Qoldy bolǵan 817 iri qara

Aqmola polıseıleri osynsha maldy ıelerine qaıtaryp bergizdi Aqmola oblysy ishki ister or­gandarynyń qyzmetkerleri ót­ken jyly mal urlyǵynyń jaı-jap­sarlaryn ashýda aıtar­lyqtaı pármendi jumystar júrgizdi. Olar bul rette qyl­mystyń aldyn alýǵa kóbirek kóńil bólip, jasalǵaly turǵan kóptegen qolaısyz isterdiń jolyn kesip úlgerdi. Osy maqsatta tártip saq­shy­lary eldi mekenderde mal qaraýshylar sanyn kó­beıte túsýge yqpal jasady. Sóı­tip, ótken jyly olardyń qata­ry 65 adamǵa jetti. Mal qaraý­shylardan bólek, maldy baǵý jaǵyn da aıryqsha nazarda ustady. Osynyń yńǵaıynda «úsh jaqty» kelisimshart jasaý, malǵa en men tańba salý máseleleri qatań baqylaýǵa alyndy. Jyl ishinde jasalǵan kelisimsharttar 2844-ke deıin kóterildi. Urlanǵan maldy aıdap áketýdiń boljamdy oryndary kórsetilgen karta-kes­te jasaldy. Sol oryndardyń or­nalasý erekshelikteri eskerile otyryp, jan-jaqqa 53 blok-beket qoıyldy. Buǵan qosa, Astanaǵa baratyn joldarǵa 6, Kókshetaýǵa kiretin joldarǵa 3 beket toptastyryldy. Olar jyl ishinde 1329 mal basyn, terisi sypyrylǵan 3012 mal etin, sondaı-aq, olardy tasymaldaýshy 1063 avtokólik quraldaryn tekserip shyqty. Osyndaı pármendi jumys­tardyń arqasynda 2016 jyly oblysta mal urlyǵy aýyr túriniń ashylýy 66,7 paıyzǵa ósti. Al ortasha aýyrlyqtaǵy qylmysty ashý 23,8 paıyzǵa artty. Bul jumystardyń qorytyndysynda qoldy bolyp bara jatqan 817 mal óz ıelerine qaıtaryldy. Aqmola polıseıleri byltyr aıtarlyqtaı tabysqa jetkizgen jumysty bıyl da jalǵastyryp keledi. Baqbergen AMALBEK, «Egemen Qazaqstan». Aqmola oblysy.