Kúrdeli kezeń mańyzdy mindetter júkteıdi

Elbasy Parlament Májilisiniń kezekten tys saılaý­yn ótkizý máselesi jóninde keńes ótkizdi, dep habarlady Pre­zı­denttiń baspasóz qyzmeti. Keńeske Premer-Mınıstr K.Másimov, Memlekettik hatshy G.Ábdiqalyqova, Prezıdent Ákim­shiliginiń Basshysy N.Nyǵma­týlın, Konstıtýsııalyq Keńes tóraǵasy I.Rogov, Bas prokýror A.Daýylbaev jáne basqalar qatysty. Is-shara barysynda Memleket basshysy depýtattardyń kezekten tys Májilis saılaýyn ótki­zý jáne barlyq deńgeıdegi más­lıhattardyń kezekti saılaýyn ótkizý týraly bastamasyna baılanysty úndeý jasady. Qazaqstan Prezıdenti Par­lament Májilisi depýtattarynyń ókilettikterin merziminen buryn doǵarý jáne jańa saılaý belgileý jónindegi usynysyn jan-jaqty taldap qaraǵanyn aıtty. Nursultan Nazarbaev jańa ke­zeńde shıkizatqa tómen baǵa jaǵ­daıynda ómir súrýge beıimdelip, ındýstrııalandyrýdy, shaǵyn jáne orta bıznesti damytýdy belsendi jalǵastyrý kerektigin atap ótti. – Osy bir kúrdeli ahýalda bizdiń bárimiz úshin eń mańyzdysy – ysyrapsyz ómir súrý, resýrs­tardy únemdeý, jumys oryndaryn saqtaý ekenin túsiný. Úkimet pen Parlamentke bul jaǵdaıda birlesip, jınaqy jumys istep, jedel sheshim qabyldaý qajet. Bizdiń halqymyzǵa burynǵysha birigip, osy kúrdeli ýaqytta kez kelgen yqtımal arandatýlarǵa, qajet bolsa, zańnamalyq turǵydan toıtarys berý kerek. Ol jaǵdaıdyń nasharlaýyna kinálilerdi izdep, saıasılandyrǵysy keletinderge de qatysty. Bul – jahandyq úderis, oǵan birde-bir el, sonyń ishinde Qazaqstan da yqpal ete alǵan joq. Sondyqtan, bárimiz toptasyp, bir-birimizge kómektesýimiz kerek, – dedi Memleket basshysy. Qazaqstan Prezıdenti biz­diń qo­ǵam búginde túrli syn-qater­ler­ge daıyn ekenine nazar aýdardy. – Biz Táýelsizdiktiń shırek ǵasyrǵa jýyq abyroıly jolyn júrip óttik. Biz jasampaz eńbekte shyńdalyp, tabysty, qalyptasqan jáne álemge syıly memleket qurǵan birtutas halyqqa aınaldyq. Men depýtattardyń bastamasyn Qazaqstan men qazaqstandyqtardyń taǵdyryna otanshyldyq turǵydan qam­qorlyq tanytýdyń kórinisi dep qabyldaımyn. Májilistiń kezekten tys saılaýy (onyń ishinde Qazaqstan halqy Assambleıasynyń da depýtattary bar) jáne óńirlik máslıhattardyń kezekti saılaýy birge ótýi ýaqytty da, qarjyny da únemdeıdi. Barsha depýtattarǵa memleketshil ustanymy men asa joǵary tarıhı jaýapkershilik tanytqany úshin alǵysymdy aıtamyn, – dedi Nursultan Nazarbaev. Memleket basshysy el Konstıtýsııasy talaptaryna sáıkes, Parlament palata­lary tóraǵalarymen, Premer-Mı­nıstrmen jáne Konstıtýsııalyq Keńes tóraǵasymen konsýlta­sııalar ótkizgenin, sonyń qory­tyndysy boıynsha de­pýtattardyń bastamasyn qoldaý jóninde sheshim qabyldanǵanyn aıtty. – Bılik salasy ókilderi quramynyń jańartylýy elimiz ben halqymyzdyń múddesine saı keletindigine senimim kámil. Saıası partııalar kún tárti­bindegi mindetterdi túsine biletin saýat­ty, isker jáne el múd­desine adal kandıdattardy usynýǵa tıis. Búgin men Besinshi shaqy­ry­lymdaǵy Parlament Májilisiniń ókilettigin merziminen buryn toqtatý týraly Jarlyqqa qol qoıdym. Májilistiń kezekten tys saılaýy 2016 jylǵy 20 naýryzǵa belgilendi, – dedi Qazaqstan Prezıdenti. Nursultan Nazarbaev búkil qazaqstandyqtardy, qoǵamnyń barlyq áleýmettik toptaryn ýaqyt talaby týdyrǵan sheshimdi qoldaýǵa shaqyrdy. – Barshańyzdy saılaýǵa belsene qatysýǵa, elimizdiń bolashaǵy jolyndaǵy tutastyǵymyz ben birligimizdi taǵy da tanytýǵa shaqyramyn. Konstıtýsııanyń kepili retinde Ortalyq saılaý komıssııasyna jáne barlyq ókiletti memlekettik organdarǵa aldaǵy saılaýda zańdylyqty, ashyqtyqty jáne ádilettilikti qamtamasyz etýdi tapsyramyn. Daýys berý naýqany jáne saılaý kúrdeli kezeńde ultty uıystyryp, bizdiń Qazaqstanymyzdy jańa belesterge alyp shyǵýǵa kómektesedi dep senemin, – dedi Memleket basshysy.