«Aqqum» – eń úzdik bastaýysh uıym

Bastaýysh partııa uıymdary búginde «Nur Otan» partııasynyń negizgi tiregine, shynaıy kúshine aınaldy desek artyq aıtqandyq emes. Sondyqtan bolsa kerek, ót­ken jyldy partııa bastaýysh partııa uıymynyń jyly dep jarııa­lap, osynyń aıasynda kóptegen jumystar atqaryldy. Solardyń biri – «Úzdik bastaýysh partııa uıymy» baıqaýy. Sharanyń basty maqsaty – elimiz boıynsha úzdik bastaýysh partııa uıymyn anyqtaý jáne olardyń jumys tájirıbesin eldiń barlyq aımaqtarynda taratý, partııalyq jáne saılanbaly qyzmetterge usyný, bilikti jáne belsendi bastaýysh partııa uıymy tóraǵalarynan partııalyq kadrlardyń rezervin qalyptastyrý jáne qoǵamdyq qabyldaýlar jumy­syn jetildirý men partııa qyzmetine qoǵamdastyqtyń nazaryn aýdarý. «Nur Otan» partııasy Jambyl ob­lystyq fılıalynda 399 bastaýysh partııa uıymy bar. Solardyń ara­synan 30 bastaýysh partııa uıymy iriktelip, oblystyq baıqaýda baq synady. Sodan oza shyqqan 3 je­ńimpaz uıym respýblıkalyq saıysqa joldama alǵan bolatyn. Respýblıkalyq baıqaýǵa 5000-nan astam BPU qatysyp, onyń ishinde 16 BPU iriktep alyndy. Olardyń qatarynan Jambyl oblysy, Talas aýdanynyń «Aqqum» bastaýysh partııa uıymy da kórindi. Baıqaý qorytyndysy boıynsha atalǵan bastaýysh partııa uıymy «Úzdik bastaýysh partııa uıymy» atalymy boıynsha birinshi oryndy ıelendi. Uıymnyń jetekshisi – «Tólebaı» sharýa qojalyǵynyń tóraǵasy Arqabek Tólebaev. Respýblıkalyq dodada mereıi ústem bolǵan bastaýysh partııa uıymy «Nur Otan» partııasy Tóraǵasynyń birinshi orynba­sary Asqar Myrzahmetovtiń qoly­nan «Eń úzdik bastaýysh partııa uıymy» dıplomy men 700000 teńge qarjylaı syılyq aldy. Bul marapattyń partııa oblystyq fılıalynyń bedelin arttyrýmen qatar, «Aqqum» bastaýysh partııa uıymynyń da belsendi jumysyn ózgelerge úlgi eteri daýsyz. Oralhan DÁÝIT, «Egemen Qazaqstan». Jambyl oblysy.