Jańarý jasampaz jobalarǵa jol ashady

Keshe Ortalyq kommýnıkasııalar qyzmetinde «Atameken» ulttyq kásipkerler palatasynyń basqarma tóraǵasy Abylaı Myrzahmetov baspasóz máslıhatyn ótkizdi. Ol burnaǵy kúni Májilis depýtattarynyń jarııalaǵan úndeýine qatysty otandyq kásipkerlerdiń pikirin bildirdi. Aptanyń sársenbisi kúni el Parlamentindegi úsh partııalyq fraksııanyń jetekshileri kóterip, usynǵan úndeýdi qalǵan depýtattardyń barlyǵy biraýyzdan qoldaǵany málim. Kásipkerler palatasynyń basshysy mundaı usynystyń óz ýaqytynda, oryndy kóterilgenin aıta kelip, sońǵy ýaqytta Parlament depýtattary bıznes-qaýymdastyqtarmen tyǵyz baılanysta jumys istegeni jóninde áńgimeledi. «Atameken» ulttyq kásipkerler palatasy atynan kúni keshe ǵana ózderińiz kýá bolǵan Májilis depýtattarynyń, sonyń qatarynda, parlamenttik partııa fraksııalary basshylarynyń bastamasyn qoldap, elimizde merziminen buryn Májilis saılaýyn jáne oǵan barlyq deńgeıdegi máslıhat saılaýyn qosa ótkizý bastamasyn qoldaıtynymyzdy jetkizgim keledi. Qazirgi álemde oryn alyp otyrǵan ekonomıkalyq qıyndyqtar bizdiń elge de óz áserin tıgizýde. Sondyqtan, depýtattardyń bul bastamasy óte oryndy dep sanaımyz. Barshaǵa málim, ótken jyly Elbasynyń «100 naqty qadam» Ult Jospary aıasynda úlken jumystar atqaryldy. Naqty aıtqanda, «Atameken» ulttyq kásipkerler palatasy da barlyq 82 zań jobasyn daıyndaýǵa atsalysyp, sol zańdardy Parlament depýtattarymen birge ekshep, ózderiniń tıisti usynystary men tilekterin engizdi. Ulttyq palata Májilis depýtattarymen osylaı qoıan-qoltyq jumys istedi. Áńgimeni osy maqsatqa oıystyrsaq, endi Ult Jospary aıasynda naqty jumystar atqarylýy qajet. Osyndaı úlken sharalar qarsańynda Májilis depýtattarynyń, partııalardyń saılaýǵa túsip, eldiń oı-pikirin bilýi, mandatyn alýy bizdiń oıymyzsha, ıgi bastama jáne biz bul bastamany qoldaımyz», degen palata basshysy, álemdik syn-qaterlerge tótep berý úshin atalǵan saılaýdy jyl sońyna deıin sozbaý lázim ekenine nazar aýdartty. Elimizdegi ekonomıkalyq ahýal men ony ońaltý sharalary da palata basshysynyń tiline tıek boldy. «100 naqty qadam» Ult Josparynyń 50 qadamnan astamy ekonomıka, sonyń ishinde, kásipkerlerdi qoldaýǵa baǵyttalǵan. Sondyqtan, kásipkerler Elbasy jarııalaǵan Ult Josparynyń naqty oryndalýyna, onyń oń nátıjelerge qol jetkizýine múddelimiz. Taǵy bir aıtarlyǵy, aıtýly jospardyń arqasynda Kásipkerler kodeksi qabyldandy, kásipkerler quqyǵyn qorǵaıtyn Bıznes-ombýdsmen ınstıtýty bar. Oǵan qosa, ındýstrııany damytý, shaǵyn jáne orta bıznesti qoldaý, shetelden ınvestısııalar tartý, Úkimet pen kásipkerliktiń birlesken jumystaryn damytý sekildi aýqymdy sharalar josparlandy. Osy ıgiliktiń bárin eskere kelip, Májilistiń jańalanyp, jańa mandatpen atalǵan jumystarǵa kirisýin qoǵam bolyp qoldaǵanymyz abzal dep bilemiz. Sol sebepti, túrli qoǵamdyq kúshterdi, barlyq azamattardy depýtattar bastamasyn qoldaýǵa shaqyramyz», dedi A.Myrzahmetov. Nurbaı ELMURATOV, «Egemen Qazaqstan».