Birqatar tennısshi kelisilgen oıynǵa qatysty kúdikti dep tanyldy

ASTANA. 18 qańtar. Búgin tennısten «Úlken dýlyǵa» sanatyna jatatyn maýsymashar týrnır – Australian Open saıysy bastaldy. Osy týrnır aldynda belgili bolǵan jaıt tennıs álemin dúr silkindirdi. Atap aıtqanda, álemdik elıtadaǵy keıbir tennısshiler kelisilgen oıynǵa qatysy bar degen kúdikpen aıyptalyp otyr. Bul týraly eurosport.ru portalyna silteme jasaǵan egemen.kz tilshisi habarlady. BBC-diń málimdeýinshe, telearna men BuzzFeed News medıa-kompanııasy qyzmetkerleriniń qolyna 2007 jyldan bastalǵan ATP oıyndaryna júrgizilgen tergeýdiń nátıjeleri túsken. Ol qujattarda Reseı aýmaǵynda, sondaı-aq, Italııada (soltústik óńir men Sısılııada) oıyn sındıkattaryna qatysty áreketter baıqalǵany rastalǵan. Nátıjesinde, tergeýshiler kelisilgen dep baǵa bergen kezdesýlerge keıbireýler bás tigý arqyly júzdegen myń fýnt sterlıng tabys tapqan. Korporasııanyń habarlamasyna qaraǵanda, sondaı úsh oıyn Ýımbldon týrnırinde oınalǵan. Qupııa tergeý áreketteriniń nátıjesinde 2008 jyly kelisilgen oıynǵa qatysy bar 28 tennısshiniń attary belgili boldy. Alaıda, olardyń is-áreketteri odan ári tergelmeı, sportshylarǵa eshqandaı shara qoldanylmady. Sonymen qatar, jetekshi býkmekerlik kontorlardaǵy bás tigýge baqylaý júrgizetin eýropalyq uıym 2015 jyly 50 oıynnyń nátıjesin kúdikti dep tanyǵan. Sondaı-aq, ózge sport túrlerimen salystyrǵanda, tennıste mundaı jaǵdaı kóp kezdesetinine nazar aýdarylǵan. VVS atalǵan tizimge engen 8 tennısshi bıylǵy Avstralııa ashyq birinshiligine qatysatynyn da habarlap otyr. Ázirge ol sportshylardyń kinási dáleldenbeı, aty-jónderi jarııalanbaıdy. Desek te, qazirdiń ózinde kúdikti tennısshilerdiń esimderi telearnaǵa belgili. Elaman Qońyr. Derek: eurosport.ru. Sýret: unian.net.