«Barys» Ombynyń «Avangardynan» oısyraı jeńildi

ASTANA. 21 qańtar. Qurlyqtyq hokkeı lıgasy sheńberinde «Barys» Ombynyń «Avangardynan» oısyraı jeńildi. Astanada ótken kezdesýde match qonaqtardyń paıdasyna 7:2 esebimen aıaqtaldy. Bul týraly egemen.kz tilshisi habarlady. «Á» degennen ombylyqtar basymdyqqa ıe bolyp, joıqyn shabýyldar uıymdastyrdy. Nátıjesinde alǵashqy 9 mınýtta «Avangard» oıynshylary 3 shaıba soqty. Aldymen 1-mınýtta Vladımır Sobotka esep ashsa, arada bar bolǵany 2 mınýtqa jeter-jetpes ýaqyt ótkende, Vladımır Mıheev tablodaǵy kórsetkishti 2:0-ge jetkizdi. Al 9-mınýtta Sobotka dýbldiń avtory atandy. Bunymen de shektelmegen reseılikter úziliske deıin bizdiń qaqpaǵa taǵy bir shaıba engizdi. Atap aıtqanda, 18-mınýtta shabýylshy Nıkolaı Lemtıýgov esepti ulǵaıtty. Iri eseppen alǵa shyqqan qonaqtar ekinshi kezeńde de qarqynyn báseńdetpedi. Birinshi bóliktiń núktesin qoıǵan Lemtıýgov bul kezeńde alǵash bolyp gol soqty (22-mınýt). Abyroı bolǵanda, astanalyqtar 28-mınýtta Naıdjel Doýstyń kómegimen bir shaıba soǵyp, esep aıyrmasyn qysqartty. Tipti úshinshi kezeńde, ıaǵnı, 54-mınýtta «Barys» sapynan Roman Starchenko mergendigimen kózge túsip, jankúıerlerge úmit syılaǵan edi. Alaıda, Andreı Nazarov shákirtteriniń odan árige shamalary jetpedi. Esesine, «Avangard» sońǵy sekýndqa deıin oınap, taǵy eki gol soqty. Bul joly Iýrıı Aleksandrov (58-mınýt) pen Ivan Fıshenko (60-mınýt) enshilerine bir goldan jazdy. Osylaısha, «Barys» maýsymdaǵy 27-jeńilisine ushyrady. Oıyn barysynda este qalǵan basqa epızodtarǵa keler bolsaq, 35-mınýtta bizdiń tafgaı Damır Ryspaev qarsylastyń qorǵaýshysy Mıhal Kempnıge qarsy dóreki oınady. Ol azdaı, ombylyqqa judyryǵyn ala júgirgen Ryspaevty tóreshi oıyn sońyna deıin aıdynnan qýdy. Sonymen qatar, oıynnyń alǵashqy 2 mınýtynda «Barystyń» qaqpasyn Iаn Laso kúzetse, 3-mınýttan 22-mınýtqa deıin jattyqtyrýshylar Pavel Polýektovqa senim artty. Degenmen, ol da ózine artylǵan mindetti oıdaǵydaı oryndaǵan joq. Soǵan oraı qalǵan ýaqytta qaqpaǵa Iаn Laso turdy. Búginde qorjynynda 78 upaıy bar «Barys» Shyǵys konferensııasynda 7-orynda keledi. Elordalyqtar kelesi kezdesýlerin 25 qańtarda óz aıdynynda Nıjnekamskiniń «Neftehımıgimen» ótkizedi. Elaman Qońyr. Derek: egemen.kz. Sýret: hcbarys.kz.