Jańasha serpin bastaýy

Parlament depýtattarynyń Memleket basshysy N.Á.Nazarbaevtyń atyna joldaǵan úndeýi batysqazaqstandyq jurtshylyq ókilderi arasynda tıisti qoldaý men tereń túsinistik taýyp otyr. El men turǵyndar tilegin ári olardyń senimderin arqalap júrgenderdiń biri jergilikti máslıhat depýtattary ekeni anyq. Osy oraıda, Oral qalalyq máslıhatynyń hatshysy A.Ú.ÁÝBEKEROVPEN áńgime búgingi kúni barsha qazaqstandyqtar arasynda úlken jańǵyryq týǵyzyp otyrǵan máseleler jóninde órbidi. – Aqqalı Úmbetqalıuly, Parlament Májilisi men barsha deńgeıdegi máslıhat depýtattaryn merziminen buryn saılaý jónindegi bastama sizdi qandaı oıǵa qaldyrdy? – Jeke óz basyma qatysty aıtsam, Parlament depýtattarynyń Elbasynyń atyna jazǵan úndeýin «Nur Otan» partııasynyń mú­shesi retinde tolyǵymen qoldaımyn. Búgingi kúni ár qazaqstandyqtyń el múddesine qyzmet jasaı bilýi burynǵy qaı kezdegiden de mańyzdyraq bolyp otyr. Bul másele El­basynyń «Ult Jospary – qazaqstandyq armanǵa bastaıtyn jol» atty maqalasynda da jan-jaqty saralanǵan. Qazirgi kúni biz bárimiz jańa mindetter men tereń jaýapkershilikter júkteletin kúrdeli de syndarly sáttiń aldynda turmyz. Bir esepten úndeý osyndaı tyń isterdi tezirek qolǵa alý qajettiginen de týyndady dep oı túıýge bolady. Osylaısha, Parlament pen jergilikti máslıhat depýtattary merziminen buryn qaıtadan saılanatyn bolsa, tyń bastamalar men irgeli izdenisterge muryndyq bola alatyn tulǵalar Parlament qabyrǵasyna keledi degen oıdamyn. Sondaı-aq, bul úrdis qa­zaqstandyq qoǵamnyń odan ári jańǵyryp, iste jańa serpin paıda bolýyna da óz áserin tıgize alatynyna eshqandaı kúmánimiz joq. Eń bastysy, Parlament depýtattary úndeýi máni joǵary, qısyny bar sheshim dep sanaımyn. Osy arqyly ult birligin odan ári tereńdetip, daǵdarystyń tıgizetin zııanyn jeńildetý jóninde utymdy joldardy belgileýge bolatyny anyq. Qysqasy, merziminen buryn saılaý ótkizý qazirgi kúrdeli kezeńniń talabynan týyndap otyrǵany kúmánsiz. Jergilikti máslıhat depýtattarynyń korpýsy bolyp sanalatyn áriptesterim de bul usynysqa kelisedi degen oıdamyn. – Ult Jospary men bes ınstıtýttyq reformany júzege asyrý boıynsha prak­tıkalyq qadamdar bastalyp otyr. Buǵan baılanysty qolǵa alynǵan qandaı isterdi atap kórsete alar edińiz? – О́te oryndy suraq. Osy aptada ótkizilgen oblystyq máslıhattyń kezekten tys ses­sııasynyń kún tártibine ishki ister departamenti jergilikti polısııa qyzmetiniń basshysy laýazymyna máslıhat de­­pý­tattarynyń kelisimin berý týraly másele engizildi. Osy másele boıynsha jergilikti polısııa qyzmeti basshysy laýazymyna buǵan deıin bul salada ózin jaqsy qyrynan kórsete bilgen Manarbek Ǵabdýllındi taǵaıyndaýǵa kelisim berildi. Ol buǵan deıin Oral qalalyq ishki ister basqarmasynyń bastyǵy qyzmetin atqarǵan. – Búgingi kúni jergilikti jerde qoǵamdyq keńesterdi qurý máselesi aıryqsha ma­ńyzǵa ıe bolyp otyr. Bul máseleniń qazirgi jaı-kúıine qatysty ne aıtar edińiz? – Atalǵan másele jergilikti depýtattar korpýsy qyzmetiniń mazmunyn baıytyp, odan ári tereńdete alady. Onyń músheleri bedeldi, isker, el arasynda abyroıly adamdar qatarynan irikteledi dep esepteımin. Olar qoǵamdaǵy túıtkildi máselelerdi jergilikti bılik organdarynyń nazaryna jetkize alatyn, oı-órisi keń adamdar qatarynan jasaqtalýyna nazar aýdaryp otyrmyz. Áńgimelesken Temir QUSAIYN, «Egemen Qazaqstan». Batys Qazaqstan oblysy.