Atyraýda júrgizýshi shartty jaza aldy

ATYRAÝ. 20 qańtar. Atyraý oblysyndaǵy Isataı aýdandyq sotynyń úkimimen júrgizýshi bótenniń kóligin ruqsatsyz júrgizip, qasyndaǵy jolaýshynyń biriniń ólimine, ekinshisiniń densaýlyǵyna qaterli zııan keltirýge sebepshi bolsa da 5 jyl merzimge shartty túrde sottaldy. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady. «Sottalýshy alkogoldik masań kúıde «Úsh kópir» eldi mekenindegi turǵynnyń ıeligindegi «Gaz 33021 212» markaly avtokóligine jolaýshy retinde úsh adamdy otyrǵyzyp alyp, kólik ıesiniń ruqsatynsyz kólikti aıdap ketedi. H.Erǵalıev selosy baǵytyna qaraı qara jolmen ketip bara jatyp, basqarý júıesin ıgere almaı, jol apaty oqıǵasyna ushyraıdy. Osynyń saldarynan avtokólikte otyrǵan jolaýshylardyń úsheýi de avtokóliktiń salonynan syrtqa qulap, onyń biri alǵan aýyr dene jaraqatynan oqıǵa bolǵan jerde qaza tapty. Al taǵy bir jolaýshynyń densaýlyǵyna qaterli zııan kelgen. Basty sot talqylaýynda sottalýshy ózine taǵylǵan aıypty tolyq moıyndaǵan», – dep habarlady Atyraý oblystyq sotynyń baspasóz hatshysy Boranbaı Ǵalıev. Isataı aýdandyq sotynyń úkimimen sottalýshy Qylmystyq kodekstiń 200-babynyń 1-bóligimen jáne 346-babynyń 4-bóligimen kináli dep tanyldy. Alaıda, oǵan Qylmystyq kodekstiń 63-babyn qoldanyp, taǵaıyndalǵan jaza kólik quralyn basqarý quqyǵynan 7 jyl merzim jáne 5 jyl merzimge bas bostandyǵynan aıyrý shartty dep eseptelip, probasııalyq baqylaý belgilendi. Joldasbek Shópeǵul. Derek: Atyraý oblystyq sotynyń baspasóz qyzmeti. Sýret: rod-pravo.org.