Atyraýda qujatsyz, baspanasyz otbasy músheleri anyqtaldy

ATYRAÝ. 14 qańtar. Atyraýda bes múshesi bar qujatsyz, baspanasyz otbasy turatyndyǵy anyqtaldy. Olardyń ahýaly Atyraý qalasy ákimdiginiń baqylaýyna alyndy. Bul týraly egemen.kz tilshisi habarlady. Buǵan deıin nur.kz saıtynda Atyraýda bir otbasynyń qujatsyz, baspanasyz qalǵany, qazirgi ýaqytta jylýsyz ýaqytsha saraıda turyp jatqany habarlanǵan edi. Osyǵan baılanysty Atyraý qalasynyń ákimdigi tómende anyqtalǵan jaıttarǵa baılanysty resmı málimdeme taratty. Shyndyǵynda, 1962 jyly týǵan N.Orlov pen 1974 jylǵy E.Prıdanovanyń azamattyq nekeden úsh balasy bar eken. Balalary 2011, 2013 jáne 2015 jyly týǵan. Otbasy músheleriniń barlyǵynyń da jeke basyn kýálandyratyn qujattary joq ekeni anyqtalyp otyr. Qala irgesindegi sharýa qojalyǵynda turǵan baspanasy órtenip ketipti. Búgin osy jaıttardy anyqtaǵan ákimdik janynan qurylǵan arnaıy komıssııa sheshimimen N.Orlov turǵylyqty mekenjaıy anyqtalmaǵan tulǵalardy beıimdeý ortalyǵyna, al E.Prıdanova úsh balasymen birge áıelderge arnalǵan daǵdarys ortalyǵyna ornalastyryldy. Endi qalalyq ákimdiktiń jumyspen qamtý jáne áleýmettik baǵdarlamalar bóliminiń mamandary AHAJ qyzmetkerlerimen birge jeke basyn kýálandyratyn qujattaryn qalpyna keltirýge jáne N.Orlovty jumysqa ornalastyrýǵa kómegin bermek. Sonymen birge, 1 jasqa deıingi bala kútimine baılanysty jáne balalar járdemaqysyn rásimdeýge de kómek beriledi. Komıssııa músheleri N.Orlov pen E.Prıdanovanyń jeke ıeliginde turǵyn úıiniń bar-joǵyn anyqtaýǵa da kiristi. Olardyń attarynda turǵyn úı tirkelmegen bolsa, olardy baspana alý kezegine qoıý úshin qujattary jınaqtalmaq. Bul otbasynyń qazirgi ahýaly osylaısha Atyraý qalalyq ákimdiginiń baqylaýyna alyndy. Joldasbek Shópeǵul. Derek: egemen.kz. Sýret: nur.kz.