FIFA Blatterge jalaqy tóleýin toqtatqan joq

ASTANA. 19 qańtar. Halyqaralyq fýtbol federasııasynyń (FIFA) burynǵy prezıdenti Iozef Blatter fýtbol salasynda qyzmet atqarýǵa tyıym salynǵanyna qaramastan, atalǵan uıymnan áli jalaqy alyp keledi. Bul týraly Reuters agenttigine silteme jasaǵan egemen.kz tilshisi habarlady. О́tken jyldyń jeltoqsan aıynda FIFA-nyń etıka jónindegi komıteti 1998 jyldan beri uıymdy basqaryp kelgen Blatterdi fýtboldan 8 jylǵa alastaý týraly sheshim shyǵarǵan bolatyn. Odan bólek, FIFA-nyń vıse-prezıdenti, Eýropa fýtbol qaýymdastyqtary odaǵynyń (ÝEFA) basshysy Mıshel Platını de sondaı merzimge shettetildi. Atalǵan komıtetke qarasty tergeý palatasynyń baspasóz-hatshy Andreas Bantel málimdegendeı, Blatterdiń jalaqy alýy eshqandaı zańǵa qaıshy emes. Bul jóninde ol: «Uıymnyń jańa prezıdentin saılaý 26 aqpanda ótedi. Al ol merzimge deıin Iozef Blatter FIFA-nyń zańdy túrde saılanǵan prezıdenti bolyp sanalady. Sondyqtan kelesi saılaýǵa deıin ol kelisimshartta kórsetilgendeı jalaqy alyp turýǵa tolyq quqyly», – dedi. О́tken jyldyń qyrkúıek aıynda Shveısarııa prokýratýrasy Platınıdiń esepshotyna 2 mln. Shveısarııa frankin aýdarǵany úshin Blatterge qatysty is qozǵaǵan edi. Aqsha 2011 jyly aýdarylǵan. Bul fransýzdyń 1999-2002 jyldar aralyǵynda kórsetken qyzmeti úshin tólengen qarjy. Alaıda, qos tarap bul áreketterin qaǵaz júzinde bekitpegen. Aıta keteıik, búginde Blatter men Platınıden jemqorlyqqa qatysty taǵylǵan barlyq aıyp alynyp tastaldy. Alaıda, olardyń ekeýi de syılyq qabyldaý, adaldyq, jalpy tártip erejeleri, múddeler qaqtyǵysy syndy FIFA-nyń etıka kodeksindegi keıbir tarmaqtardy buzǵany úshin kináli dep tanylyp otyr. Elaman Qońyr. Derek: reuters.com. Sýret: gazeta.ru.