Basty maqsat – barshanyń múddesi

Memleket basshysy Nursultan Nazarbaevtyń halyqqa úndeýi elimizdiń batystaǵy qaqpasyn mekendeıtin el-jurt pen kópetnosty turǵyndar arasynda tıisti qoldaý men tereń túsinistik taýyp otyr. Solardyń qalyń bir tobyn úkimettik emes uıymdar men qoǵamdyq birlestikterdiń ókilderi quraıdy. Oral qalalyq ardagerler keńesiniń tóraǵasy K.NYǴMETPEN qysqasha áńgime osy taqyryp tóńireginde toqaılasty. – Kenjebaı Áljanuly, Mem­leket basshysynyń Jar­ly­ǵy men úndeýinen kóńilge qan­daı oı túıdińiz? – Búgingi tańda joǵary deńgeıdegi bılik tarmaqtary men jergilikti jerdegi atqarýshy bılik pen saılanbaly organ ókilderiniń bir-birimen ózara baılanysta jumys isteýi óte mańyzdy. Ári mundaı qadamnyń ózi el men halyqtyń múddeleri men muń-muqtajdary úshin jergilikti jáne memlekettik deńgeıde ońtaıly sheshimder qabyldaýǵa septigin tıgizedi. Eń bastysy – buǵan tıisti konstıtýsııalyq jáne zańdylyq negizder jasalyp otyr. Tipti, osyndaı zańdylyq tetikter arqyly kez kelgen yqtımal arańdatýlarǵa da toıtarys berýge bolatynyn keshegi halyqqa úndeýinde Memleket basshysy da atap ótken eken. Respýblıka Prezıdentiniń halyqqa úndeýiniń ár joly syndarly usynystar men oı-pikirlerge toly. Jarııalanǵan Jarlyqta qazaqstandyqtardy qazirgi kúrdeli daǵdarystyq kezeńniń zardabyn kóp tarttyrmaı alyp shyǵýdyń taktıkasy men tetikteri jan-jaqty kórinis tapqan. Úndeý osynysymen de baǵaly ári qundy dep bilemin. Qazirgi kúni jeke múddelerden góri eldik múddelerdi alǵashqy kezekke qoıýdyń máni zor. Bul úshin eldiń ár azamatynyń patrıottyq sezimi tereń bolǵany jón. Bul arada árqaısymyz memleket bizge ne berdi degennen góri, biz memleketke ne berdik degen máseleni de tereń túısingenimiz jón sekildi kórinedi. Dál osyndaı oılaý júıesiniń sáti men kezi kelgeni de kámil. Mine, jeke óz basyma qatysty alǵanda úndeýden túıgen taǵy bir taǵylym osyndaı. Túptep kelgende, Prezıdent úndeýi men Jarlyǵynyń basty maqsaty el múddesine baǵyttalǵan. –Aldaǵy naýryz aıynda saılanatyn Parlament jáne jergilikti máslıhattar depýtattary korpýsynyń kelbeti qandaı bolǵanyn qalar edińiz? – Elbasynyń Jarlyǵy men úndeýi elimizge damýdyń adam aıtqysyz shyńdaryn baǵyndyrýǵa múmkindik beredi. Beıbitshilik, turaqtylyq jáne kelisim táýelsiz Qazaqstan tabystarynyń álem tanyǵan nyshandaryna aınaldy. Búginde, álemdik ekonomıkalyq daǵdarys jaǵdaıynda, Qazaqstan halqy Máńgilik El ıdeıasymen rýhtanyp otyr. Sondaı-aq, eldiń barlyq resýrstaryn ósimniń jańa kókjıekterin baǵyndyrý úshin jumyldyrýǵa shaqyrady. Biz, Oral qalalyq ardagerler keńesi aldaǵy naýryz aıynda saılanatyn Parlament Májilisi men máslıhattarǵa el damýynyń jańa, jaýapty kezeńinde joǵary senim bildiremiz. Elimizdiń jańa depýtattyq korpýsy barlyq saıası partııalardyń ózara is-qımylynyń tıimdi tetigi bolýy, bizdiń ilgerileýimizdiń irgetasy retinde beıbitshilik pen kelisimdi nyǵaıtýdy qamtamasyz etýi tıis. Bul máselede iske basshylyq Elbasynyń keshegi kúni jarııalanǵan Jarlyǵy men halyqqa úndeýi bolyp tabylady. Barshamyz álemdik ekonomıkalarda oryn alǵan jahandyq daǵdarysty kórip otyrmyz. Barlyq elderdiń ekonomıkalary qıyn kezeńnen ótip jatyr. Osyǵan bizdiń elimizdiń laıyqty jaýaby retinde bes ınstıtýttyq reformany júzege asyrý boıynsha «100 naqty qadam» – Ult Jospary bolyp otyr. Osy jaǵdaıda jańadan saılanatyn depýtattar el múddesi úshin janqııarlyqpen jumys isteýi úshin jańa senim mandatyn alýy kerek. Elbasy úndeýiniń basty quńdylyǵyn men osylaı túsinemin. Ult Josparyna sáıkes qyzmet atqaryp ony oıdaǵydaı júzege asyrý úshin depýtattar jańa senim mandatyn alýy kerek Elbasy Jarlyǵynyń basty bir máni, ári basty bir qundylyǵy da osynda dep oı túıýge bolady. – Áńgimeńizge rahmet. Áńgimelesken Temir QUSAIYN, «Egemen Qazaqstan». Batys Qazaqstan oblysy.