Atyraýda jas mamannan memleket paıdasyna járdemaqy óndirildi

ATYRAÝ. 18 qańtar. Atyraý oblysynyń Isataı aýdanyna «Dıplommen – aýylǵa» baǵdarlamasymen jumysqa kelgen jas mamannan 98 910 teńge kóleminde kóterme járdemaqy sot arqyly memleket paıdasyna óndirildi. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady. Isataı aýdany ákiminiń apparaty jas mamannan kóterme járdemaqyny óndirý jóninde aýdandyq sotqa talap aryzben júgingen. Oǵan Aqqystaý orta mektebine «Dıplommen – aýylǵa» baǵdarlamasymen muǵalim bolyp jumysqa ornalasqan jas mamannyń ekijaqty kelisimdi buzýy sebep bolǵan. Jas mamanǵa baǵdarlamaǵa sáıkes jergilikti bıýdjetten bir jolǵy kóterme járdemaqysy berilgen. Onyń kólemi – 98 910 teńge. Ákimdikpen arada jasalǵan kelisim boıynsha jas maman sol mektepte 5 jyl jumys jasaýǵa mindetteme alǵan. Alaıda, jas maman kórsetilgen merzimnen buryn óz erkimen jumystan ketýge aryz jazypty. Demek, baǵdarlama jáne ekijaqty kelisim talaptary buzylǵan. Ákimdik apparaty men jas maman arasyndaǵy azamattyq isti qaraǵan Isataı aýdandyq sotynyń sheshimimen jaýapkerden, ıaǵnı, jas mamannan kóterme járdemaqy – 98 910 teńge jáne 2 968 teńge kólemindegi memlekettik baj óndirildi. Sot sheshimi zańdy kúshine endi. Joldasbek Shópeǵul. Derek: Atyraý oblystyq sotynyń baspasóz qyzmeti. Sýret: askeri.sud.kz.