Jetpis jyldan keıingi júzdesý

Soǵys kezindegi ǵashyqtar osynsha jyldan soń kezdesýge asyǵady Amerıkanyń Vırd­jınııa shtatynda turatyn Ekinshi dúnıe­júzilik so­ǵystyń ardageri Norvýd Tomas «Valentına kúnin» budan 72 jylǵa jýyq ýa­qyt buryn ajy­rasyp qal­ǵan ǵashyǵy Djoıs Mor­rıspen Avstralııa je­rin­de qar­sy alǵaly otyr. Bu­rynǵy maıdan­gerdiń bul kezdesýine ke­rekti qar­jyny 2015 jylǵy qara­shadan bas­tap Kraýdfandıng servıs ortalyǵy jınap, qolyna 7 myń dollar tapsyrady. Endi osy aqshaǵa Tomas aqpan aıynda Avs­tralııaǵa sapar shekpekshi. Al Air New Zealand avıakompanııasy ony «jasyl kontınentke» tegin alyp-baryp qaıtpaqshy. Osy kezdesýge negiz bolǵan oqıǵa byltyrǵy 12 qarasha kúni ótipti. Buǵan soǵystan keıin Avstralııaǵa kelip, turaqtap qalǵan Morrıstiń budan birneshe jyl buryn parashıýtpen sekirgen qarııanyń qazir ınternetti de erkin meńgerip alǵany týraly jańa­lyqty kórýi sebep bolypty. Ekranǵa qarap otyrǵan keıýana ondaǵy keıipkerdiń óziniń baıaǵy jigiti ekenine esh kúmán keltirmeıdi. Sosyn ony eski sýrettermen salystyryp shyqqan ol ulyna osy adamdy taýyp berýdi tapsyrady. Sóıtip, birneshe kúnnen keıin 93-tegi Tomas pen 88-degi Morrıs soǵystan keıin birinshi ret Skype arqyly sóılesip, bir-birleriniń túrlerin kórgen. 21-degi Norvýd Tomas pen 17-degi Djoıs Morrıs 1944 jyldyń kókteminde Londonda tanysady. Olar munda birneshe aıdy birge ótkizedi. Alaıda, keıin áskerı basshylyq Norvýdty Fransııaǵa jiberedi. Ol soǵys bitkesin, sol jaqtan Qurama Shtattarǵa oralady. Jastar sodan keıin de biraz ýaqyt hat-habar alysyp turady. Sońynda Norvýd Djoısqa Amerıkaǵa kelip, ózine turmysqa shyǵýdy usynady. Biraq qyz medbıke oqýyn oqı basta­ǵanyn aıtyp, budan bas tartady. «Sol kezde men ózimniń ony odan góri qattyraq súıetinimdi túsin­dim», – deıdi qazir ardager. Osy­dan keıin bul jup bir-birle­rimen habarlasýdy doǵarady. Al 1996 jyly Anglııada Djoıs esimdi medbıkeniń ushaq apa­tynda qaza tapqanyn estigende, Nor­výd onyń óziniń jigit kúnindegi súıik­tisi ekenine esh kúmán keltire almaı­dy. Damır QOJAMQUL.