Bıyl Oralda Jastar saraıynyń qurylysy bastalady

ORAL. 21 qańtar. Batys Qazaqstan oblysynyń ortalyǵy – Oral qalasynda Qarashyǵanaq Petrolıým Opereıtıng (KPO) kompanııasynyń áleýmettik jobaǵa bólingen 2,8 mıllıard teńgesine Jastar saraıy salynady. Bul týraly egemen.kz tilshisi habarlady. Buǵan deıin atalǵan kompanııanyń áleýmettik jobalary sheńberinde 2015 jyly jumsalǵan qarjy esebin baıandaǵan bolatynbyz. Al osy joly KPO b.v. kompanııasynyń dırektory Renato Marolıdiń 2016 jylǵa arnalǵan áleýmettik baǵdarlamasyn toqtalyp óteıik. Barlyǵy 2016 jyly oblys boıynsha 17 áleýmettik joba, oǵan qosa tek bir ǵana Bórli aýdany boıynsha 15 joba josparlanýda. Atap aıtqanda, Oral qalasy boıynsha Jastar saraıynyń qurylysy (tapsyrý merzimi – 2017 jyl); Jaıyq ózeniniń oń jaǵalaýyn abattandyrý (2 kezeńge jalǵasady); Dostyq dańǵyly avtojolyn kúrdeli jóndeýden ótkizý; M.Ihsanov kóshesi avtojolyn qaıta jańǵyrtý; Jastar stadıonyndaǵy dopty hokkeıge arnalǵan alańdy jabdyqtaý; kitaphana jáne muraǵat qurylysy; Muhıt kóshesi men Eýrazııa dańǵyly qıylysynan bastap 2-shi baza aıaldamasyna deıingi avtojoldy kúrdeli jóndeýden ótkizý; Eýrazııa dańǵylyndaǵy sý qubyrlary kollektorlaryn qaıta jańǵyrtý; kishigirim Jympıty, Chkalova kósheleri avtojoldaryna ortasha deńgeıde jóndeý júrgizý; 7 jáne 9-shaǵyn aýdan aralarynda ishki joldardyń qurylysyn júrgizý; Sıolkovskıı kóshesine ortasha jóndeý júrgizý; Shevchenko men Isaev kósheleri avtojoldaryna kúrdeli jóndeý júrgizý; №2 orta mektebine kúrdeli jóndeý júrgizý, Oral qalalyq demalys saıabaǵyndaǵy Shaǵan ózeniniń oń jaǵalaýyn abattandyrý (1 kezeńnen turady); Aqjaıyq aýdany Shabdarjap aýylyna 198 oryndyq mektep salý; Shákir Jeksenbaev atyndaǵy Uıaly aýyldyq orta mektebin kúrdeli jóndeýden ótkizý kózdelýde. Sonymen qatar, oblys ákimi baspasóz qyzmetiniń málimetterine kóz salsaq, budan basqa jer qoınaýyn paıdalanýshylardan jalpy aımaqtyń áleýmettik-ekonomıkalyq damýyna 2016 jyly 335 mıllıon teńge bóliný josparlanýda. Salystyrmaly túrde 2015 jyly bul soma 335 mıllıon teńgeni qursa al 2014 jyly tek 245 mln teńge bólingen. KPO b.v. kompanııasy áleýmettik jobalarǵa ár jylǵa 20 mıllıon dollar tóńirgende, al 2014 jyldan bastap jer qoınaýy óndirilip jatqan Bórli aýdanyna 10 mıllıon dollardan bóle bastaǵanyn aıta ketken jón. Temir Qusaıyn. Derek, sýret: egemen.kz.