Shyraıly shańyraq shattyǵy

О́ńirde jalpyulttyq «Úlken el – úlken jobasy» sheńberinde «Táýelsizdikke – 25 jyl» aksııasynyń bastalýyna oraı Petropavl qalasyndaǵy Teatr alańyna 2,5 myńnan astam jas jınalyp, flesh-mob uıymdastyrdy. Olarǵa kóterińki merekelik kóńil-kúıdegi shahar turǵyndary qosylyp, sharany tipti nurlandyryp jiberdi. Qytymyr qystyń qyspaǵyna qaramastan, aq nıetke toly jyly lebizdermen kelgen jurtshylyq aldynda oblys ákimi Erik Sultanov sóz sóılep, Táýelsizdik jylyna arnalǵan sharanyń aımaqta bastalǵanyn jarııalady. – Elbasy N.Nazarbaev Qazaqstan Respýblıkasy Táýelsizdiginiń 25 jyldyǵyn merekeleýdiń saıası mańyzyn atap ótip, búkilhalyqtyq mereke retinde toılaýǵa aıryqsha nazar aýdardy. Elimizdiń barlyq óńirlerinde bastaý alǵan shara ata-babalarymyz ǵasyrlar boıy alǵan táýelsizdik qundylyqtaryn qadirlep-qasterlep, kózdiń qarashyǵyndaı qorǵaýǵa, óskeleń urpaqty qazaqstandyq patrıotızm rýhynda tárbıelep, eldi, jerdi súıýge jeteleıdi. Prezıdentimizdiń syndarly saıasaty arqasynda shırek ǵasyr ishinde álem tanyǵan qýatty memleketke aınaldyq. Aldaǵy uly maqsatymyz–órkenıetti elder qataryna qosylý, «Máńgilik El» ıdeıasyn ornyqtyrý. Oǵan jetý joldary bes ınstıtýttyq reformada naqty aıqyndalǵan,–dedi jınalǵandarǵa qarata aıtqan sózinde Erik Hamzauly. Aksııaǵa etnomádenı birlestikterdiń, úkimettik emes uıymdardyń ókilderi, joǵary jáne arnaýly oqý oryndarynyń stýdentteri belsene aralasyp, dýmanǵa aınaldyrdy. Eńbek ardageri Alekseı Krotenko halqy yntymaqty, tatý-tátti Qazaqstan sııaqty elde turýdy ózine baqyt sanaıtynyn, erteńine alańdamaıtynyn, ortaq Otanymyzdyń kórkeıýine, gúldenýine tilektes ekenin jetkizse, Petropavl qurylys-ekonomıkalyq kolledjiniń stýdenti Roza Omarova boıyndaǵy jastyq qýatyn, alǵan bilimin el ekonomıkasynyń serpindi damýyna arnaıtynyn aıta kelip, ózgelerdi osyndaı bastamashyl isterge belsene qatysýǵa, Otanymyzdyń patrıoty, janashyry bolýǵa shaqyrdy. – Elbasy qazaqstandyq armanǵa bastaıtyn Ult Josparyn belgilep berdi. Bes ınstıtýttyq reformany júzege asyrýdyń 100 naqty qadamynyń praktıkalyq kezeńi bastalǵanyn málimdedi. Biz týǵan jerge degen ińkár mahabbatymyzdy, ystyq saǵynyshymyzdy halqymyz ben Otanymyzdy baı da baqýatty etýge arnaýymyz kerek. Ol úshin kópetnosty qoǵamymyzdyń artyqshylyqtaryn tıimdi paıdalana bilý qajet,–dedi tildeskenimizde «Dýslyk» tatar-bashqurt etnomádenı birlestiginiń múshesi Zúleıha Bıkmetova. Onyń oıyn ázerbaıjan etnomádenı uıymy tóraǵasynyń orynbasary Shyńǵys Kýrbanov ta qoldap, bir shańyraq astynda tatý-tátti ómir súrip kele jatqan qazaqstandyqtardyń daǵdarystan qınalmaı shyǵýyna tilektestigin bildirdi. Saltanatty sharadan keıin aspanǵa qyzyldy-jasyldy sharlar ushyrylyp, «Alǵa, Qazaqstan!» áni shyrqaldy. Onyń sońy merekelik konsertke ulasty. Oblysta Táýelsizdigimizdiń 25 jyldyǵy merekesine oraı is-sharalar jospary jasalyp, ár aı elimizdiń jetken jetistikteri men «Máńgilik El» qundylyqtaryna arnalady. Jyl aıaǵyna deıin 3,5 myńǵa jýyq túrli deńgeıdegi saıası, mádenı sharalar atqarylady. О́mir ESQALI, «Egemen Qazaqstan». Soltústik Qazaqstan oblysy.