáne onyń ulttyq ereksheligi týrasynda jan-jaqty maǵlumattary bar dıskiler de Sammıt qonaqtaryna tabys etilmek. Al dúıim dúnıe dıdaryn ózine qaratatyn sharanyń basy-qasynda júrgen jandardyń nazarynan Astana qalasy kartasynyń kórinisin daıyndaý da syrt qalmapty. Ol karta EQYU-nyń eki jumys tilderi – aǵylshyn jáne orys tilderinde málimet beredi.
Bir atap óterligi, Sammıtke qatysty arnaıy resmı, ıaǵnı baspa ónimderdi óndirý kezinde eshqandaı da áýesqoılyqqa jol berilmeıdi eken. Iаǵnı, Sammıt logotıpiniń ózi Syrtqy ister mınıstrligi bekitken úlgilerge sáıkes jasalǵan. Sonymen qatar, bul zattardyń basty ereksheligi – olarda, eń aldymen, Qazaqstan tóraǵalyǵynyń logotıpi men elimizdiń sımvoldary, onyń ishinde tý elementteri aıshyqty túrde bezendirilgen. Taǵy bir eskererligi, logotıp tek qaǵaz betinde ǵana emes, sondaı-aq plastık zattary men bylǵarydan jasalǵan ónimderde de kórinis tapqan.
Elimizdiń, Qazaqstan elordasy – Astananyń atyn aıdaı álemge tanytatyn mezet te kelip jetti. Qazaq qashanda qonaqjaı qasıetimen tanylǵan halyq. Demek, sol qasıetin barynsha kórsetip, elimizdiń bar bolmysymen tanylar tusy da osy sát bolsa kerek.
Árıne, eshkim eshkimge ońaılyqpen senim bildirmeıdi. Memleket basshysy Nursultan Nazarbaevtyń: “Osy tarıhı mindetti jaqsylap ótkizý, eldiń esinde qalatyndaı bolý, ózimizdiń, Astananyń, memlekettiń sondaı sammıtti ótkizý qabileti bar ekenin bildirý kerek. Bul taǵy da bizdiń eldiń dárejesin kóteredi, Qazaqstandy dúnıe júzine belgili etedi”, – degen sózi barsha halyqqa úlken senim artyp otyrǵanynyń belgisi. Sebebi, ózine asqan jaýapkershilikpen alǵan bul sharany úlken abyroımen atqaryp shyǵý – eldigimizge syn. Sondyqtan oǵan qatysty kez kelgen is-shara sátti júzege asqan saıyn Qazaqstannyń álem aldyndaǵy bedeli de kóterile túspek.
Láılá EDILQYZY.
