Halyq qalaýy – jas býyn

Elbasy N.Á.Nazarbaev jahandyq qaterlerdi shuqyp kórsetip, eńseretin naqty josparyn usyndy. Bes ınstıtýttyq reformany júzege asyrýdyń «Jol kartasyn» jasady. Jahandyq naqty ahýal jaǵdaıyn sarapqa sala otyryp «100 qadam» Ult Josparyn daıyndady. Osy Uly Jospardy naqty ómirde iske asyrý qaınar kózderin kórsetip «Ult jospary – Qazaqstandyq armanǵa bastaıtyn jol» atty saıası maqalasyn halqyna arnap is basynda otyrǵandar aldyna qoıdy. Onda qozǵalǵan máselelerdiń birnesheýine toqtalsaq: birinshiden, kadrlardyń kásibı deńgeıin kóterý. Bul degenińiz basshylyq kadrlarmen qatar qoǵamdy alǵa súıreıtin jumysshy tobyna qazirgi dáýirdegi ǵylymı-tehnıkalyq progresti ıgertý, álemdik standart deńgeıinde ónim óndiretin mamandardy daıyndaý degen sóz; ekinshiden, zań salasyn reformalaý. Munyń da qatpar-qatpar qyrtysy, saıası jáne sanalyq ıirimi, asý bermes aıqaı dúnıesine taza aýa kire bastady; úshinshiden, eńbekti baǵalaý. Búgingi jaǵdaıda jumysshylar men dıhandardyń tókken teri men etken eńbeginiń jemisin basshysy kóretin ádiletsiz júıeni ornyna qoıýǵa úlken yqpal etetinin aıtý jón sııaqty; tórtinshiden, ashyq memleket qurý. Jemqorlyq jaılaǵan myna zamanda halyqtyń qaltasynan jınalǵan úkimettik qarjy men jer baılyǵynan quıylyp jatqan mol baılyqtyń qaıda, nege jumsalyp jatqanyn anyq ta ashyq baqylap otyrý úshin quqyqtyq tetigi qajet edi. Mine, sol móldirlikti, ádilettilikti, adaldyqty iske asyratyn júıe kózin Elbasy naqty kórsetip berdi; besinshiden, ınvestısııa, ınnovasııalyq-ındýstrııalyq baǵytty myqtap ustanyp el baılyǵyn molaıtý jolyn Elbasy taǵy da naqtylap berdi. Osynyń bári, aınalyp kelgende, Táýelsizdikti saqtaý, ulttyq uıysý prosesin qalyptastyrý bolmaq. Munda ekonomıkalyq birlikpen qatar, eldiń ıdeıalyq-rýhanı salasyn qalyptastyrý máselesi tur. Ideıalyq-rýhanı birigý, toptasý ǵana emes uıý, uıysý. Munda ultaralyq kelisim, búkil halyqtyń, ulttyń ulttyq uıysý máselesin Elbasy sóz etip otyr. Bul óte úlken ári jaýapty jáne qazaq qoǵamy úshin qajetti prosess. Bul prosesti iske asyrý arqyly Táýelsizdigimizdi máńgilikke saqtaı alamyz. Elbasy elimdi, halqymdy qaıtsem daǵdarystan alyp shyǵamyn dep jantalasyp jatqan kezde, Májilis depýtattary merziminen buryn saılaý ótkizý týraly bastama kóterdi. Besinshi shaqyrylymdaǵy depýtattar da hal-qaderinshe jumys jasady. Olardyń jasaǵan isin baǵalamaı qoıýǵa bolmaıdy. Elbasynyń joǵaryda biz aıtqan Ult Jospary jáne ony iske asyrý naqty qadamdaryn ómirge engizý úshin bılik pen halyqtyń arasyn uıystyratyn jańa kúsh, jańa lep, jańa ıdeıa, jańa býyn qajet bolyp tur edi. Mine, sonyń kúni týdy. Jańadan shaqyrylatyn Parlament saılaýyna oı erkindigi bar, zamannyń aýanyna qaraı tyń ıdeıalar usyna alatyn, halyq pen Úkimettiń arasyn baılanystyratyn memleketshil azamattar, sonyń ishinde jastar mol bolsa, el basqarý isiniń júıke-júıesine taza qan júgirer edi. Sonda búkil álem tolǵatyp otyrǵan osynaý almaǵaıyp zamanda qazaq qoǵamy uly ózgeristerge qazirgiden de góri belsendi ileser edi. Jáne de Elbasy usynyp, halqymyzdyń armanyna aınalǵan Ult Jospary júzege asyp, Táýelsizdiktiń qasıetti Kók týyn tik ustap, qazaq qoǵamynyń mańdaıy jarqyraı túser edi. Qarjaýbaı SARTQOJAULY, professor, túrkitanýshy. ASTANA.