Halyqtyń jaýaby birtekti

Keshe Ortalyq telekommýnıkasııa qyzmetinde Parlament Májilisiniń saılaýyn merziminen buryn ótkizý jónindegi depýtattar bastamasyna halyqtyń qalaı qaraıtyndyǵy týraly áleýmettik zertteý qurylymdary júrgizgen saýaldamalar boıynsha esep berildi. Birinshi sóz alǵan «Demokratııa ınstıtýty» ǵylymı-zertteý qaýymdastyǵy» qoǵamdyq uıy­mynyń dırektory Iýlııa Kýchın­ckaıa depýtattardyń keshegi ún­deýinen keıin biz memlekettik organdar, azamattyq qoǵam ıns­tıtýttary jáne JOO-lardyń kóptegen ókilderi arasynda jedel-saýaldama júrgizdik. Sonyń ishinde 97 sarapshy boldy. Endi sonyń nátıjeleri týraly aıtsam, ol bylaı boldy: suralǵandardyń 95,6 paıyzy májilismenderdiń bastamasyn qoldaıtyndaryn aıtty. Sonyń ishinde 94,8 paıyzy depýtattardy merziminen buryn saılaý daǵdarysqa qarsy sharalardyń qataryna jatatynyn atap ótti. Sarapshylardyń 94,1 paıyzy Májilis jáne túrli deńgeıdegi máslıhattar saılaýlaryn birge ótkizýdi saılaýǵa bólinetin memlekettik qarjyny únemdeý turǵysynan tıimdi dep sanaıdy. Sonymen qatar, sarapshylardyń 90 paıyzdan joǵary bóligi besinshi shaqyrylǵan Parlament Májilisiniń depýtattary ózderiniń negizgi mıssııasyn oryndady dep esepteıdi. Suralǵandardyń 96,7 paıyzy Bes ınstıtýttyq reforma – Ult Josparyn oryndaý úshin Májilis depýtattarynyń saılaýy tez arada ótkeni jón dep sanaıdy. 94,2 paıyzy Parlament jumysyn ártaraptandyrýdyń mańyzdylyǵyn atap ótken. Olar saılaýǵa jańa partııalardyń túsip, óz depýtattaryn ótkizgenin jón kóredi. Eýrazııalyq ıntegrasııa ınstıtýtynyń áleýmettik zertteýler bóliminiń meńgerýshisi Botagóz Tórehanova da óz qyzmetteriniń jedel-saýaldama ótkizgenin aıtty. Biz barlyǵy 615 adamǵa saýal berdik, dedi ol. Sonyń ishinde 82,5 paıyzy Májilis depýtattarynyń úndeýi týraly habardar bolyp shyqty. Sonyń ishinde 93,6 paıyzy saılaýdy merziminen buryn ótkizgendi durys dep sanaıtynyn jetkizdi. Suralǵandardyń 97,2 paıyzy Májilis pen máslıhattar saılaýlarynyń birge ótkizilgenin qalaıtynyn aıtty. О́ıtkeni, bul bıýdjet qarajatyn únemdeýge qol jetkizedi dep esepteıdi olardyń bári. Respondentterdiń 93,5 paıyzy Májilis depýtattarynyń saılaý­yn tez arada ótkizýdi durys dep sanaıdy eken, óıtkeni, olar Ult Josparyn iske asyrýǵa belsene qatysýǵa tıisti. Suralǵandardyń 94,6 paıyzy Májilistiń burynǵy quramy óz mindetterin tolyǵymen oryndaǵanyn málimdepti. Qoryta aıtqanda, saýaldama júrgizgen eki uıym da bir-biriniń sózderin aına-qatesiz qaıtalap bergen, demek, halyqtyń jaýaby birtekti bolǵan. Jaqsybaı SAMRAT, «Egemen Qazaqstan».