AQTAÝ. 21 qańtar. Aqtaýda atylyp óldi delingen ákimdik kúzetshisiniń týystary polısııanyń deregin joqqa shyǵarýda. Bul týraly tumba.kz saıtyna silteme jasaǵan egemen.kz tilshisi habarlady.
Týystarynyń aıtýynsha, 32 jastaǵy kelinshektiń óz-ózine qol jumsaýyna eshqandaı negiz joq. Kelinshek qaıtys bolardan buryn 33 jasyn toılaýǵa daıyndalyp júrgen, sondaı-aq, týystary ony obyr dertine shaldyqqan dep polıseıler taratqan aqparattyń jalǵan ekenin aıtty. Olar polısııa leıteınanty ákimdikte sybaılas jemqorlyqtyń kýási bolǵan soń qasaqana óltirildi dep sanaıdy.
«Eshqandaı aýrýy joq. Deni saý. О́z jumysyn súıip jasaıtyn qyz qyrshyn qıylyp ketip otyr. Úlken korrýpsııa bolǵan qalalyq ákimdikte. Sony bul qyz kóredi, biledi. Olar qyzymnyń kózin joq qylyp, myltyǵyn qolyna ustatyp ketken», – deıdi marqumnyń anasy Marıza Quraqova. Týystarynyń kúmándanýyna oqıǵa bolǵan kezde ákimdiktegi baqylaý kameralarynyń túgel óship qalýy men tergeýshilerdiń qaýipti kesel týraly jaýaby sebep bolyp otyr. Mańǵystaý oblysyndaǵy onkologııalyq ortalyq Qarlyǵanyń tirkeýde joq ekenin rastaıtyn anyqtama bergenine qaramastan, polısııa onyń naýqas ekenin taǵy bir rastady.
«Muqanova Demına degen azamat birge jumys istedi, ákimdiktiń dıspetcheri bolyp. Ekeýi birge otyrady, sháı ishedi, áńgimelerin aıtady, sol kisige aıtypty óziniń aýyratynyn», – deıdi bul týraly Mańǵystaý oblystyq ishki ister departamenti bastyǵynyń orynbasary Aldırza Qýanyshkereev.
Muqanovanyń ózi kóp uzamaı jumystan ketken. Al ákimdiktiń baqylaý kameralarynda qaıǵyly oqıǵaǵa deıin aqaý boldy deıdi polıseıler.
Qazir atalǵan is boıynsha óz-ózine qol jumsaýǵa ıtermeleý baby negizinde tergeý júrip jatyr. Kúdiktiler de joq emes. Endi oqıǵanyń mán-jaıy eki aıdan keıin daıyn bolatyn saraptamanyń qorytyndysy boıynsha anyqtalmaq.
Qarlyǵanyń kúzet basqarmasynda jumys istep júrgenine 11 jyl bolypty. Jeltoqsannyń 19-nan 20-syna qaraǵan túni Aqtaý qalasy ákimdigine kezekshilikke túsken kelinshektiń máıitin áriptesteri ájethanadan tapqan bolatyn. Sol kezde tergeýshiler onyń óz-ózine qol jumsaýyna obyr dertine shaldyǵýy sebep bolýy múmkin degen edi.
Gúlaıym Shyntemirqyzy.
Derek, sýret: tumba.kz.
