Saılaý – halyq birligin nyǵaıtady

 Zań ǵylymdarynyń doktory, akademık Sultan SARTAEVPEN áńgime – Sultan aǵa, qazaqtyń eń joǵary zań shyǵarýshy organnyń abyroıly aqsaqal ardageri retinde aıtyńyzshy: Májilis depýtattarynyń ózderiniń óki­lettigin merziminen buryn toqtatý týraly usynysy naqty qandaı sebepterden týyp otyr? – Birden kesip aıtaıyn, bul arada eshqandaı da májbúrlik joq! Men qazir Parlament pen Úkimettiń jumysyna ti­ke­leı aralasyp otyrǵan adam emespin. Kóbinde syrttan ǵana baqylaımyn. Jaq­sysyna qýanamyn, jamanyna muńaıamyn. Saıasatkerlerdiń ishindegi jas jaǵynan eń úlkeni de menmin. Jasym 90-ǵa kelip qaldy. Al endi Parlamenttiń usynysy týraly kánigi parlamentshi-zańger retinde aıtarym: bul zamanda ózgermeıtin eshteńe joq. Tóńirektegi dúnıeniń bári-bári ómirdiń talabyna saı bolý qaǵıdattaryna sáıkes qurylǵan. Parlamenttiń ózi usynys jasap otyrsa, ony men maquldaımyn. Muny elimizdegi eń joǵary zań shyǵarýshy organnyń bolashaq óristeýdi kózdegeni dep qabyldaımyn. Zań boıynsha depýtattar ózderiniń ókiletti merzimi ishinde mindetterin atqara almasa, ol da olarǵa úlken syn. – Siz depýtattarymyzdyń ótken qyz­met merzimi ishinde 80-nen astam zań jobalaryn jasap shyǵarǵanynan habardarsyz dep oılaımyn? – Árıne, árıne... habardarmyn. Bul Parlament óz mıssııasyn oıdaǵydaı oryndap shyqty. Oǵan daýym joq. Aıtpaǵym, qazaq Par­lamenti maǵan qaı kezden de ystyq. Múmkin bolsa, olardyń atqaryp jatqan is-áreketterinen habardar bolyp otyrǵandy janym jaqsy kóredi. Jasyratyn nesi bar, keıde olardyń jumysyna qar­nym ashyp qalatyn kezderdiń ótkenin de eske salýǵa tıispin. Ásirese, men belsendilik tanytpaı, depýtattyń atyn jamylǵan halyq qalaýlylaryn sondaı mártebeli ǵımarattan oryn alýy durys dep sanamaımyn. Ondaı depýtattardyń elge ákeletin paıdasy, óristi joly joq. Depýtat – oıly, kóregen, kópshil, bilgir, tez sheshim qabyldaıtyn alǵyr azamattar bolsyn. – Sońǵy eki-úsh kúnniń ishindegi BAQ kóleminde jarııalaǵan usynysty qol­daýlar basym daýysqa ıe bolyp otyr... – О́ıtkeni, bizdiń halyq óziniń bola­shaǵyna selqos qaraı almaıdy. Halyq úshin eldiń, jerdiń qamyn oılaý úrdisi eshýaqytta úzilmek emes. Kóp jaǵdaıda bizdiń taǵdyrymyzdy sheshetin sol Par­lament. Elbasynyń jyl basynda jarııalaǵan qazaqstandyq armanǵa bastaıtyn Ult Josparyn men de tııanaqtap oqyp shyqtym. Qazir bizge bul baǵytta tyndyrymdy qyzmet isteıtin qaǵilez, jyldam, jańashyl depýtattar aýadaı qajet. Adam aǵzasynda qan aýys­tyrǵan sekildi depýtattar qataryn jańa zaman lebine úndesetin, úles qosatyn azamattarymyzben tolyqtyrsaq nesi aıyp?! Olardyń qata­rynda«Prezıdenttik jańa jobalar aıasynda biz elimizdi qalaı etkende kórkeıtemiz?» deıtin halyq qalaýlylary júrsin. – Áleýmettik jelilerde keıbir sarapshylar daǵ­da­rys kezindegi saılaý elge salmaq salady degen pikir­lerin de bildirip qoıýda, bu­ǵan ne deısiz? – Men buryn da talaı aıtqanmyn, qazir de qaıtalaımyn. Bizdiń elimizdiń baılyǵy qajet dese 1 mıllıard halyqty asyraýǵa jetedi. Ol eldegi azamattarymyzdyń rýhanı baılyǵymen úıleskende, Elbasymyz Nurekeń aıtqandaı, biz eshteńeden de tar­shylyq kórmeımiz. Endeshe, eldiń muqtajyn qazirgi zamanǵy eń joǵary tehnologııalar negizine beıimdep, paıdalana bileıik. Bizdiń ata-babalarymyz sonaý Uly Dala demokratııasynyń dúrildep turǵan keziniń ózinde halyqtyń bolashaǵyn oılaǵan joq dep aıta alasyzdar ma? Oılaǵanda qandaı! Sebebi, onyń jarqyn jemisin, oń nátıjesin búgingi tańda ózderińiz de kórip otyrsyzdar. Qazaqstannyń búgingi alǵa qaraı jedeldegen umtylysy sonyń aıǵaǵy emes pe? Qazaqtyń mańdaıyna 100 jylda bir bitken tulǵasy Nursultan Nazarbaev Alla jar bolyp, jas memleketimizdi osynaý óristi jolmen, halyqtyń uıysqan kelisimimen alǵa bastap júre bersin dep tileımin. Bul kisi búgingi kúnniń patrıarhy desek, artyq aıtqanym emes. – Qoǵamdyq uıymdar men barsha kóp­shilik jappaı talqylap, Parlament Májilisi depýtattarynyń atalǵan usyny­syn qyzý qoldaýda. Prezıdentimiz qandaı sheshim qabyldar eken, tájirıbeli zańger retinde óz oıyńyzben bólisińizshi. – Nurekeń bul Parlamenttiń usynysyn qoldaýy kerek qoı dep oılaımyn. Bul saılaýdyń salmaǵy ózin ózi aqtaıtyn saılaý bolǵaly tur. О́ıtkeni, depýtattar bastamasy Parlament Májilisiniń jáne barlyq deńgeıdegi máslıhattardyń saılaýlaryn ótkizý negizine qurylǵan. Ol eń al­dymen, búgingi zamannyń suranysyna jaýap beredi. Elbasynyń elimizdiń aldyna qoıǵan aýqymdy mindetteriniń ózi de osynaý jańashyldyqty talap et­ip otyr. Onyń ústine, saılaý qaı kezde de halyqtyń birligin burynǵydan da ny­ǵaıtady, daǵdarysqa qarsy baǵyttyń qýatyn burynǵydan da kúsheıtedi, siz bilesiz be?! – Sultan aǵa, mańyzdy áńgimeńiz úshin úlken rahmet. Áńgimelesken Talǵat SÚIINBAI, «Egemen Qazaqstan».  ALMATY.