Qaýipti indet týraly habarlamalardyń ShQO-ǵa qatysy joq

О́SKEMEN. 22 qańtar. Shyǵys óńirindegi tumaýdyń qaýipti juqpaly túrleriniń ahýaly týraly oblystyq densaýlyq saqtaý basqarmasy basshysynyń orynbasary Sergeı Popov baspasóz máslıhatyn ótkizdi. Bul týraly egemen.kz tilshisi habarlady. Búginde A (H1N1) túrindegi tumaý vırýsy indetke jatpaıdy. Bul bar-joǵy maýsymdyq aýrý túri ǵana. Sondyqtan, turǵyndar atalǵan aýrý túrimen jyl saıyn betpe-bet keledi. Jedel respıratorly vırýstyq juqpamen aýyryp, tumaý juqtyrǵandardyń oblys kóleminde tirkelýi 1,4 esege azaıdy. Oblystyq densaýlyq saqtaý basqarmasy basshysy orynbasarynyń aıtýynsha, A (H1N1) túrindegi tumaý vırýsy buryn óte qaýipti bolatyn. Aýrýdy anyqtaý da, emdeý de qıyn edi. Biraq, 2010 jyly farmasevtıkalyq kompanııalardyń daıyndaýymen shyqqan ekpeler ony maýsymdyq aýrý túrine aınaldyrdy. Bıyl tumaýdyń qaýipti túrimen aýyrǵandar tutynýshylar quqyǵyn qorǵaý departamentinde tirkelgen joq. «2010 jyldan bastap, halyq jyl saıyn ekpe alady. Bul ekpe jyldam taralatyn aýrýǵa jol bermeıtin ımmýndyq qorǵanyshty qalyptastyrady. Tipti, adam aǵzasyna atalǵan vırýs túskenniń ózinde de asa qorqýdyń qajeti joq», – dedi Sergeı Popov. Qazirgi kezde óńirde JRIJ ben tumaýdyń tómendegeni baıqalady. Sondaı-aq, densaýlyq saqtaý basqarmasynyń ókili WhatsApp messendjeri arqyly taralǵan epıdemıologııalyq jaǵdaı jóninde óz pikirin bildirdi. «Shyǵys Qazaqstan oblysynyń densaýlyq saqtaý mekemeleri kestege sáıkes jumys isteýde. Dári-dármek pen tósek-oryn jetkilikti. Internet jelisi arqyly taralǵan qaýipti indet jónindegi jalǵan aqparattardyń oblystaǵy densaýlyq saqtaý mekemelerine qatysy joq», – dedi ol. Dýman Anash. Derek, sýret: ShQO Aqparattyq ortalyǵy.